Ən çox tərəqqi edənlər

Milli Basketbol Assosiasiyası hər il müntəzəm mövsüm bitdikdən sonra fərdi mükafatlar təqdim edir. Onlardan biri də ən çox tərəqqi edən basketbolçu mükafatıdır.

Vaxtilə bu mükafata Ja Morant, Yannis Antetokumbo, Cimmi Batler, Pol Corc və bir çox başqaları layiq görülüb. Bu ilin nəticələrinə əsasən mükafata ən yaxın olan beş nəfəri sizə təqdim edirik.

5. Kobi Vayt (Çikaqo)

2022/2023 mövsümünün statistikası: 9,7 xal, 2,9 ribaund, 2,8 asist.

2023/2024 mövsümünün statistikası: 17,6 xal, 4,1 ribaund, 4,9 asist.

“Çikaqo”nun müdafiəçisi MBA-da beşinci mövsümünü keçirir.  Bu mövsüm Vaytın rolu bir qədər dəyişib, buna görə də o, daha çox meydançada olur. Buna komanda liderlərinin zədələri də təsir edib.

Bu mövsüm “Çikaqo Buls”un oyununda sabitlik yoxdur. Çox güman ki, komanda yenə də pley-offdan kənarda qalacaq. Bununla belə, komanda keçirdiyi son 10 görüşdən 7-də qələbə qazanıb və Vayt bu uğurların əsas yaradıcılarından sayılır.

 4. Alperen Şengün (Hyuston)

2022/2023 mövsümünün statistikası: 14,8 xal, 9,0 ribaund, 3,9 asist.

2023/2024 mövsümünün statistikası: 19,7 xal, 8,9 ribaund, 5,2 asist.

Türk basketbolçu MBA-da üçüncü mövsümünü yaşayır. Bundan əvvəl o, vətənində “Beşiktaş”da çıxış edib. 2021-ci ildə Oklahoma tərəfindən draftda seçilən mərkəz oyunçusu “Hyuston Rokets”ə dəyişdirilib.

Komandanın o zamankı baş məşqçisi Stiven Silas debütanta ilk mövsümdə 20 dəqiqə oynamaq imkanı verdi.  Bu müddət ərzində o, orta hesabla 10 xal, 6 ribaund və 3 asist edirdi. Yaddan çıxarmaq olmaz ki, komanda Ceyms Hardensiz ilk mövsümünü yaşadığından hər şeyə yenidən başlamağa alışmalı idi.

Şengün Kristian Vudun əvəzedicisi idi. Legionerlik təcrübəsi olmayan bir oyunçu üçün o, normal görünürdü. 2022/2023 mövsümündə, Vud komandadan ayrıldıqdan sonra türk basketbolçu “Rokets”in əsas mərkəz oyunçusuna çevrildi və statistik göstəricilərini yaxşılaşdırdı. Buna baxmayaraq, komanda turnir cədvəlinin sonuncu pilləsində qalmaqda davam edirdi və Texas klubunun rəhbərliyi məşqçini dəyişməli oldu. Stiven Silası İme Udoka əvəz etdi.

Hazırda komandada Şengün əsas personajlardan biridir. Onu ikinci Yokiç adlandırırlar.

3. Skotti Barns (Toronto)

2022/2023 mövsümünün statistikası: 15,3 xal, 6,6 ribaund, 4,8 asist.

2023/2024 mövsümünün statistikası: 20,6 xal, 9,2 ribaund, 5,7 asist.

Bu çempionat forvardın MBA-dakı üçüncü mövsümüdür. Fred Vanflit getdikdən sonra o, Paskal Siakamdan sonra “Reptors”un ikinci ulduzuna çevrilib. Bəzi ekspertlər hətta onun əsas sima olduğuna inanırlar. Əslində, Barns draftda seçildikdə çoxları bunu anlamırdı. Belə ki, onun Siakam və Anunobi ilə anlaşacağına inam az idi.

Bununla belə, o zamankı kanadalı məşqçi Nik Nurs Barns üçün uyğun mövqe tapa bildi və debütant fürsətdən məharətlə istifadə etdi. İlk mövsümündə o, draftın bir nömrəsi Ceyd Kanningem, eləcə də Caylen Qrin və Evan Moblini geridə qoyaraq, ilin ən yaxşı debütantı seçildi.

İri qabaritlərinə baxmayaraq, Skotti topla əla rəftar edir, ayaq hərəkəti və sürəti qaydasındadır. Rəqiblər onun yerində dönüşünün qarşısını almaqda çətinlik çəkirlər.

2. Tayriz Maksi (Filadelfiya)

2022/2023 mövsümünün statistikası: 20,3 xal, 2,9 ribaund, 3,5 asist.

2023/2024 mövsümünün statistikası: 20,6 xal, 3,8 ribaund, 6,7 asist.

“Siksers”in əsas müdafiəçi mövqeyi mövsümlərarası fasilədə boş qaldı. Bunun da səbəbi ulduz basketbolçu Ceyms Hardenin oynamaq istəməməsi idi. Bu yay komandaya gənclərlə səmərəli işləməyi bacaran Nik Nurs gəldi, onun gəlişi Tayriz üçün göydəndüşmə oldu.

Maksi şansını əldən vermədi. İndiana ilə görüşdə o, 50 xal toplamaqla karyera rekordunu yenilədi. Daha yeddi görüşdə isə 30-dan çox xal toplayıb. Komandanın əsas ulduzu Joel Embiid də hər şeydən razıdır. Belə meqaulduzun yanında ehtiyatı təmin edə biləcək müdafiəçi var.

Maksi çox keyfiyyətli ilk addıma, əla meydança görmə qabiliyyətinə və topla hərəkətə malikdir. Onun snayper keyfiyyətlərini də unutmamalıyıq. Bunun sayəsində basketbolçu hər oyunda orta hesabla ən azı 4 dəfə üçxallıq atışı dəqiq  yerinə yetirir. Böyük ehtimalla , 2024-cü ildə o, karyerasında ilk dəfə “Ulduzlar Oyunu”nda olacaq.

1. Tayriz Halibörton (İndiana)

2022/2023 mövsümünün statistikası: 20,7 xal, 3,7 ribaund, 10,4 asist.

2023/2024 mövsümündə statistika: 24,3 xal, 4,0 ribaund, 12,0 asist.

Hazırda mövsümün əsas kəşfi təbii ki, Tayriz Halibörtondur. Onun nə qədər böyük oyunçu olduğu son iki mövsümdən bilinirdi. Lakin inkişafın həddi olmadığını Tayriz bu mövsüm sübut edir. Bəziləri artıq onu Mecik Conson və Stiv Körrinin hibridi adlandırır.

Digər mühüm amil komandanın özünün nəticələrinin yaxşılaşmasıdır. Bu, Halibörtonun inkişafını daha da dəyərli edir. “Sakramento Kinqs”dən sonra o özünə rahat mühit tapıb. Sürəti, oyun baxışı və qərar vermə qabiliyyəti heyrətamizdir.

İLQAR AĞAYEV