Heç vaxt yenmədiyimiz rəqiblərlə bir qrupda: yalnız estonları Gəncədə məğlub etmişik

Püşk atıldı və bəlli oldu ki, milli komandamız Avropa çempionatının seçmə mərhələsinin F qrupunda Belçika, Avstriya, İsveç və Estoniya yığmaları ilə üz-üzə gələcək. Göründüyü kimi, komandamızın bu qrupdan final mərhələsinə çıxmaq şansı minimuma bərabərdir. Təbii ki, futbol sürprizlərlə zəngin oyundur. Amma sürpriz edənlərin belə nəsə etməyə potensialı var. Canni de Byazinin komandasına isə ümid etməyə dəyməz.

Estoniyanı istisna etsək, qrupda qarşılaşacağımız digər 3 komandanın həndəvərində də dayana bilmərik. Necə də olmasa, Belçika, Avstriya və İsveç komandaları son Avropa çempionatının iştirakçısı olub. Təbii ki, bu qrupda mübarizə aparacaq 5 komandadan yalnız Belçikanın qarşıdakı dünya çempionatında iştirak edəcəyini nəzərə alsaq, saxta təsəllimiz ola bilər. Amma istənilən halda, buna görə ruhlanmaq özümüzü aldatmaqdan başqa bir şey deyil.

Əlbəttə, daha münasib qrupda düşə bilərdik. Lakin hətta ən münasib rəqiblərlə dueldən qalib ayrılmaq şansımız çox az olardı. Böyük hədəf üçün özün güclü olmalısan. Milli meydana çıxacaqsa, deməli, oynamağa və qələbə üçün döyüşməyə borcludur. Bəs görəsən, rəqiblərimiz hazırda hansı vəziyyətdədir?

Qrupda təqdimata ehtiyacı olmayan yeganə komanda Belçika millisidir. Son 5 böyük turnirə vəsiqə qazanan “qırmızı iblislər” final mərhələsində oynamaqla kifayətlənməyib, həm də pley-offa vəsiqə qazanır. Zarafat deyil, biz son dünya çempionatının bürünc mükafatçısından danışırıq.

Belçika millisinin heyətinə gəlincə, bu komandada Tibo Kurtua kimi qapıçı, Kevin de Bruyne kimi yarımmüdafiəçi və Romelu Lukaku kimi hücumçu top qovur. Doğrudur,  bu komandanın “qızıl nəsli” artıq qürub çağını yaşayır. Yəni, yeni nəsildən hələ ki, parlaq oyunçu yetişdirməyiblər. Yalnız “Milan”ın “Brügge”dən yeni transferi Şarl de Ketelarenin adını çəkmək olar. O da ki, hələ “çiydir”.

Qrupun digər təhlükəli komandası İsveç yığmasıdır. Doğrudur, İsveçə qədər 2-ci səbətdən Avstriya yığması çıxdı. Amma isveçlilərin Qətərdə keçirilən dünya çempionatına vəsiqə qazana bilməməsi və son Millətlər Liqasında uğursuz çıxışı bu komandanın reytinqdə geriləməsinə səbəb oldu. Potensiala görə isə skandinaviyalıların mərkəzi avropalılardan daha üstün olduğunu heç kim inkar edə bilməz.  İsveç millisi son 6 Avropa çempionatının hamısında iştirak edib.

Heyət məsələsində İsveç yığması son illər İbrahimoviç kimi oyunçuları üzə çıxarması ilə öyünə bilmir. Amma “Nyukasl”da oynayan Aleksander İsakla “Tottenhem”də çıxış edən Deyan Kuluşevski hazırda millinin vuran ayağına çevrilib.

Avstriya millisinə gəlincə, bu komanda yalnız son iki Avropa çempionatında iştirak edib. Sonuncu dəfə avstriyalılar dünya çempionatının qrup mərhələsində 1998-ci ildə görünüb. Əsasən Almaniya bundesliqasının ortabab komandalarında oynayan “vundertim”in üzvləri dünya ulduzu sayılmasa da, potensialları göz önündədir. Əsas ulduzları “Bayern”də çıxış edən Marsel Sabitzerlə “Bolonya”nın hücumçusu Marko Arnautoviçdir.

