Digər idman növləri
MBA başlayır: Güclü “Naggets”, iddialı “Leykers”, zəif “Dallas” və əsas favorit “Seltiks”
Bu həftə dünyanın ən güclü liqası yeni mövsümünə başlayır. Son illərdə bəlkə də ilk dəfədir ki, o ən güclü variantda start götürür. Ulduzlardan ibarət yeni nəsillə son mövsümlərini keçirməkdə olan korifeylərin qarşıdurması olmalıdır.
Bir tərəfdə hər kəsin təriflər yağdırdığı və draftın 1 nömrəsi Viktor Vembanyama, digər tərəfdə daha bir titul qazanmaq üçün alışıb yanan Lebron Ceyms və Stiv Kerri. MBA-da bu mövsüm üçün rəqiblərini ciddi şəkildə qabaqlayan və ya aşkar autsyader komanda yoxdur. Bu baxımdan yeni mövsümü son 40 ilin ən maraqlısı adlandırmaq olar.
Yeni çempionat başlamazdan əvvəl reqlamentdə müəyyən dəyişikliklər edilib. İlk dəfədir ki, mövsümün ortasında turnir keçiriləcək. 30 komanda təsadüfi şəkildə 6 qrupa ayrılacaq. Noyabrın 3-dən 28-dək onlardan hər biri qrupdakı rəqibləri ilə ikisi evdə, ikisi də səfərdə olmaqla bir oyun keçirəcək. Dörd oyundan ən yaxşı nəticə göstərən iki komanda pley-ofa çıxaraq yolunu davam etdirəcək.
¼ final oyunları dekabrda start götürəcək. Final isə dekabrın 9-da oynanılacaq. Bu isə o deməkdir ki, çempion və vitse-çempion mövsümdə 83, digərləri isə 82 oyun keçirəcək. Turnirin mükafat fondu da var. Qalib komandanın hər bir üzvünə 500 min dollar ödəniləcək.
Digər bir yenilik basketbolçuların oyun sayı ilə bağlıdır. Fərdi mükafat qazanmaq üçün bir oyunçu ən azı 65 görüşdə meydançaya çıxmalıdır. Bundan başqa, komandalar öz liderlərinə istədikləri kimi istirahət verə bilməyəcəklər. Belə olan halda araşdırma başlanacaq. Əsas kriteriyalar oyunun reytinqidir. Ümummili televiziyada yayımlanan oyun zamanı ulduz basketbolçunun iştirak etməməsi araşdırmaya başlamaq üçün səbəb ola bilər. Bir komandanın bir neçə ulduz basketbolçusunun yoxluğu da nəzarətə götürüləcək.
“Ulduz basketbolçu” qrupuna son 3 mövsüm ərzində rəmzi yığmaya düşən və ya “Ulduzlar oyunu”nda iştirak edənlər daxildir. Qaydaları pozan komandalar ən azı 100 min dollar cərimə ödəməlidir.
Oyun qaydalarında iki yenilik var. Bundan sonra simulyasiyaya görə texniki fol veriləcək. Baş məşqçilərin çelenc imkanı da artırılıb. Yeni mövsümdən, götürdükləri çelenc zamanı haqlı çıxarlarsa , bu, limitdən çıxılmayacaq.
Son 15 il ərzində liqada və basketbolun özündə ciddi dəyişikliklər üzə çıxıb. Oyunun necə inkişaf etdiyini , basketbolun hara irəlilədiyini Yannis-Embiid-Yokiçin ifasında görmək mümkündür.
“Sakramento Kinqs”, “Memfis Qrizzlies”, “Oklahoma Siti Tanders”, “ Klivlend Kavalers” və “Nyu-York Niks” kimi gənc komandalar artıq tam püxtələşib və yaşlı komandaların yerini tutmağa hazırdır.
Qərb konfransı o qədər qarışıqdır ki, proqnoz vermək mümkün deyil. “Boston” yayda Porzingisi heyətinə qatdıqdan sonra finala əsas namizəd olmalıdır. Markus Smartın əvəzinə Cru Holidey gəlib. Teytum və Braun liqanın superulduzlarıdır. Latviyalı basketbolçunun gəlişi onların əl-qolunu açmalıdır.
