Klubların həsrəti bitir: Yeni prezident qərar verəcək

Azərbaycan futbolunda maliyyə buzu əriyir. AFFA-nın əsas sponsoru olan SOCAR-daka məlum rəhbər dəyişikliyindən sonra, nəhayət, durğunluq aradan qalxacaq.

Futbolinfo.az xəbər verir ki, Premyer Liqada yeni mövsümün startına cəmi 10 gün qalsa da, əksər klubların büdcəsi təsdiqlənməyib, dövlətdən yardım gözləyənlər taleyinin necə olacağını bilmir. Xüsusilə bölgə klublarında vəziyyət acınacaqlıdı. Düzdü, onların hər birinə hazırlığa başlamaları tapşırılıb, icra hakimiyyətləri tərəfindən ilkin maliyyə ayrılıb. Lakin mövsüm ərzində xərclənəcək büdcə ilə bağlı dəqiq vəd verilməyib.

Artıq həsrətə son qoyulur. Bu həftə SOCAR-ın boş qalmış prezident postuna Rövşən Nəcəfin təyin olunmasıyla durğunluğun bitməsi gözlənilir. Yeni rəhbər futbola ayrılacaq maliyyə yardımının məbləğini müəyyən edəcək, vəsaitin konkret olaraq hansı formada klublara paylanacağını qətiləşdirəcək.

O dəqiqdi ki, AFFA əvvəlki kimi yağ-bal içində üzməyəcək. Maliyyənin azaldılması söhbət mövzusu deyil, sadəcə, indi pula daha ciddi nəzarət olacaq. Ötən aylar ərzində yeni baş katib Sərxan Hacıyev bacarıqlı kadr olmasına dair inam yarada bilmədi. Hələ də əvvəllər müavini olduğu vitse-prezident Elxan Məmmədovun əmrləri ilə oturub-duran, onun icazəsi olmadan heç bir addım atmayan Hacıyev ümidi doğrultmadı. Bu səbəbdən SOCAR futbola ayrılan maliyyənin eyni şəxslər tərəfindən havaya sovrulmasına razı deyil.

Klublara maliyyənin ayrılması üçün mexanizm hazırlanır. Hətta AGİN-in bu işdə vasitəçi olması mümkündü. AFFA-nın özünə milli komandalar üçün ayrılacaq vəsaitə isə ciddi nəzarət tətbiq olunacaq. Kəsəsi, qarşıdakı həftədə futbola ayrılacaq maliyyə ilə bağlı yekun qərarlar veriləcək.