“Kəpəz”də problem bitmir: “mühasib” Axundovun özfəaliyyətinin üstü açıldı

“Kəpəz”də klubdaxili ab-hava qaydasında deyil. Baş məşqçi Tərlan Əhmədovun heyətdən uzaqlaşdırmaq istədiyi futbolçularla münasibətləri yenə gərginləşib.

Futbolinfo.az xəbər verir ki, Gəncə klubuna təyinat aldığı ilk günlərdə Rauf Əliyevi əvəzedici heyətə göndərən Əhmədov daha sonra Əli Səmədov və Elvin Yunuszadə barədə eyni qərarı verdi. İndi də Əfran İsmayılovla bağlı problem yaşanır.

Tərlan bəy bu oyunçuları yola salıb yeni transferlər etmək istəyir. O, sözügedən futboçuların yaşını bəhanə etsə də, əslində, səbəbi çoxdan yazmışıq. Belə ki, Əhmədovun xüsusilə Əliyev, Yunuszadə və İsmayılovla illərdi münasibəti pisdir. Fərqli komandalarda fərqli problemlər yaşayan bu insanların bir yerdə işləməyəcəyi gözlənilirdi. Hələ təyinat vaxtı yazdığımız proqnoz mövsüm yarılanmamış reallaşdı.

Amma indi bıçaq sümüyə dayanıb. “Kəpəz” yeni transferlər etmək üçün bu futbolçuları yola salmalıdı. Həm büdcəyə qənaət etmək, həm də heyətdə yer açmaq üçün başqa çıxış yolu yoxdur. Lakin sözügedən oyunçular inada düşüb və müqaviləni pozmaq istəmirlər. Onlar güzəştə getmir və əvəzedici heyətdə oynamaqla maaş almağa davam etmək niyyətindədirlər.

Futbolçular haqlıdır, bəlkə də onlara normal münasibət göstərilsəydi, güzəştə gedərdilər. Lakin baş məşqçi elə davranıb ki, indi xahiş etməyə, ortaq məxrəcə gəlməyə imkan yoxdur. Klub rəhbərliyinin müdaxiləsi də heç nəyi dəyişmir, Əhmədovun hərəkətlərinə görə “dördlük” sözü bir yerə qoyub.

Hazırda Gəncədə məşq edən yeni braziliyalı legioner, komandayla çoxdan anlaşan, lakin sənəd məsələləri üzündən yanvarı gözləyən xorvat qapıçı və başqaları “Kəpəz”lə müqavilə bağlamalıdı. Büdcədə əlavə pul olmadığından, bu transferlərin reallaşması Əhmədovun üstündən xətt çəkdiyi oyunçuların gedişinə bağlıdır.

Dəfələrlə Tərlan bəyin yaxşı məşqçi olduğunu, lakin intriqalara meylli olduğu üçün özünə problem yaratdığını, bunun da inkişafına mane olmduğunu yazmışıq. Təəssüf ki, Əhmədov özünü dəyişə bilməyib və eyni “üslub”da davam edir. Belədə “Kəpəz”də gördüyü yaxşı işlər də kölgədə qalır. Bəli, İsmayılov, Yunuszadə və Əliyevin yaşı keçib, onların Gəncə klubuna götürülməsi zatən səhv qərar idi. Amma onları daha hörmətlə yola salmaq olardı, o zaman məsələ bu həddə çatmazdı. “Burda mənəm Bağdadda kor xəlifə” prinsipiylə işləməyə çalışanda xoş olmayan belə mənzərələr üzə çıxır.

“Kəpəz”də oyunçularla bağlı məsələ yeganə qalmaqal deyil. Ötən günlərdə klub rəhbərliyi daha bir şikayət eşidib və qanunsuz əməlin qarşısını alıb. Futbol oynamağı unudaraq özünü mühasib kimi aparan kapitan Tural Axundov məşqçinin göstərişi ilə futbolçulardan pul yığırmış. Məşqə gecikən, səhv edən və s. xətalara yol verən oyunçular rəhbərlikdən xəbərsiz, “daxili kodeks”lə müxtəlif məbləğlərdə cərimələnirmiş və Axundov onlardan əməllərinə müvafiq olaraq 30-40 manat alırmış. Klub rəhbərliyi xəbər tutan kimi bu özfəaliyyəti qadağan edib.

Çox təəssüf ki, illərdi “Kəpəz”lə bağlı bu cür xoşagəlməz söz-söhbətlər bitmir. Əhmədovun xarakterindəki problemləri yazdıq, amma insaf naminə onun gəlişinədək də bu klubda qalmaqallar bitmirdi. Gəncə futbolunda veteran qruplaşmaları ümumi birliyə, futbolun inkişafına ciddi zərbədi. Bu şəxslər şəhər futbolu naminə birləşə bilmir, bir-birinin ayağından çəkir, daim müxalif olmağa kimisə tapa bilirlər. Təəssüf, çox təəssüf…

FƏRİD