Digər idman növləri
Ferstappenin ardıcıl 8-ci, “Red Bull”un 13-cü qələbəsi
Formula 1 üzrə dünya çempionatının növbəti mərhələsi Belçikada keçirilib. Sprint formatlı həftə əsas yarışla yekunlaşıb.
Cümə günü keçirilən təsnifat mərhələsindən sonra ən yaxşı nəticə göstərməsinə baxmayaraq, Maks Ferstappen 5 yer cərimə aldığına görə yarışa 6-cı sıradan start verib. İlk cərgəni isə Şarl Leklerlə Serxio Peres tutublar.
Cümə və şənbə günü ilə müqayisədə hava bazar günü aydın və günəşli olub. Start verilən kimi “Red Bull” sürücüsü Serxio Peres monakolu Şarl Lekleri üstələyərək lider olub. Arxada isə Karlos Saynsla Oskar Piastri arasında təmas yaşanıb. “Ferrari” sürücüsü iki “Maklaren”in arasında qalarkən maşınını zədələyib. Oskar Piastrinin də maşınında problem yaranıb və nəticədə avstraliyalı sürücü yarışı dayandırmaq məcburiyyətində qalıb. Ondan fərqli olaraq Sayns yarışın sonuna qədər mübarizəni daavm etdirib. Amma sürət itkisi yarışı davam etdirməyin mənasız olduğundan xəbər verib. Nəticədə o da boksa yollanıb. Ön sıralarda isə Ferstappen tədricən irəliləyərək komanda yoldaşına çatıb. Onu da yarışın ortalarında əziyyət çəkməyərək ötdükdən sonra finişə qədər təkbaşına gedib.
22-ci dövrədə tras üzərində yağış yağmağa başlayıb. Lakin son günlərdən fərqli olaraq möhkəm olmadığına görə yarışa təsir etməyib. Trassın çox hissəsində isə ümumiyyətlə damcılar olmayıb. Beləliklə, yarışın ikinci hissəsində gözlənilməz hadisələr yaşanmayıb və Maks Ferstappen karyerasında 44-cü qələbəsini qazanıb. Bu, onun ardıcıl 8-ci qələbəsidir.
“Red Bull” komandası isə ardıcıl 13-cü qələbəsini qazanaraq Formula 1 tarixinin rekordunu bir qədər də yaxşılaşdırıb. İkinci yer Avstriya komandasının meksikalı sürücüsü Serxio Peresə qismət olub. Podiumun son pilləsində isə “Ferrari”dən Lekler qərarlaşıb. 4-cü yeri tutan Lüis Həmilton sürətli dövrəyə imza atdığına görə əlavə 1 xal da qazanıb.
Belçika qran-prisindən sonra Ferstappen 2-ci yerdə qərarlaşan Serxio Pereslə fərqi bir qədər də artırıb. Hazırda nidelandlı sürücünün 314 xalı var, Peres 189 xal toplayıb. 3-cü yerdə Fernando Alonsodur. Dünən ad gününü qeyd edən ispan sürücünün aktivində 149 xal var. Son vaxtlar uğursuz çıxış səbəbindən Alonsoya arxadan Lüis Həmilton çatmaqdadır. İngiltərəli sürücü 148 xal toplayıb.
Komandaların yarışında “Red Bull” 503 xalla liderdir. İkinci yerdə qərarlaşan “Mercedes”in 247 xalı var. 3-cü yerdə olan “Aston Martin” 196 xala malikdir.
Əlavə edək ki, bu yarışdan sonra çempionat yay fasiləsinə yollanır. Növbəti mərhələ 4 həftə sonra Niderlandda keçiriləcək.
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Ölkə futbolu2024-05-03 14:00
“Neftçi”nin riskli seçimi: lazımsız legionerlə 4 illik müqavilə bağlayırlar
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq