Milli komandamıza sürpriz namizəd: Gürcüstan yığmasını da çalışdırıb

Milli komandamızın baş məşqçi postuna sürpriz namizəd ortaya çıxıb. Menecerlər AFFA rəhbərliyinə Vladimir Vayssın xidmətini təklif edib.

Futbolinfo.az xəbər verir ki, AFFA rəsmiləri hələlik Canni de Byazinin boşaltdığı posta təyinat etməyə tələsmir. Hələ assosiasiyanın yeni prezidenti müəyyənləşməli, eyni zamanda əcnəbi, yoxsa yerli çalışrıcı məsələsi həllini tapmalıdır. Yalnız bundan sonra namizədlərlə bağlı iş başlayacaq.

Amma Vayss özü millimizə can atır.2021-ci ilin mayından Bratislava “Slovan”ına uğurla rəhbərlik edən çalışdırıcı onun xidmətini təklif edən menecerlərə razılığını bildirib. AFFA təyinatda maraqlı olarsa, 59 yaşlı slovakiyalı müzakirəyə açıqdır.

İki il köməkçi kimi çalışdığı “Petrjalka”da karyerasına başlayan Vayss 2000-06-cı illərdə bu komandanın baş məşqçisi olub. Bir il Rusiya “Saturn”unda çalışdıqdan sonra daha bir mövsüm əvvəlki klubunda işinə davam edən Vladimir heç vaxt boşda qalmayıb. 2008-ci ildə isə o, Slovakiya millisinə təyinat alıb, burada 3,5 il işləyib. Milli komandadakı son 6 ayında paralel olaraq “Slovan”a rəhbərlik edən Vayss 2012-nin yayında bratislavalılardan da ayrılıb.

2012-ci ilin noyabrında “Kayrat”a təyinat alan Vayss tam 3 il Qazaxısrtanda işlədikdən sonra fəaliyyətinə 6 aylıq fasilə verib. O, 2016-cı ilin martından 2020-ci ilin noyabrınadək ikinci dəfə milli karyerası yaşayıb. Qonşu Gürcüstanın milli komandasından ayrıldıqdan sonra isə “Slovan”dadır.