Kubemba Ukraynada özünü təhlükəsiz hiss edir: “Azərbaycandan təklif olsa, dəyərləndirərəm”

Azərbaycanda “Səbail” və “Sabah” klublarının formasını geyinmiş konqolu hücumçu Kevin Kubembanın futbolinfo.az saytına müsahibəsi

– Sentyabrda “Çernomorets”ə keçmisiniz. Yeni komandanda işləriniz necə gedir?

– Bəli, iki ay əvvəl Ukraynaya köçdüm. Burada işlər normal gedir. Düzü, çempionatda müəyyən çətinliklərlə üzləşirik. Bunun nəticəsidir ki, hazırda sonuncu yerdəyik. Amma ümid edirik ki, tezliklə hər şey lehimizə işləyəcək.

– Ukraynadakı hərbi vəziyyət hər kəsə məlumdur. Belə bir durumda futbol oynamaq çətin deyil?

– Sizin dediyiniz kimi, Ukraynadakı vəziyyəti hamı bilir. Amma onu demək istəyirəm ki, məskunlaşdığım şəhərdə, yaşadığım məkanda özümü tam təhlükəsiz hiss edirəm.

– 2018-19-cu illərdə ölkəmizdə “Səbail”in, 2019-21-ci illərdə “Sabah”ın formasını geyinmisiniz. Azərbaycandakı karyeranızı necə xatırlayırsınız?

– Azərbaycanda keçirdiyim vaxtdan çox zövq aldım. Həyatımın üç ilini Bakıda keçirdim. Buna görə hər zaman “Səbail” və “Sabah” klublarına minnətdar olacağam. Azərbaycanda yaşamaq imkanı əldə etdiyim üçün çox xoşbəxtəm.

– 2018-ci ildə “Səbail”ə gəlməmişdən əvvəl Azərbaycan futbolu ilə bağlı nələr bilirdiniz?

– Düzünü desəm, Azərbaycana gəlməzdən əvvəl orada nə liqadan, nə də futboldan xəbərim var idi. Amma gördüklərimə çox təəccübləndim. Premyer Liqanın səviyyəsini bu dərəcədə gözləmirdim. Çox yaxşı mübarizə gedirdi, komandalar sona qədər döyüşürdülər.

– Ən çox nədən ötrü darıxırsınız?

– Azərbaycanda, demək olar ki, hər şeydən ötrü darıxıram. Çünki Bakını çox sevirəm. Həm özüm, həm də ailəm orada çox yaxşı yaşayırdıq.

– Azərbaycanda olduğunuz 3 il sizə həm maddi, həm də mənəvi cəhətdən nələr qazandırdı?

– Həmin 3 il mənə çox şey qazandırdı. Xüsusən də mental baxımdan. İlk böyük zədəmi Azərbaycanda aldım. Bu məni 8 ay yaşıl meydanlardan uzaq qoydu. Ancaq özümdə güc tapıb qayıda bildim. İnsan belə durumdan çıxdığı zaman böyüyür.

– Azərbaycan futbolunu, keçmiş komandalarınızı indi də izləyirsiniz?

– Bəli, hər həftə çempionat matçlarının nəticələri ilə maraqlanıram, oyunları izləyirəm. Tam olmasa da, keçirilən görüşlərin qısa videoyazılarına baxıram.

– Bir çox ölkədə çıxış etmisiniz. Azərbaycan çempionatını digərləri ilə müqayisə edə bilərsiniz?

– Müqayisə etmək lazımdırsa, deyə bilərəm ki, Azərbaycan Premyer Liqası fiziki cəhətdən çox böyük güc tələb edir. Orada yaxşı futbolçular çıxış edir.

– Yenidən Azərbaycanda oynamaq perspektivinə necə baxırsınız?

– Hələ 29 yaşım var və daha bir neçə yüksək səviyyədə çıxış edə bilərəm. Yenidən Azərbaycana qayıdacağammı, bilmirəm. Ancaq bu varianta qapıları qapamıram. Belə bir təklif olarsa, dəyərləndirərəm.

– “Qarabağ” Konfrans Liqasının pley-off mərhələsində “Gent”lə qarşılaşacaq. Sizin də vaxtilə Belçikada çıxış etdiyinizi nəzərə alsaq, bu cütlük barədə nə deyə bilərsiniz?

– Hər iki komanda üçün çətin olacaq. Həm “Qarabağ”, həm də “Gent” barədə məlumatlıyam. Ümumiyyətlə, avrokuboklarda qrupdan sonra cütlərin taleyini xırda detallar həll edir. Mənim fikrimcə, “Qarabağ”ın “Gent”i keçmək şansı daha çoxdur.

CAVAD