“Keşlə”nin “saxta bölgəçilik” naminə 4-cü qabıqdəyişməsi: “Şəfa”nın taleyi necə olacaq?

AFFA ağıllanıbmı? Əmin deyiləm! Uzun illərin təcrübəsi göstərir ki, bu qurum hansısa addımı atırsa, mütləq altında bir bəd niyyət, məqsəd, “əmma” var.

İstənilən halda, adı 4-cü dəfə dəyişdirilən (daha öncə “Xəzər Universiteti” və “İnter” olub – müəl.) “Keşlə”nin “Şamaxı”ya çevrilməsi yaxşı addımdı. Adı dəyişdiyi üçün yox, bölgəyə getdiyi üçün. Paytaxtda qondarma klub olmaqdansa, hansısa rayonumuzu təmsil etmək, yerli sakinlərin həyatına rəng qatmaq, gənclərin ümidinə çevrilmək təqdirəlayiqdi.

AFFA illərdi birbaşa özünün maliyyələşdirdiyi bu klubu Şamaxıya sevinərək göndərmədi. İctimaiyyətin tələbindən sonra bu addım atılıb, bölgələrdə futbolun inkişafına cəhd edilməsi fonu yaradılır. Mingəçevir, Masallı, Quba kimi futbol şəhərlərində yox, daha çox güləşiylə ad qazanan Şamaxıda belə ideyanın gerçəkləşdirilməsi isə niyyətin göstəricisidi. Həm paytaxta yaxın şəhərdi, əlləri klubun üstündə olacaq, yenə maliyyə oyunlarını oynayacaqlar, həm də azarkeşlərin bir yerə toplanması ilə bağlı əbədi xofdan sığortalanırlar – Şamaxıda anşlaq olacağı gözlənilmir. Kəsəsi, bölgə futboluna saxta sevgi göstərisidi.

Dərinə getsək, “Keşlə”nin “Şamaxı”ya çevrilməsi heç nəyi dəyişməyəcək. Klubun akademiyası hələlik Bakıda fəaliyyət göstərəcək, komanda yəqin ki, paytaxtda məskunlaşacaq, sadəcə, oyundan-oyuna bölgəyə gedəcəklər. Klub rəhbərliyi də əvvəlki olacaq. “Keşlə”nin Müşahidə Şurasının sədri Zaur Axundov zatən Avropa vətəndaşıdı, İsveçrədə yaşayır, onun Azərbaycandakı “obyekt”inin hansı şəhərdə olması böyük ölçüdə şəxsi qazancına təsir etmir.

Qərar verilib, addım atılıb, saxtalıq meyllərini görsək də, alqışlayırıq. AFFA bu addımı məcburiyyətdən atdı, tələbləri öz istəklərinə uyğun məcrada cavabladı. Və özlərini ifşa etdilər – deməli, mümkün imiş. İllərdi mətbuat məhz “Keşlə”, “Səbail” kimi klubların bölgələrə köçürülməsini və ya onlara ayrılan maliyyənin rayon komandalarına yönəldilməsinin gərəkliyini yazırdı, sonda həqiqəti qəbul etdilər. Mətbuat indiki AFFA rəhbərliyi ilə futbolun inkişafının mümkünsüzlüyünü də illərdi yazır. Zaman gələcək, bunu da anlayacaqlar, sadəcə, çox önəmli illər itirilir.

Yadımdadı, iki il öncə Elxan Məmmədova niyə klubların rayonlara köçürülməməsi ilə bağlı sual vermişdim. Və o, hiyləgərcəsinə “belə etsək, Bakının mərkəzində “Şəfa” kimi böyük arenanın niyə boş qaldığını soruşacaqsız” cavabını vermişdi. Hə, hörmətli icraçı vitse-prezident, indi həmin sual aktuallaşır. Yoxsa “Bakı”nın akademiyası kimi bu stadionun ərazisini də satmısız? UEFA-nın maliyyəsi ilə tikilən, AFFA-nın dəyər-dəyməzə satdığı bu stadionun taleyi necə olacaq? Möhtəşəm idman qurğusu hansısa formada (məsələn, akademiya kimi – müəl.) ölkə idmanına xidmətə davam edəcək, yoxsa?..

CAVAD