“Keşlə”nin oyunçusu Hollandiyaya qaçdı

“Keşlə”nin anqolalı hücumçusu Aleksandr Kristavao ölkəmizi tərk edib. Yaşadığı Hollandiyaya gedən 27 yaşlı oyunçu çox güman, geri qayıtmayacaq.

Ötən mövsüm heyətə cəlb olunan forvard zəif çıxışı ilə seçilirdi. Onun Avropa Liqasında “Laçi” ilə oyunda etdikləri isə klub rəhbərliyinin səbr kasasını daşırıb. Bir neçə qol imkanını əldən verən legioner ciddi tənqidə məruz qalıb.

Daha öncə, Premyer Liqanın ilk turunun “Sumqayıt”la oyununda yeni baş məşqçi Yunis Hüseynovla problem yaşayan Kristavao zəif oyunu azmış kimi, intizamsızlığıyla da seçilirdi. Məhz bu üzdən çalışdırıcının gözündən düşən hücumçu rəhbərliyin də narazılığından sonra yola salınmaq üzrədi.

Kristavaonun Hollandiyaya gedişi icazəli deyil – o, heç kimə xəbər vermədən yola çıxıb (sportinfo.az). Yayda klub pandemiya səbəbindən ona istirahət verməmişdi, futbolçu da yığmaların oyununa görə yaranan boşluqdan faydalanıb və məhz indi ailəsini yanına gedib. Lakin proses elə inkişaf edib ki, indi onun geri qayıtmaması mümkündü.

Klub futbolçuyla müqaviləyə xitam verməyib. Hadisələrin necə inkişaf edəcəyini zaman göstərəcək. Amma nə oyunçu durumundan məmnundu, nə də klub Aleksandrdan. Hər iki tərəf ilk addımı digərinin atmasını gözləyir ki, sonrakı ayrılma prosesində haqlı duruma düşsün.

İndiki halda Kristavaonun klubdan icazə almadan Hollandiyaya getməsi ona problem yaradacaq. Məşqlərdən yayınması futbolçuya bağışlanmayacaq.