Liqanın kralı isə karyerasını yüksək notda bitirməyə çalışacaq. 21-ci mövsümünə başlayan Lebron Ceymsə görə “Los-Anceles Leykers”i də konfransın favoritləri sırasına qatmaq olar.
Fərdi mənada bütün diqqətlər Viktor Vembanyamanın üzərində olmalıdır. Son illərdə Avropadan MBA-ya bu səviyyədə basketbolçu getməyib. Uzun boya rəğmən yüksək texnikaya malik oyunçular çox nadir hallarda peyda olur. Viktor da məhz bu qəbildəndir. Çatışmayan cəhətini də yaxşı bilir. Məhz bu səbəbdən də özü ilə şəxsi məşqçisini gətirib və çəkisini artırıb. Bu yanaşma istedadın batmayacağından xəbər verir. Belə olan halda qarşıdakı onilliyin ulduzunun kim olacağını söyləmək çətin deyil. Autsayder “San Antonio Spörz”ün imidi məhz builki drafta idi. Artıq fransız basketbolçu heyətdədir. Bundan sonra nəticələri yaxşılaşdırmaq lazımdır. Bu heyət ən azından pley-ofa yüksəlməyə imkan verməlidir.
Diqqət ediləsi komandalardan biri “Miluoki Baks” olmalıdır. 11 il Portlenddə oynadıqdan sonra Demmien Lillard Miluokiyə titul dalınca gəlib. Liqanın ən güclü müdafiəçilərindən biri ilə Yannisin dueti möhtəşəm olmaldır. Demienlə Yannis çoxdan idi ki, birlikdə oynamağı arzulayırdılar. Məhz bu istəyin də olması Miluokini Şərqin favortlərindən birinə çevirir.
Metyu İşbinin gəlişi “Finiks Sans”ın problemlərini arxada qoyub. Komanda liqada ən böyük üçlüyə malikdir. Dürant , Buker və Bil qorxulu görünür.
Ötən mövsüm Kayri İrvinqlə Luka Donçiç dueti ən məhsuldar idi. Onlar birlikdə orta hesabla bir oyunda 60 xal toplayırdılar. Buna baxmayaraq komanda zəif görünürdü. Bu il də uğur qazanılmasa , rəhbərlik ciddi dəyişikliklərə əl atacaq.
Filadelfiyada vəziyyət acınacaqlıdır. Ceyms Harden komandada qalmaq istəmir. Rəhbərlik onun üçün variantlar axtarır. Ancaq çempionat başalayana qədər heç nə etmək mümkün olmayıb. Bu səviyyədə olan ulduz basketbolçunu itirmək “Siksers” üçün təsirsiz ötüşməyəcək. Ən maraq doğuran suallardan biri 32 yaşlı müdafiəçinin harada oynayacağıdır.
Son çempionda işlər qaydasındadır. Nikola Yokiç , Camal Mürrey və baş məşqçi Maykl Melounun ambisiyaları heç də azalmayıb. Onlar Denverdə qalib komanda formalaşdırmaq fikrindədirlər. 1995-ci ildən bu yana MBA-da bir komanda iki il ardıcıl çempion olmayıb. Bu da “Naggets” üçün əlavə motivasiyadır.
Bir də əlbəttə ki, “Qolden Steyt Vorriors”u yaddan çıxarmaq olmaz. Stiv Kerri və Dreymond Qrin 2026-cı ilə qədər bu komandadırlar. Onların yanına 37 yaşlı Kris Pol da gətirilib.
Müntəzəm çempionat ənənəvi olaraq parlaq afişa ilə start verir. İlk oyun günündə Los-Ancelesdə Lebron və komanda yoldaşları son çempionu qəbul edıəcəklər. Digər bir maraqlı oyun isə “Qolden Steyt Vorriors”la “Finiks Sans” arasında olmalıdır. Bir sözlə basketbol azarkeşlərinin darıxdırıcı günləri geridə qalıb. Onlar həftənin hər bir günündə əsrarəngiz şoulara tamaşa edəcəklər.
İLQAR AĞAYEV
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub
- Ölkə futbolu2024-04-26 08:00
Juninyo – Avropanın ən yaxşı braziliyalısı