Ölkə futbolu
İp üstündə Avropa yolçuluğu
O bir zərbəni “Qarabağ”ın yox, “Gent”in futbolçusu da qapıçının üzərinə vura, növbəti mərhələyə Azərbaycan təmsilçisi keçə bilərdi. Belə olsa, yeni tarix yazılacaq, reallıq unudulacaqdı. Reallıq isə odur ki, çempionumuz avrokubok mövsümün yaz hissəsinə hazır deyildi.
Səbəbləri soyuq başla analiz etmək lazımdır. Necə ki, “Qarabağ” rəhbərliyinin bunun üçün kifayət qədər vaxtı var idi. Amma doğru addımlar atılmadı. Bəli, transferlər edildi, say artırıldı… Təəssüf ki, yalnız say artırıldı. Keyfiyyət baxımından eyni sözləri deyə bilməyəcəyik. Lazım olan mövqelərə nöqtə transferlər edilməyincə məyusluq qaçılmazdır. Daim qol gözlənilən hücumçun, gedənin yerini dolduran futbolçun yoxdursa, aqibətlə barışmalısan.
“Qarabağ” illərdir mövsümləri avrokuboklardan qazandığı pullarla yola verir. Klubun sponsorları müəyyən maliyyə ayırır, amma qruplara düşmək mümkün olmasaydı, çətin ki, komanda əzəmətini saxlayardı. Bu il isə sanki “Azərsun” rəhbərliyi tam qənaət rejiminə keçdi, futbolçu satışından 7 milyon avro əldə edildi, əvəzində yalnız yarım milyonluq Redon Cica alındı. Adama Diakabi və Yassin Benzianın adı gurultulu səslənə bilər, onların azad agent kimi gəldiyini unutmamalıyıq.
6,5 milyon avronun üstünə qrupa vəsiqəyə görə qazanılan pulu da gəlsək, “Qarabağ” rəhbərliyi faktiki olaraq, gəlirə işlədi, onlara yaradılan geniş güzəştlərin qarşılığında komandanı böyütmək üçün iş görmədi. Halbuki aylardı futbol oynamayan fransalılardansa futbol oynayan, ciddi pul ödənilib gətirilən 1-2 oyunçu ilə daha böyük işlər görmək olardı. Konfrans Liqasında rəqiblər münasib idi, “Qarabağ”ın göstərdiyi futbolla daha çoxuna ümid etmək mümkün idi.
Tahir Gözəl finallardan dəm vurarkən yalnız Qurban Qurbanovun əlində sehrli çubuq tutmasına ümid etdi. Başqalarının çynində zəfər yürüşü isə alınmadı, rəhbərlik əlini daşın altına qoymadığından, indi “Gent”ə məğlubiyyətin üzüntüsünü yaşayırıq.
Yeni transferlər bu gün bərbad təsir bağışlayır. Ola bilsin, zamanla onlar da Kadi Borges kimi, sıradan oyunçudan ulduza çevriləcək. Amma o zaman artıq başqa problemlər başlayacaq, yeni səhifə açmaq lazım gələcək. Doğrusu, braziliyalıdan fərqli olaraq, bu doymuş futbolçuların fövqəladə nələrsə edəcəyinə də inanmıram.
“Qarabağ” ip üstündə gəzən kəndirbaza bənzəyirdi. Komandanın ruhuna uyğun olmayan və hələ necə olacaqları bilinməyən 3 transfer, topa hər çıxışı ürək ağrıdan qapıçı, güvən verməyən hücum xətti – bu reallıqla penaltilər seriyasına kimi getmək özü möcüzə idi.
Təbii ki, “Qarabağ”ın indiyə qədər etdiklərini unudub yalnız tənqidə köklənmək ədalətsilzik olar. Mirça Rednik, Kaxaber Tsxadadze, Con Toşak, Roberto Bordin, Vunfred Şefer və daha neçə əcnəbi məşqçinin yağ-bal içində üzdüyü vaxt qruplara həsrət qaldığını, bir mərhələ keçməyi qəhrəmanlıq kimi göstərmək istədiyi zamanları xatırlayanda Qurban Qurbanovu qınamaq doğru görünmür. Halbuki bu şəxs avrokubokun startındaca mübarizəni bitirən Laurentsiu Regekampfla müqayisədə daha çox tənqid olunur, digərlərinə isə hətta az qala tərif deyilir.
Amma uman yerdən küsərlər, Qurbanov illərdi hamını qələbələrə,ən əsası, yaxşı futbola öyrədib. Dünən isə “Qarabağ” ın sərgilədiyi futbol deyildi. Bəli, meydanda mübarizə var idi, lakin lazımi keyfiyyəti təmin etmək mümkün olmadı. Çünki heyət düzgün komplektləşməyib.
O da var ki, bu heyət yarı güclə Azərbaycan çempionu olacaq, bir ildən çoxdur məğlubiyyət görmür, mövsümü məğlubiyyətsiz davam etdirir. Rəqabətsizliyin gətirdiyi arxayınlıq Avropada fərqi üzə çıxaranda isə vəziyyəti dəyişmək olmur. Bu baxımdan Belçikadakı yenilginin səbəbkarları həm də digər klublarımızdır. Həmin klublar ki, avrokuboka vəsiqə üçün çalışır, yay gələn kimi isə düşəcək ilk rəqiblərin gücünü şişirtmək üçün bəhanə axtaracaqlar.
Ölkə futbolunun inkişafını istəyiriksə, məsələyə kompleks yanaşmalıyıq. Milli komandanın, çempionatın, digər klubların səviyyəsi artmayınca arzularımız reallığa çevrilməyəcək. “Qarabağ” çoxillik sabitliyin və məşqçi bacarığının hesabına birtəhər qruplara yüksələcək, amma daha çoxunu bacarmaq mümkün olmayacaq.
CAVAD