Müsahibə
“Hər matça axırıncı oyun kimi çıxmalıyıq”
“Kəpəz” klubunun hücumçusu Amil Yunanovun futbolinfo.az saytına müsahibəsi
– Ölkə çempionatının 24-cü turunda “Qəbələ” üzərində vacib qələbə (2:1) qazandınız. Oyunla bağlı fikirləriniz necədir?
– Dediyiniz kimi, bizim üçün çox vacib oyun idi. Allaha şükürlər olsun, qələbə qazandıq. Çox çətin və maraqlı görüş keçdi. Qalib gəldiyimiz üçün sevincliyik. Amma bununla kifayətlənmək olmaz, qarşıdakı matçlara hazırlaşmaq lazımdır.
– “Kəpəz”ə 3 xal qazandıran qola siz imza atdınız. Sabiq komandanızla oyunda qələbə qolunu vurmaq necə hissdir?
– Qələbə qolunu vurduğum üçün şadam. Qollar vurub komandama kömək etmək istəyirəm. İstər “Qəbələ”, istərsə də başqa komanda ilə oyunda fərqlənmək mənim üçün eyni hissdir. Əsas odur ki, “Kəpəz”ə köməyim dəysin.
– Bu qələbədən və “Qəbələ” ilə aranızdakı xal fərqinin 8-ə çatmasından sonra “Kəpəz”in Premyer Liqadakı yerini qoruya biləcəyini əminliklə söyləmək olar, yoxsa bunun üçün hələ tezdir?
– Xeyr, bu barədə düşünmək üçün hələ tezdir. Qarşıda 12 tur var, hər şey ola bilər. Hər matça axırıncı oyun kimi çıxmalıyıq.
– “Kəpəz”ə məğlubiyyətdən sonra Elmar Baxşıyev “Qəbələ”nin baş məşqçisi postundan ayrıldı və yerinə Kaxaber Sxadadze gətirildi. Bu təyinatdan sonra “Qəbələ”nin yüksəlişə keçəcəyinə dair qorxunuz varmı?
– Sxadadze yaxşı məşqçidir, əvvəl də Azərbaycanda işləyib. Yeni məşqçi gələndən sonra komandaların oyunlarında həmişə dəyişiklik baş verir. Əlbəttə ki, bizə çətin olacaq. Amma “Qəbələ” haqda düşünməkdənsə, öz oyunlarımıza baxmalıyıq.
– Növbəti oyununuz “Sumqayıt”a qarşı olacaq. Səfərdən sərfəli nəticə ilə qayıda biləcəksiniz?
– Bu görüşdə də qələbə qazanmaq istəyirik. Bunun üçün əlimizdən gələni edəcəyik. Ancaq “Sumqayıt” da yaxşı komandadır. Necə olacağını görəcəyik.
– “Kəpəz”lə icarə müqaviləniz mövsümün sonuna kimidir. Komanda Premyer Liqada qalsa, Gəncə klubu ilə sözləşmənizi yeniləyəcəksiniz?
– Bu barədə hələ danışmaq istəmirəm. Məni düşündürən qarşıdakı oyunlardır. Hər şey dəqiqləşəndən sonra bu barədə danışmaq olar.
– Adil Şükürovun gəlişindən sonra “Kəpəz”dəki inkişaf göz önündədir, futbolçular ondan razılıqlarını dilə gətirirlər. Şükürovun rəhbərliyi altında Gəncə təmsilçisi bir müddətdən sonra iddialı komandaya çevrilə bilər?
– Həqiqətən də, Adil müəllim yaxşı insan və məşqçidir. “Kəpəz”in kollektivi də xoş sözlərə layiqdir. İnanın ki, komanda turnir cədvəlinin son pillələrində olmağa layiq deyil. Mən bunu “Kəpəz”ə gələndən sonra gördüm. Fərdi baxımdan çox yaxşı futbolçularımız var. Komanda olaraq da yaxşı oyun sərgiləyirik. İnanıram ki, “Kəpəz” bu il liqada qalsa, Adil müəllim gələn mövsüm iddialı komanda quracaq. Onda azarkeşlər daha yaxşı yerlərdə olan “Kəpəz” görəcəklər.
ABBAS