Kuzmanoviç uğura ürəkdən inanır: “Külək və tıxaclar az olsaydı…”

“Araz-Naxçıvan” klubunun yarımmüdafiəçisi Miço Kuzmanoviçin futbolinfo.az saytına müsahibəsi

– Misli Premyer Liqasının ilk yarısındakı çıxışınız haqda hansı fikirdəsiniz? Qış fasiləsinə 6-cı pillədə yollanmaq ürəyinizcə oldu?

– Mövsümün ilk hissəsini yaxşı keçirdiyimizi düşünürəm. Sona doğru daha konsentrasiyalı davransaydıq və şansımız gətirsəydi, bəlkə də turnir cədvəlində daha yuxarı pillələrdə olardıq. Amma hazırkı nəticəyə görə peşman deyilik. Çünki çempionat davam edir və qarşıdakı turlarda daha yaxşısını edə bilərik.

– Əslində, heç kim “Araz-Naxçıvan”dan Premyer Liqaya yüksəldiyi ilk ildəcə bu cür oyun və nəticə gözləmirdi. Hamını müsbət mənada təəccübləndirdiniz. Bunu necə bacardınız?

– Razıyam, hər kəsi öz çıxışımızla təəccübləndirə bildik. Hətta mövsümöncəsi hazırlıq prosesini də keçməmişdik. Şəxsim fikrim belədir ki, zamanla daha yaxşı oynamağı bacaran komandamız var. “Araz-Naxçıvan”da zəngin təcrübəyə malik futbolçularla yanaşı, perspektiv vəd edən gənc oyunçular da çıxış edirlər. Xətlərarası əlaqə daha da inkişaf edəndən, meydanda bir-birimizi gözüyumulu başa düşəndən sonra istənilən rəqibə problem yarada bilərik.

– Azərbaycan çempionatı ilə bağlı nə deyə bilərsiniz? Çempionatın səviyyəsindən razısınız?

– Əlbəttə, razıyam. Azərbaycan Premyer Liqasının səviyyəli olduğunu düşünürəm. Burada çoxlu əcnəbi futbolçu oynayır və gəlməkdə də davam edirlər. Meydançalar əla vəziyyətdədir. Bunlar biz futbolçuların xoşuna gələn məqamlardır.

–  Qış fasiləsindən sonra çempionatda hansı yerlər uğrunda mübarizə aparacaqsınız?

– Cari mövsümü ilk “üçlük”də bitirə biləcəyimizə ürəkdən inanıram. Bu komandaya inamım böyükdür. Çünki “Araz-Naxçıvan”ın ön sıralarda qərarlaşmaq üçün oyun keyfiyyəti var.

– Baş məşqçiniz Azər Bağırov haqda da fikirlərinizi bilmək maraqlı olardı. Onun hansı xüsusiyyətini daha çox bəyənirsiniz?

– Baş məşqçimiz haqda müsbət fikirdəyəm. Çətin vəziyyətlərdə belə, özünü təmkinli və soyuqqanlı aparır. Bağırov həmişə futbolçularının yanındadır. Daha çox bu xüsusiyyəti məndə xoş təəssürat yaratdı. Böyük təcrübəsi olan insandır və bunu futbolçulara ötürə bilir.

– Çempionatın ikinci yarısında ilk oyununuzu “Qarabağ”a qarşı keçirəcəksiniz. Bu görüşdən hansı nəticəni gözləyirsiniz?

– Bizi çox maraqlı qarşılaşmanın gözlədiyini indidən əminliklə söyləyə bilərəm. Bunu əbəs yerə demirəm. “Qarabağ”ın turnir cədvəlində birinci olması hər şeyi izah edir. Rəqibin gücü hər kəsə bəllidir. Buna baxmayaraq, asanlıqla təslim olmayacağıq. Bu görüşdən xal və ya xallarla ayrılmaq üçün sona qədər mübarizə aparacağıq.

– Azərbaycan çempionatında uzun müddət oynamağı planlaşdırırsınız?

– Ölkənizdə futbol üçün tələb olunan şərtlərdən tutmuş yaşadığım şəhərədək hər şey məni qane edir. Azərbaycan çempionatının ildən-ilə daha da güclənəcəyi fikrindəyəm. Mümkün olacağı halda, burada uzun müddət futbol oynamaq istərdim.

– Bakını bəyəndiyinizi dediniz. Bəs ölkəmizdə ürəyinizcə olmayan məqamlar hansılardır?

– Bəli, Bakını bəyənirəm. Külək və tıxaclar az olsaydı, daha yaxşı olardı (gülür). Azərbaycanlılar normal, yaxşı insanlardır. Nədənsə mənə elə gəlir ki, Bakıda həyat daha sürətlidir. İnsanlar gecə-gündüz hərəkətdədirlər, harayasa səfər edirlər, amma hamısı mehribandır. Ümumi götürsək, Azərbaycan haqqında fikirlərim müsbətdir.

AĞA