Hakimlər Komitəsi üçün müvəqqəti seçim günü: Barış Şimşək, yoxsa yerli mütəxəssis?

AFFA İcraiyyə Komitəsinin (İK) bugünkü iclasında müzakirə olunacaq ən əsas məsələ Hakimlər Komitəsinin vakant olan sədr postuyla bağlıdı. Qurum üzvləri öncə dilemmanı çözməli, əcnəbiyə, yoxsa yerli mütəxəssisə güvəniləcəyini dəqiqləşdirməlidi.

Frits Suxlikin təyinatı zamanı müzakirələrə ehtiyac duyulmamışdı, baş katib Elxan Məmmədov ssenarini cızmış, avstriyalını Bakıya gətirtmiş və təyinatını təsdiqlətdirmişdi. İndi isə durum fərqlidi, AFFA-nın özündə islahatların an məsələsi olduğu bir vaxtda kiminsə uzunmüddətli sədr təyin edilməsi mümkünsüzdü. Hətta Hakimlər Komitəsi kiməsə tapşırılacaqsa da, bu, müvəqqəti xarakter daşıyacaq.

Futbol təsərrüfatında çoxlarına bəllidi ki, sentyabrda AFFA-da təmizləmə işləri başlayacaq. Hamı Canni de Byazinin millinin baş məşqçi postunda son 2 oyunu yola verməsini gözləyir. Ardınca ciddi dəyişikliklər olacaq, rəhbərlik dəyişəcək, köhnələrin fəaliyyətinə son qoyulacaq. Bu səbəbdən uzunmüddətli müqavilələr mümkün deyil, yenilər gələnə kimi müvəqqəti idarəçilər təyin oluna bilər.

Təsadüfi deyil, Stuxliklə müqavilənin uzadılmayacağı bəlli olan kimi, AFFA onu italiyalı ilə əvəz etmək istədi. Amma bu plana pərdə arxasında qadağa qoyuldu və gizli anlaşma ləğv edildi. İndi mənzərə bir az da aydınlaşıb – hazırkı AFFA rəhbərliyinin özbaşına addım atması, ciddi qərarlar verməsi mümkünsüzdü, hamı günlərini sayır.

Bununla belə, yeni mövsüm başlayır və Hakimlər Komitəsinə müvəqqəti də olsa sədr seçilməli, işlərin icrası kiməsə tapşırılmalıdı. İcraiyyə Komitəsinin bugünkü iclasında məhz bu məsələ müzakirə olunacaq.

Əldə etdiyimiz bilgiyə görə, Hakimlər Komitəsiylə bağlı 2 plan var. Qarşıdakı 2-3 ay üçün qurumun idarəçiliyi ya hansısa yerli, ya da türkiyəli mütəxəssisə tapşırılacaq. Yerli namizədlərlə bağlı dəqiq siyahımız yoxdu, amma Türkiyədən Barış Şimşəkin müvəqqəti olaraq vəzifə başına gətirilməsi mümkündü. Bu şəxs zatən Azərbaycandadı, VAR-la bağlı seminarlar keçir. AFFA vəziyyətdən çıxmaq üçün müvəqqəti olaraq işləri ona tapşırmaq istəyir.

Türkiyəli beynəlxalq dərəcəli hakim özü də müvəqqəti təyinata razıdı. O, qısa müddətdə ümidi doğruldacağına və sentyabrda sədr kimi təsdiqlənəcəyinə inanır. Amma öncə məsələ bugünkü iclasda müzakirə olunmalıdı.

ABBAS