“Mənsimov “Xəzər Lənkəran”ın qayıdışını istəsə…”

“Xəzər Lənkəran”ın rumıniyalı sabiq futbolçusu Adrian Pitin futbolinfo.az saytına müsahibəsi

– Keçmiş komandanız “Xəzər Lənkəran”ın fəaliyyətini bərpa edəcəyi ilə bağlı xəbərlər dolaşır. Bunun reallaşacağına inanırsınız?

– Həmişə demişəm ki, “Xəzər Lənkəran” Premyer Liqada olmağa layiqdir. Çünki lənkəranlılar futbolu sevirlər. “Xəzər Lənkəran” çempionatda çıxış etdiyi vaxt azarkeşləri bütün oyunlarda sonadək komandaya dəstək olurdular. O qədər insan indi bundan məhrumdur, komandasız qalıblar. Əminəm ki, Mübariz Mənsimov “Xəzər Lənkəran”ın qayıdışını istəsə, bunu həyata keçirəcək. Çünki o, şərəfli, dürüst insandır. Nəyisə söz verirsə, deməli, onu mütləq edəcək.

– “Xəzər Lənkəran”ın qayıdışı Azərbaycan Premyer Liqasında çempionluq mübarizəsinə də təsir edə bilərmi?

– Bəli, təsir edər. “Xəzər Lənkəran”ın yoxluğu hamı kimi, məni də məyus edir. Çox istəyirəm ki, bu klub fəaliyyətini bərpa etsin. Bunun baş verəcəyinə inanıram. “Xəzər Lənkəran”ın daha güclü və iddialı qayıdacağına şübhəm yoxdur.

– “Qarabağ”ın Avropa Liqasının pley-off mərhələsində “Braqa” ilə cavab oyununu izlədiniz? Azərbaycan çempionunun uzun müddət 10 nəfərlə oynamasına rəğmən, mərhələni adlayan tərəf olmasını necə qarşıladınız?

– Oyunu canlı izləyə bilmədim, amma matç gedə-gedə nəticəni diqqətdə saxlayırdım. “Braqa” hesabı 3:1 edəndə çox üzüldüm. Ancaq Tanrı “Qarabağ”a kömək etdi. Sonradan meydana daxil olan Nəriman Axundzadə komandası üçün qızıl qol vurdu.

– Püşk “Qarabağ”ın üzünə gülmədi, növbəti rəqib “Bayer” olacaq. Hansı ki, bu komanda Avroliqanın qrupunda hər iki görüşdə Ağdam klubunu məğlubiyyətə uğradıb…

– Ümid edirəm ki, “Qarabağ” və Azərbaycan futbolu bu ağır sınaqdan da üzüağ çıxmağı bacaracaq. “Bayer” hazırda hamı üçün çox çətin rəqibdir. Amma “Qarabağ” bunun da öhdəsindən gələcək. Bu görüş həm də məşqçilərin dueli olacaq. Çünki həm “Bayer”in, həm də “Qarabağ”ın məşqçisi çox ağıllıdır. Bunu hər iki komandanın hazırda öz ölkəsinin çempionatında birinci yerdə olması, üstəlik, Avropa Liqasında çıxışını davam etdirməsi təsdiqləyir. Bir sözlə, azarkeşləri iki maraqlı oyun gözləyir.

– Qurban Qurbanov bir müddət öncə “Bayer”in düşərgəsinə yollandı, Leverkuzen klubunun çalışdırıcısı Xabi Alonsonun iş prinsipləri ilə yaxından tanış oldu. Bu məqam xeyrimizə işləyə bilər?

– Qurban Qurbanov çox güclü mütəxəssisdir. “Qarabağ”ın bütün uğurlarının səbəbkarı odur. Komandası, oyunçuları ilə bağlı hər məqamı incələyir, heç nəyi gözündən qaçırmır. “Qarabağ”ın hər il avrokubokların qrup mərhələsində iştirakı ona böyük təcrübə qazandırıb.

ABBAS