Bu qrupda dizimizə uyğun yeganə rəqib Estoniyadır. Təbii ki, Baltikyanı ölkənin millisi də bizim kimi indiyə qədər heç bir turnirdə iştirak etməyib. Amma bu komanda AÇ-2012-nin seçmə mərhələsində ikinci yeri tuta bilmişdi. Sadəcə, pley-offda onların qarşısını İrlandiya yığması kəsmiş və nəticədə komanda tarixi şansı qaçırmışdı.

Estonların hazırkı heyətində də adlı-sanlı oyunçu axtarmaq mənasızdır. Amma Norveçin “Budo Qlimt” klubunda Mattias Kyayt və İsveç “Helsinborq”unda Vladislav Kreyda kimi yarımmüdafiəçiləri var. Hücumda isə Niderland “Venlo”sunun üzvü Erik Sorqa və Çexiyanın “Karvina” komandasından Vlasiy Sinyavski top qovur. Əksər oyunçular Estoniya çempionatında oynayır.

Əlbəttə, indidən bu komandaları tam təhlil etmək doğru olmazdı. Gələn il seçmə mərhələ start götürənə qədər məşqçilər dəyişə və heyətdə də müəyyən yeniliklər həyata keçə bilər. Oyunlar ərəfəsində hər rəqibi ayrıca təhlil edəcəyik. Hələliksə, millimizin bu komandalarla tarixi rəqabətinə nəzər salaq.

Azərbaycan rəqibləri ilə…

Azərbaycan – Belçika

11.11.2006. Brüssel. AÇ, seçmə mərhələ. Belçika – Azərbaycan 3:0

21.11.2007. Bakı. AÇ, seçmə mərhələ. Azərbaycan – Belçika 0:1

29.03.2011. Brüssel. AÇ, seçmə mərhələ. Belçika – Azərbaycan 4:1

02.09.2011. Bakı. AÇ, seçmə mərhələ. Azərbaycan – Belçika 1:1

Azərbaycan – Avstriya

08.09.2004. Vyana. DÇ, seçmə mərhələ. Avstriya – Azərbaycan 2:0

07.08.2005. Bakı. DÇ, seçmə mərhələ. Azərbaycan – Avstriya 0:0

08.10.2010. Vyana. AÇ, seçmə mərhələ. Avstriya – Azərbaycan 3:0

07.11.2011. Bakı. AÇ, seçmə mərhələ. Azərbaycan – Avstriya 1:4

Azərbaycan – İsveç

02.09.2000. Bakı. DÇ, seçmə mərhələ. Azərbaycan – İsveç 0:1

07.10.2001. Stokholm. DÇ, seçmə mərhələ. İsveç – Azərbaycan 3:0

Azərbaycan – Estoniya

15.02.1996. Larnaka. Yoldaşlıq oyunu. Estoniya – Azərbaycan 0:0

01.03.1997. Larnaka. Yoldaşlıq oyunu. Azərbaycan – Estoniya 0:2

04.06.1997. Vilyandi. Yoldaşlıq oyunu. Estoniya – Azərbaycan 1:0

16.05.1998. Vilyandi. Yoldaşlıq oyunu. Estoniya – Azərbaycan 0:0

28.11.1998. Gəncə. Yoldaşlıq oyunu. Azərbaycan – Estoniya 2:1

06.03.1999. Larnaka. Yoldaşlıq oyunu. Azərbaycan – Estoniya 2:2

03.07.2002. Kuressaare. Yoldaşlıq oyunu. Estoniya – Azərbaycan 0:0

15.11.2013. Tallin. Yoldaşlıq oyunu. Estoniya – Azərbaycan 2:1

FƏRİD