Ölkə futbolu
Kamran Əliyevin yığmaya çağırılması üçün səbəb qalmadı
“Sumqayıt”da baş məşqçi ilə rəhbərlik arasında soyuq müharibə davam edir. Samir Abasovla Riad Rəfiyev yola getmir və hər keçən gün münasibətlər gərginləşir.
Futbolinfo.az xəbər verir ki, bu şəxslər arasında münasibətlər son həftələr daha da pisləşib. Baş məşqçinin Kamran Əliyevi ehtiyata atması prezidentin planlarını pozub və bu üzdən ab-hava korlanıb. Rəfiyevin Rusiyadan böyük ümudlərlə gətirdiyi, milliləşdirməyə çalışdığı hücumçunun start heyətə layiq bilinməməsi problemi böyüdüb.
“Sumqayıt”ın menecer-prezidenti Peşəkar Futbol Liqasında rusiyalı kimi qeydiyyata aldırmağa məcbur olduğu legioner üçün 50 min manat rüsum ödəmək istəmir. Klub bir mövsümdə heyətə cəlb edilən 15-ci legioner olduğu üçün Kamrana görə pul ödəməlidir. Rəfyev isə onu milli komandaya çağırtdırıb bu xərcdən qaçacağına ümid edirdi. Lakin indi Kamranın yığmaya dəvət edilməsi mümkün deyil.
Millinin baş məşqçisi Canni de Byazi illərdi Rəfiyevin göstərişləri ilə heyət seçirdi. İndi vəziyyət dəyişib, ictimai qınaq daha çoxdur və qəribə addımlarını müdafiə edəcək şəxslər də AFFA-da əvvəlki nüfuza sahib deyillər. Ona görə Əliyevi millinin qarşıdakı oyunlara görə düşərgəyə çağırmaq alınmayacaq.
Kamran özünü göstərə bilsəydi, bəlkə də milli dəvət üçün əlyeri olardı. Lakin transfer olunduqdan sonra Abasovun ardıcıl 3 turda start heyətdə güvəndiyi futbolçu heç nə göstərə bilmədi. Samir bəy də haqlı olaraq prezidentin sevimlisini ehtiyata atdı – rusiyalı son iki oyunda müvafiq olaraq, 12 və 7 dəqiqə meydanda olub. Belədə onun yığmaya dəvət edilməsi üçün səbəb yoxdur.
Elə bu üzdən Rəfiyevlə Abasovun münasibətləri pisləşib. Riad bəy Kamranı tapşırıqla milliyə çağırtdıra bilməsə, ona görə 50 min manat rüsum ödəməli olacaq.