“Gent”in futbolçuları “Qarabağ”la matç haqda

Avropa Konfrans Liqasının pley-off mərhələsi çərçivəsində “Qarabağ”ın qonağı olacaq Belçikanın “Gent” komandasının futbolçuları – Uqo Kuyperslə Maykl Nqadye-Nqadyui bu oyun öncəsi fikirlərini bölüşüblər.

Futbolinfo.az xəbər verir ki, Kuypers hazırda bütün diqqətlərini bu oyuna yönəltdiklərini söyləyib.

26 yaşlı hücumçu növbəti mərhələyə yüksəlmək istədiklərini bildirib: “Hazırda bütün diqqətimizi “Qarabağ”la matça yönəltmişik. Mümkün qədər irəli getmək niyyətindəyik. Bir az şablon səslənir, ancaq bunu oyundan-oyuna, mərhələdən-mərhələyə edəcəyik. Ölkə çempionatındakı son qarşılaşma avrokuboklarda mümkün olan ən yaxşı nəticəni əldə edə biləcəyimizə ümid verdi”.

Kamerun millisinin də üzvü olan 33 yaşlı mərkəz müdafiəçisi isə Azərbaycan klubunun topla oynamaq bacarığının yüksək olduğunu söyləyib: “Qarabağ” barədə çox şey bilmirəm. Bilirəm ki, rəqibimiz hər il avrokuboklarda oynamağa öyrəşmiş komandadır. Onların çox yaxşı futbolçuları var. Əvvəlki matçlarından 2-3 maraqlı videotəkrara baxmışam. Çox sayda braziliyalıları var və topla yaxşı rəftar edirlər”.

Qeyd edək ki, fevralın 16-da Tofiq Bəhramov adına Respublika stadionunda keçiriləcək “Qarabağ” – “Gent” oyunu saat 21:45-də start götürəcək.