Ölkə futbolu
Kristovao düyünü: “Keşlə” 5 aydı düşərgəsində olmayan futbolçuya maaş ödəyəcək
“Keşlə”nin Aleksandr Kristovao ilə “boşanması” yubanır. Ötən ilin sentyabrından etibarən klubun düşərgəsində olmayan futbolçu ilə müqaviləyə bugünədək xitam verilməyib.
Məsələ ondadı ki, bakılılar anqolalı oyunçudan imtina edib. Payızın əvvəlində yaşadığı Hollandiyaya icazəsiz getdiyi və vaxtında geri dönmədiyi üçün hücumçu komandadan kənarlaşdırılıb. Sabiq baş məşqçi Yunis Hüseynov işinə səhlənkar yanaşan legioneri sərəncamında görmək istəməmişdi. Futbolçu isə kluba xəbərdarlıq etdiyini, müqaviləni qarşılıqlı razılıqla pozmayacağını bildirmişdi.
Hazırda Kristovao sənəddə “Keşlə”nin oyunçusu sayılır, amma sentyabrdan bəri onu Bakıda görən olmayıb. Futbolçu geri qayıtmaq üçün biletlə təmin olunmayıb, ona komandadan ayrılması barədə məktub göndərilib. Amma anqolalı bununla razı deyil, müqaviləsi bitənə maaşını almaqda qərarlıdı. Klub bundan imtina etdiyi üçün Aleksandr FIFA-ya üz tutub.
Düzdü, “Keşlə” sentyabrdan bəri Kristovaoya maaş ödəməyib və bunu onun müqavilə öhdəliklərinə əməl etməməsiylə əsaslandırır. Lakin son qərarı beynəlxalq qurumlar verəcək. Məsələ araşdırılır, hüquqi prosedur yerinə yetirilir.
“Keşlə” maliyyə itkisindən qaça bilməyəcəyinin fərqindədi. Bu səbəbdən futbolçunun adı komandanın iştirak ərizəsindən hələ də çıxarılmayıb. Heyətdən göndərilən digər futbolçularla müqayisədə məhz bu hücumçunun adı hələ də siyahıdadı. FIFA yekun qərarı açıqlayana kimi belə davam edəcək.
Kluba cəza verilməsi qaçılmazdı. Futbolçularla oyuncaq kimi davrananda, heç bir müqaviləyə, sənədə məhəl qoymayanda belə olmalıydı. Klub rəhbərliyi bugünədək əksər futbolçulara bu cür münasibət göstərib. Kiminləsə vidalaşmaq istəyəndə qovublar, getmək istəməyəni qorxudaraq və ya kiçik məbləğlərə razı salaraq göndəriblər. Kristovao isə belə davranışa adekvat cavab verdi, hazırda Hollandiyadadı, klubun ona qarşı etdiyi qanunsuz hərəkətləri əlində əsas tutaraq FIFA-ya şikayət edib.
Çox güman ki, hər iki tərəfin arqumentlərinə nəzər yetiriləcək. Aleksandra müəyyən cərimə kəsilməsi mümkündü, amma onun oynamadığı 5 aya görə maaşının əksər hissəsini alacağı dəqiqdi.
FƏRİD