“Estonlar üzərindəki qələbəyə görə bayram etməli deyilik”

Azərbaycan millisinin sabiq müdafiəçisi Saşa Yunisoğlunun futbolinfo.az saytına müsahibəsi

– Söhbətə yığma komandanın Avro-2024-ün seçmə mərhələsində Estoniya və Avstriyaya qarşı keçirdiyi oyunlardan başlayaq. Estonlara səfərdə qalib gəlsək (2:0) də, öz meydanımızda Avstriya ilə bacarmadıq (0:1). Avstriya ilə görüşdə də uğurlu nəticə əldə etmək üçün nə çatmadı?

– Açığı, millimizin qələbəsini nə qədər çox istəsək də, arzulasaq da, komandamızın qrupdakı oyunları Avstriya ilə matçöncəsi yaxşı nəticəyə ümid vermirdi. Düzdür, səfərdə Estoniyanı məğlub etdik və gözəl futbol oynadıq. Amma Estoniya qrupumuzdakı ən zəif komandadır. Onları da udmasaydıq, kimi udacaqdıq? Avstriya yığması Bakıya sırf nəticə dalınca gəlmişdi və vacib olan 3 xalı apardı. Biz isə yenə estonlar üzərində qələbəyə sevinirik. Əgər inkişafdan danışdığımız halda, yüksək yerlər üçün mübarizə aparmırıqsa, şəxsən mənim üçün axırdan 1-ci və ya 2-ci olmağın fərqi yoxdur. Çünki burada inkişafdan söhbət gedə bilməz. İnkişaf nəticə deməkdir.

– Millimiz gələn ay Bakıda İsveçi qəbul edəcək, ardınca Belçikanın qonağı olacaq. Bu görüşlərdən hansı nəticəni gözləyirsiniz? İsveçi məğlub edə və qrupda 3-cü yeri tuta bilərikmi?

– Yığmadan həmişə yaxşı nəticə gözləyirəm. Çünki bunu çox istəyirəm. Sonadək millimizi dəstəkləyəcəyəm. Başqa nəsə deyə bilmərəm.

– Əksər futbol mütəxəssisləri və azarkeşlər millinin baş məşqçisi Canni de Byazi ilə yolların ayrılmasını tələb edir. Onun yığmamızdakı fəaliyyətini necə dəyərləndirirsiniz? Milli komandamızı yerli məşqçiyə tapşırmaq daha doğru olmazmı?

– Təbii ki, de Byazinin qalıb-qalmamağına biz qərar vermirik. Amma subyektiv fikirlərim var. De Byazi vaxtdan, zamandan danışır. Düşünürəm ki, onun kifayət qədər vaxtı var idi. Baxın “Araz-Naxçıvan”a, Premyer Liqaya yeni çıxmasına və hazırlaşmaq üçün vaxtının olmamasına rəğmən, yeni heyətlə çempionatda fırtına yaradır. De Byazi deyir ki, gözəl futbol oynayırıq, inkişaf var. Axı oyun yaddan çıxır, tarixdə nəticə qalır. Nəticə yoxdursa, hansı inkişafdan danışmaq olar? De Byazi deyir ki, biz qələbələrə sevinə bilmirik. Mən isə estonlar üzərindəki qələbəyə görə bayram etməli olduğumuzu düşünmürəm. Əgər de Byazini Estoniyanı udmaq üçün gətiriblərsə, onda onun bu qədər sevinməyini başa düşürəm. Amma estonlara yerli məşqçi ilə də qalib gələ bilərdik.

– Çoxu millinin hazırkı heyətini son illərin ən güclüsü hesab edir. Fakt budur ki, hazırda legioner həyatı yaşayan futbolçularımızın sayı xeyli artıb. Sizin oynadığınız dövrdə isə xaricdə tək-tük həmyerlimiz çıxış edirdi və onlardan biri siz olmusunuz. Vaxtilə Polşada oynamış futbolçu kimi, hazırda legioner həyatı yaşayan milli üzvlərindən kimlərin daha da irəli getmək şansının olduğunu düşünürsünüz?

– Nə qədər çox azərbaycanlı ölkə xaricində oynasa, Azərbaycan futboluna və millisinə bir o qədər xeyirdir. Təbii ki, hamımız futbolçularımızın TOP çempionatlarda çıxış etməsini istəyirik. Amma bunun üçün zamana ehtiyac var. Yavaş-yavaş istədiyimiz kimi olacaq. Bizim vaxtımızda tək-tük legioner həyatı yaşayan futbolçularımız olsa da, Polşa, Türkiyə, Rusiya və Niderland kimi ölkələrin əsas liqalarında oynayırdılar. Hazırda xaricdə çıxış edən futbolçularımızdan Mahir, Renat və Ramili daha şanslı sayıram. Düşünürəm ki, onların daha güclü çempionatlarda oynamaq şansları var.

– Azərbaycan Premyer Liqası haqda da fikirlərinizi bilmək istərdik. Əksəriyyət cari mövsümün daha maraqlı və gərgin keçdiyini düşünür. Hansı komandalar sizi müsbət mənada təəccübləndirir?

– Həqiqətən də bu il çempionat çox maraqlı keçir. Turnir cədvəlinin yuxarı pillələrində yeni adları görürük. Məhz bu məqam Premyer Liqanı daha da maraqlı edir. Oyunlarda gərgin və əzmkar mübarizələrə şahidlik edirik. Məni yaxşı mənada təəccübləndirən iki komanda var: “Araz-Naxçıvan” və “Səbail”. “Araz-Naxçıvan”ı xüsusi vurğulayardım. Çünki Azər Bağırovun komandası çempionatın startına 3 həftə qalmış yığılıb. O qədər də çox büdcəsi olmayan komandadır, normal toplanış keçirməyib. Nəzərə alaq ki, komanda sıfırdan yığılanda yeni oyunçular bir-bir heyətə qoşulurlar. Bundan əlavə, “Araz-Naxçıvan” öz evindən uzaqda oynayır. Bütün bunlara baxmayaraq, hazırda turnir cədvəlində 4-cü yerdədir və hamı ilə layiqli mübarizə aparır. İndidən görünür ki, ilk “3-lük” uğrunda “Qarabağ”, “Zirə”, “Araz-Naxçıvan” və “Səbail” arasında maraqlı mübarizə gedəcək. Yüz faiz əminəm ki, “Sabah” da tezliklə bu 4 komandaya qoşularaq, çempionluq uğrunda mübarizə aparacaq.

– Hazırda Azərbaycan çempionatında çıxış edən müdafiəçilərdən kimlərin oyununu bəyənirsiniz?

– Düşünürəm ki, hazırda çempionatımızın ən yaxşı müdafiəçisi Kevin Medinadır. Çox ağıllı, soyuqqanlı və etibarlı oyunçudur, “Qarabağ”ın dirəyidir. Onunla yanaşı, Bəhlul Mustafazadəni qeyd etmək istəyirəm. Son vaxtlar yüksək sürətlə inkişaf edir. Medina ilə bir komandada çıxış etməsi Bəhlulun inkişafında böyük rol oynayır. Bir də “Araz-Naxçıvan”ın müdafiəçisi Abdulla Rzayevin adını çəkməliyəm. Çox perspektivli, gənc müdafiəçidir. Düşünürəm ki, yaxın gələcəkdə ölkəmizin əsas müdafiəçilərindən birinə çevriləcək.

AĞA