“Millimizə kömək etməyə hazıram” – Səlahət Ağayev

“Sabah”ın qapıçısı Səlahət Ağayevin futbolinfo.az saytına müsahibəsi

• Uzun müddət sonra komanda qələbə qazandı. Qalibiyyət hisslərinizi bölüşərdiniz….
• Əslində bu qələbəni daha öncə qazanmalıydıq. Əvvəlki oyunlarda kifayət qədər yaxşı oynadığımız matçlar olmuşdu. Ancaq təəssüf ki, ilk qələbəmizi yalnız 8-ci turda qazanmağı bacardıq. Qələbə barədə nə deyə bilərəm? Yaxşı oyun sərgilədik. Rəqibin də fürsətləri oldu. Uzun müddət azlıqda qalmalarına baxmayaraq, yaxşı mübarizə apardılar. 3 xal qazandığımıza görə şadam. Ümid edirəm, bu qələbə bizim qarşıdakı oyunlarımızda komandaya yaxşı motivasiya olacaq.
• Ramin Quliyevin istefasından dərhal sonra komanda rəqibini məğlub etdi. Bunun sirri nədir?
• Komandanı bu oyuna Ramin Quliyev hazırlamışdı. Əvvəlki turlarda da bu cür oyunlarımız olmuşdu. Sadəcə, “Sumqayıt”la matçdakından fərqli olaraq, nəticə xeyrimizə olmamışdı. Bu, futboldu. Bəzən yaxşı oynasan da, nəticə həmişə istədiyin kimi olmur.
• Artıq komanda baş məşqçisiz qalıb və mövsümün ortasıdır. Bu, sizə çətinlik yaratmayacaq?
• Komandada olan hər bir futbolçu peşəkardı. Məşqçinin kim olmasından asılı olmayaraq, klubun üzvü olduqlarını və hər bir oyuna qələbə üçün çıxmalı olduqlarını yaxşı başa düşürlər. Bunu “Sumqayıt”la oyunda da gördük.
• Ümumiyyətlə, bu qalibiyyət komandanın motivasiyasın artıracaq və qara zolaqdan çıxa biləcəksiz?
• Bayaq da qeyd etdiyim kimi, bu qələbənin komandada özünəinam hissinin formalaşması və motivasiyasının yüksəlməsində önəmli rolu olacağına inanıram. Ümid edirəm ki, uğursuz oyunlarımız geridə qalacaq.
• “Sabah”a keçdikdən sonra mütəmadi olaraq meydana çıxırsan. “Neftçi”dəki uzunmüddətli zədəli dövrdən sonra yavaş-yavaş formaya düşürsən. Fikrincə, daha yaxşı çıxış edib yenidən milliyə qayıda bilərsən?
• Əvvəla onu deyim ki, formamı bərpa etməyimdə komandamızın qapıçılar üzrə məşqçisi Vitali Kovalyovun çox böyük rolu var. Buna görə ona təşəkkür edirəm. Millidə çıxış etmək hər bir futbolçunun arzusudur. Həmçinin yığmada olmaq hər futbolçu üçün fəxrdir. Mənim üzərimə düşən klubumda formada olmaq, hər oyunda özümü ən yaxşı şəkildə göstərməkdir. Əgər uyğun görülsə, millinin məşqçiləri dəvət göndərəcəklər. Nə vaxt dəvət gəlsə, millimizə kömək etməyə hazıram.
• Qış fasiləsinə qədər turnir cədvəlinin sonuncu pilləsindən xilas ola biləcəksiz?
• Bunu qarşıdakı oyunlar göstərəcək. İkinci dövrənin bitməsinə hələ 6 tur var. Öz oyunumuzu sərgiləsək, fikrimcə, nəinki son pillədən xilas olmaq, hətta daha yüksək yerlərdə qərarlaşa bilərik.
• “Sumqayıt”la matçdakı qırmızı vərəqə epizodu çox müzakirə olundu. Həmin epizodu yenidən izlədinmi və fikirlərin necədir?
• Həmin anda nə baş verdiyini tam olaraq görmədim. Ona görə, dəqiq nə isə deyə bilməyəcəm.
• Qarşıda “Qəbələ” ilə səfər oyunu var. Növbəti qələbə gələcəkmi?
• Bunun üçün əlimizdən gələni edəcəyik. Ümid edirəm, “Qəbələ” səfərindən yaxşı nəticə ilə qayıdacağıq.

FƏRİD