“Keşlə”vari transferlər davam edir – dostlar, tanışlar…

“Keşlə” yenə özünə yaraşan transferləri sıralayır. Klubun yeni idman direktoru Ceyhun Sultanovun gəlişindən sonra proqnozlaşdırdıqlarımız bir-bir reallaşır.

Turnir cədvəlində vəziyyəti həddindən artıq pis olan bakılıların yeni transferləri komandanın güclənməsinə yox, daha çox büdcə talamağa xidmət edir. Sıradan futbolçular baha qiymətə gətirilir, yayda onların göndərilib, yeni “dəstə”nin gətirilməsi üçün zəmin hazırlanır.

Hələlik biri rəsmi açıqlanmaq şərti ilə, 3 oyunçunun transferi dəqiqləşib. Və onların adları hər şeyi deyir.

“Şerif”dən gələn Anatole Abanqla bağlı əvvəlki yazılarımızda bilgi vermişdik. 6 ilə 4 qitə, 8 klub dəyişən hücumçunun bir yerdə uzun müddət qalmaması onun Bakıda da davamlı oynamayacağını, ilk fürsətdə qaçmağa çalışacağını deməyə əsas verir. Xarakterindəki problemlər də onun “Keşlə”yə müvəqqəti dayanacaq gözüylə baxdığını iddia etməyə imkan verir.

Bunlar azmış kimi, Abanqın yeni bacarıqları üzə çıxır. Sən demə, kamerunlu həm də narkotik maddələrə meylli biri imiş. O, “Nyu York Red Bulls”da forma geyinərkən, 2018-ci il dekabrın 5-də ABŞ-da marixuana və narkotik maddələr saxladığı üçün həbs olunub. Bu üzdən “Keşlə”nin yeni hücumçusu 2019-cu ilin əvvəlində bir neçə dəfə məhkəmə qarşısına çıxarılıb.

“Keşlə”nin transferini yaxın günlərdə açıqlayacağı Sadio Tounkaranı qaytarması da maraqlıdı. Yunis Hüseynovun Malidə kəşf etdiyi bu oyunçu ölkəmizdə ilk olaraq “Xəzər Lənkəran” forması geyib. Bakılıların baş məşqçisi cənub təmsilçisində işləyərkən bu yarımmüdafiəçini şəxsən bəyənmişdi. Daha sonra AZAL və “Zirə”də də çıxış etmiş afrikalı çıxışıyla Yunis bəyin zərgər gözlü olduğunu isbatladı.

2020-ci ili Estoniya “Narva Trans”ında keçirən cinah yarımmüdafiəçisinin hazırda hansı formada olduğunu bilmirik. Ən yaxşı vaxtlarını Lənkəranda keçirən Sadio sonralar müəyyən səviyyəni aşa bilməməsi ilə yadda qalmışdı. Onun Estoniyaya üz tutmasının da səbəbi budur. Və indi bu futbolçu yenidən ölkəmizə gəlir. Hüseynovun köhnə tanışlarını başına toplamasının nəticələrini zaman göstərəcək.

Amma onunla müqavilənin 6 aylıq imzalanması şübhələrə yol açır. Həqiqətən yaxşı formadadırsa, “Keşlə”ni gücləndirəcək biridirsə, niyə yarım illik? Yoxsa yay üçün başqa plan var – məsələn, maaş artırmaq və ya sınaq müddətindən keçmədi bəhanəsiylə əlavə qazanc götürmək məqsədi ilə yerinə başqasını gətirmək?

Ən maraqlısı, “Keşlə” nin bir mövqeyə iki yeni futbolçu almasıdı. Sadioya alternativ kimi gətirilən daha zəif biridi. Gürcüstan “Samtredia”sında çıxış edən Nicat Qurbanov əvvəllər “Keşlə”də oynayıb, amma heç cür əsas heyətə düşə bilməyib. Daha sonra digər klublarımız ona maraq göstərməmiş və yarımmüdafiəçi qonşu ölkənin aşağı liqasına yollanmışdı. Nicatın daha güclülərin yarışdığı liqada yenə əsas heyətə düşməyəcəyi aydındı, paytaxt klubu isə intizamsız yarımmüdafiəçidən nicat umur.

“Keşlə” komandanı gücləndirəcəyinə ümid olmayan bu futbolçularla işin yarısını görüb. Hazırda Sultanov daha 3 legionerlə danışıq aparır. Ümid edək ki, heç olmasa, növbəti transferlər ciddi olsun. Əks halda, “Keşlə” autsayderlər qrupunda dolaşmağa, yayda yenidən formalaşdırılmağa məhkum olacaq.