Müsahibə
“Etirazım məşqçiyə deyildi, özümə əsəbiləşmişdim” – Kvirkveliya
“Neftçi”nin müdafiəçisi Solomon Kvirkveliyanın futbolinfo.az saytına müsahibəsi
- “Turan Tovuz”a niyə qalib gələ bilmədiniz?
- Nə deyə bilərəm ki? Hamı gördü ki, oyun bir qapıya gedirdi. Sadəcə olaraq, qolumuzu vura bilmədik. Futboldur da, olur belə anlar. Belə oyunlar olur. Rəqibdən üstün idik, demək olar ki, bir qapıya oynadıq. İkinci hissədə isə “Turan Tovuz”un futbolçuları hər kontaktdan 5 dəqiqə yerdə uzanırdılar. Amma bunu da anlayırıq, futboldur. Qol imkanlarımız çox idi, sadəcə, vura bilmədik.
- Öz oyununuzdan razı qaldınız? Çünki azarkeşlər oyununuzdan və nəticədən narazı idilər…
- Bilmirəm nə deyim. Komanda üç xalı qazanmırsa, fanatlar narazı qalmaqda haqlıdı. Biz qalib gəlmək üçün mübarizə apardıq, əlimizdən gələni etdik. Amma təəssüf ki, qol vurmaq alınmadı.
- Rusiyada “Rubin”, “Lokomotiv” kimi yaxşı klublarda oynamısınız. İndi isə Azərbaycanda çıxış edirsiniz. Rusiya və Azərbaycan Premyer Liqasını necə müqayisə edərdiniz?
- Azərbaycan çempionatının səviyyəsi yaxşıdı. Yaxşı futbolçular var. 4-5 komanda var ki, səviyyəsi yaxşıdı və onlara qarşı oynamaq heç də asan deyil, xal qazanmaq asan deyil. Ümumilikdə isə, Rusiya və Azərbaycan Premyer Liqasını müqayisə etmək, çətindi. Amma belə, Azərbaycan çempionatı normal səviyyədədi.
- İki il əvvəl “Neftçi” çempion olsa da, uzun illərdir ki, Azərbaycanda “Qarabağ”ın hegemonluğu hökm sürür. Onlara qarşı çempionluq mübarizəsi aparmaq çox çətindi?
- Mövsümün sonunda xalları sayıb, baxacağıq. Hansı komandanın neçə xalı olduğunu görəcəyik. Təkcə “Qarabağ”la deyil, digər klublarla da mübarizə aparmaq çətindi. Çempionat çətindi və digər komandalarla mübarizə aparmaq da asan deyil. Məncə, “Qarabağ” da xallar itirəcək.
- Komandaya yeni gələndə əsas heyətin üzvünə çevrildiniz. Amma son vaxtlar daim “onbirlik”də meydana çıxmırsınız. Nə baş verdi ki, əsas heyətdə oyuna çıxmırsız?
- Mən Gürcüstan millisinin düşərgəsindəydim, komandamız isə iki həftə məşq etmişdi. Bütün bunlara baş məşqçimiz qərar verir. Mən bu barədə bir söz deyə bilmərəm. Laurentsiu Regekampfa çox hörmətlə yanaşıram. Onunla münasibətimiz də əladı, heç bir konfliktimiz yoxdu.
- “Turan Tovuz”la matçda əvəzləndiyiniz zaman narazı idiniz. Bəs, bu, baş məşqçiyə etiraz deyildi?
- Xeyr, mən özümə əsəbiləşmişdim. Heç kimə qarşı da əsəbiləşməmişdim, yalnız özümə qarşı idi bu. Komanda qol vura bilməmişdi deyə, emosional idim. Heç kimə qarşı heç nə etməmişdim. Sadəcə, özümdən incimişdim.
- Baş məşqçi ilə heç bir probleminiz yoxdu?
- Yox, nə danışırsınız? Onunla aramızda heç bir konflikt yoxdu, Regekampfa böyük hörmətim var. O, şəxsən özü mənim “Neftçi”yə gəlməyimi istəmişdi. Son vaxtlar komandasız idim, “Rege” isə “Neftçi”yə gəlməyimi istəmişdi. Buna görə ona təşəkkürümü bildirirəm. Heç bir konfliktimiz yoxdu.
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub
- Ölkə futbolu2024-04-26 08:00
Juninyo – Avropanın ən yaxşı braziliyalısı