“Keşlə” və “Sabah” ötən mövsümkü ampluasında

“Keşlə” və “Sabah” ötən mövsümdəki nəticələrinə doğru gedir. Çempionat boyunca zirzəmini özəlləşdirən bu cütlük yenə işindədi. Yayda komanda quruculuğunda edilən səhvlər komandaların çıxışında əksini tapır, məğlubiyyətlər sıralanır. 3 oyundan sonra xalsız qalmaq maliyyə imkanlarına görə Premyer Liqa iştirakçılarının ilk “dördlüy”ündə olan paytaxt təmsilçilərinə yaraşmır.

Yayda bu komandalar çox ciddi transferlər ediblər, heyətləri başdan-ayağa yenilənib. Yeni oyunçularla da nəticələr dəyişmirsə, deməli, problem idarəçilikdədi. Məşqçilər, futbolçular qısamüddətli uğursuzluğa görə qınana bilər. Ancaq əgər seriya davam edirsə, faciəvi nəticələr sıralanırsa, rəhbərlik özü güzgü qarşısına keçməlidi.

“Sabah”ın durumu daha bərbaddı. Hətta qol hesabını aça bilməyən komanda dünən “Qəbələ”ylə matçda həm də çox istəksiz görünürdü. Bir saat boyunca rəqib qapısı qarşısında təhlükəli epizod yarada bilməyən meydan sahibləri qısa müddətdə normal futbol oynadı, lakin qonaqlar ağıllı taktiki gedişlərlə vəziyyəti yenidən dəyişdi, ikinci qolu vurdu.

Masazırdakı oyun baxımlı deyildi, komandalar meydana sanki gəzməyə çıxmışdı. Tempi arabir “Qəbələ” qaldırır, qollarını vurur, sonra yenə eyni ritmə qayıdırdı. Daha inadkar oynamağa məcbur olan “Sabah”da isə heç nə alınmırdı. Ən pisi komandanın əvvəlki matçlarla müqayisədə hər keçən gün daha pis görünməsidi. Futbolçular sanki uğura inamı itirib və baş məşqçi Ramin Quliyev onları ayılda bilmir. Əvəzində “Qəbələ”də məşqçi işi görünür, yeni transferlər ansambla uğurla uyğunlaşıb. Faktiki strt heyətindən ibarət komanda birgünlük də olsa, zirvəyə yüksəlibsə, bu, həm də çempionatın ümumi səviyyəsinin aşağı olmasının nəticəsidi.

“Keşlə”yə gəlincə, avrokubokları da nəzərə alsaq, 5 oyundu məğlub olan komanda dünən çox bərbad çıxış etdi. Heyət potensialına görə çoxlarından yaxşı olan paytaxt təmsilçisi ruhsuz kollektivə çevrilib. Baş məşqçi Sənan Qurbanovun qəribə start heyəti bir yana, öndə pressinq edən, döyüşən “Keşlə”dən də əsər-əlamət yoxdu. “Zirə” bu komandanı faktiki olaraq topsuz qoymuşdu. Düzdü, qapılar qarşısında epizodlar yaranmırdı. Bununla belə, qonaqlar daha yaxşı görünürdü.

Meydan sahibləri azlıqda qaldıqdan sonra qısa müddət hətta daha yaxşı oynadı. Lakin “Zirə”nin baş məşqçisi Rəşad Sadıqovun fasilədə etdiyi dəyişikliklərlə oyunun ssenarisi fərqli yazıldı. Cinah hücumları, meydanın mərkəzində hərəkətlilik artdı, qonaqlar hücuma daha intensiv çıxmağa başladı. Bunun nəticəsi olaraq, qollar vuruldu.

Qələbə qazanmasına baxmayaraq, “Zirə” də tərifə layiq deyil. Ötən mövsümkü heyət daha yaxşı idi. Bəlkə də ilk 2 turda hakimlərin birbaşa “əməyi” sayəsində qaçırılan qələbələr futbolçuları daha ehtiyatlı davranmağa sövq etmişdi. İstənilən halda, dünən meydanda gördüyümüz “Zirə” öyrəşdiyimiz komanda deyildi. Anatole Abanq axmaq davranışı üzündən “Keşlə”ni azlıqda qoymasaydı, nəticə fərqli ola bilərdi.

Milli komandaların oyunları üzündən yaranan fasilədən sonrakı ilk tur qonaqların qələbələri ilə başladı. Kötəklənən autsayderlər öndəkilərlə ciddi xal fərqinin yaranmasını seyr edir. Amma oyun keyfiyyəti baxımından ümumi vəziyyət acınacaqlıdı. Dünən izlədiyimiz hər iki matç yalnız məyusluq gətirdi. Xüsusilə birinci hissələrdə meydanda utandırıcı mənzərə var idi. Qarşılaşmalarda bütün qollar fasilədən sonra edilən bəzi taktiki dəyişikliklərlə reallaşdı. Məğlublar öz yerində, qaliblər də öz çıxışından razı qalmamalıdı.

FƏRİD