Millimizə baş məşqçini onlar seçəcək: çox şey Elxan Səmədovun mövqeyindən asılıdır

Milli komandamızın yeni baş məşqçisini seçmək üçün yaradılan İşçi Qrupun tərkibi müəyyənləşib. AFFA prezidenti Rövnəq Abdullayevin istəyi ilə qrupda vitse-prezidentlər – Elşad Nəsirovla Vaqif Sadıqov, sıravi üzv Zaur Axundov, baş katib Sərxan Hacıyv və Peşəkar Futbol Liqasının prezidenti Elxan Səmədov olacaq.

Futbolinfo.az xəbər verir ki, indiyədək bütün baş məşqçi namizədlərini müəyyənləşdirmək katibliyə həvalə olunur, Elxan Məmmədov sə “Sumqayıt”ın menecer-prezidenti Riad Rəfiyevlə birlikdə istədiklərini edirdilər. Bu dəfə isə fərqli addım atılıb. Hacıyev onların dəstəsinin arzularını həyata keçirməyəcəyindən həlledici qərarları vermək üçün İşçi Qrup formalaşdırılıb.

Hətta iş o həddə çatıb ki, Sərxan Hacıyev qrupun rəhbəri kimi də təsdiqlənməyib. İcraiyyə Komitəsinin son iclasında Rövnəq Abdullayev Sərxan Hacıyevi sədr təyin edərək qrup üzvlərini müəyyənləşdirməsini istəyib. Amma onun yerli məşqçilərin, xüsusilədə Qurban Qurbanovun namizədliyinin üzərində dayanması AFFA rəhbərliyinin xoşuna gəlməyib. Bu səbəbdən vəziyyət dəyişib.

Əldə etdiyimiz məlumata görə, İşçi Qrupun rəhbəri vitse-prezidentlərdən biri, çox güman ki, daha yaşlı Nəsirov olacaq. Namizədlər müəyyənləşəcək, daha sonra ən layiqli bilinənlərin adı danışıqlara başlamaq icazəsi verilməsi üçün İK-ya təqdim olunacaq.

İşçi Qrupun tərkibi çox maraqlı seçilib. Nəsirovla Axundov əcnəbi məşqçi tərəfdarı olduqlarını son müsahibələrində açıqca bildiriblər. Hacıyevlə Sadıqov isə yerli məşqçi təyinatının tərəfdarlarıdır. Deməli, qərarın verilməsində hələ ki, mövqeyini bildirməyən Səmədovun rolu həlledici olacaq. PFL prezidenti hazırda bu məsələdə həlledici rola malikdir. Düzdür, heç vaxt qəti söz sahibi olmayan Sadıqova etibar yoxdur, hər an sözünü dəyişə bilər. Lakin onun bu qədər qısa müddətdə mövqe dəyişməsi özünün ifşasına və biabır olmasına gətirib çıxarar.

Elxan Məmmədovun proseslərdən kənar tutulduğu bir məqamda Nəsirovun sinəsini qabağa verməsi maraqlı faktdır. AFFA-da ən önəmli mövqeni itirməmək üçün dəstə ən son silahlarını döyüşə çıxarıb.