Ölkə futbolu
“Kəpəz” başladı: məşqçi də razıdır, yeni transfer də
Misli Premyer Liqasının bir sıra klubları kimi “Kəpəz” də təlim-məşq toplanışını ölkə daxilində keçməyə qərar verib. Komandanın ilk məşqi əsasən bərpaedici xarakter daşıyıb. Yüngül qaçışla başlayan məşq prosesi toplu və topsuz çalışmalardan ibarət olub.
Baş məşqçi Adil Şükürov hazırlığın gedişindən razıdır: “Komandamız bugündən məşqlərə başlayır və hər şey öz qaydasındadır. Futbolçuların hamısı düşərgəyə yaxşı dincələrək gəliblər. Gəncədə məşqərə başlamışıq və təlim-məşq toplanışını da burada keçəcəyik. Bunun üçün də bütün imkanlarımız, bütün şəraitimiz var. Klub rəhbərliyi də sağ olsun, əllərindən gələn bütün imkanlardan istifadə edirlər ki, komanda yaxşı vəziyyətdə çempionat oyunlarına hazırlaşsın. Ümumi atmosfer olaraq komandada hər şey qaydasındadır”.
İlk məşqdə komandanın heyətinə yeni cəlb olunan Amil Yunanov da iştirak edib. Çempionatın ilk iki dövrəsini “Səbail”in heyətində oynayan 30 yaşlı hücumçu mövsümü “Kəpəz”in sıralarında başa vuracaq. Onunla 5 aylıq icarə müqaviləsi bağlanıb.
Yunanov da keçidindən məmnundur: “Kəpəz” köklü klubdur, tarixi böyükdür. Bu kluba gəldiyim üçün xoşbəxtəm. Bilirəm ki, Gəncədə futbolu çox sevirlər. Mən də çalışacam ki, əlimdən gələn ən yaxşısını edim, komandaya faydam olsun, köməyim dəysin. Adil müəllim mənə təklif etdi ki, səni klubumuzda görmək istəyirəm. Mən də öz köhnə klubumla danışdım. Düşündüm ki, mənim üçün gözəl variantlardan biridir. Əlimdən gələnin ən yaxşısını etməyə çalışacam”.
Hazırlıq prosesi çərçivəsində “Kəpəz” iki yoxlama oyununda qüvvəsini sınayacaq. Bunlardan biri yanvarın 10-da “Qəbələ” ilə səfər matçıdır. “Araz-Naxçıvan” ilə nəzərdə tutulan görüş isə klublar arasında matçın məkanı ilə bağlı razılıq əldə olunmadığından ləğv edilib. Əvəzində Gəncə klubu 1-ci divizionda çıxış edən “İmişli” ilə anlaşıb. Qarşılaşma yanvarın 15-də Gəncədə reallaşacaq.
“Kəpəz” Premyer Liqanın ilk yarısında 3 qələbə, 5 heç-heçə və 10 məğlubiyyətlə aktivindəki 14 xalla turnir cədvəlinin 9-cu pilləsində qərarlaşıb.
BƏHRUZ MUSAYEV, GƏNCƏ