Millinin oyunları klub məşqçilərinin gözündə – SORĞU

Milli komandalarımızın nəticələri hamını məyus etdi. Əsas yığmanın qələbəsiz oyunlar seriyası davam edərkən, xüsusilə Lüksemburq məğlubiyyəti azarkeşlərin narazılığı ilə qarşılandı. Digər yığmalarımızın da qələbəyə həsrət qalması, xüsusilə U-21-in Avsrtiya darmadağını sosial şəbəkədə tənqidləri çoxaltdı. 1 həftə ərzində ayrı-ayrı 4 yığmanın 10 oyunda qələbə qazanmadan 8 məğlubiyyət almasının əks-sədası fərqli ola bilməzdi.

Mətbuat nəticələri analiz etdi, problemləri qabartdı, haqlı tənqidlərə yer verdi. Bir sıra mütəxəssislər də eynilə davrandı. Təbii ki, kimsədən tərif də gözlənilmirdi – ortada öyünüləsi heç nə yoxdu.

Bəs, Premyer Liqada oynayan klubların məşqçiləri nə düşünür? Axı, onların əksəriyyətinin yetirməsi də bu matçlarda iştirak etdi. Üstəlik, aktiv məşqçilik fəaliyyəti ilə məşğul olduqlarından onların düşüncələri maraqlıdı.

Bütün məşqçilərə tribuna verdik, milli komandaların son oyunlarına münasibət bildirmələrini istədik. Onların dediklərini isə şərh vermədən təqdim edirik. Kimin nə dərəcədə səmimi olduğuna, kimin gerçəkləri dilə gətirdiyinə, kimin tənqidə ehtiyatlandığına və kimin əsl həqiqəti söylədiyinə oxucular qərar versin.

Samir Abasov, “Neftçi”: “Portuqaliya ilə oyunda hər şey məlum idi – qalib gəlməyimiz çətin görünürdü. Bu matçda qələbə möcüzəyə bərabər bir şey olardı. İrlandiya ilə oyunda komanda yaxşı oynadı, təəssüf ki, qalib gələ bilmədilər. Başa-baş mübarizə apara biləcəyimiz bir komanda idi. Lüksemburqla oyunda isə hamı kimi qələbə gözləyirdim, lazım olan nəticəni qazana bilmədilər”.

Ayxan Abbasov, “Sumqayıt”: “İlk öncə U-21-ə nəzər salmalıyıq. Bu komandanın üzvləri Premyer Liqada müntəzəm çıxış edir. Amma bu, yalnız mövcud limitə görə deyil, birdən çox gənc oynadan komandalarımız da var. Bu, yaxşı haldı, millinin məşqçiləri üçün də üstünlükdü. Yığmanın son oyununu izləməmişəm. Xorvatiyadakı matçda isə rəqib çox üstün idi, bununla belə, daha yaxşı çıxış etmək olardı. Əvvəlki U-21-lərə baxanda indiki heyət daha təcrübəlidi, əksəri ikinci ildi Premyer Liqada oynayır. Əsas milliyə gəlincə, bu il legioner həyatı yaşamaq üçün gedən futbolçularımızın çoxalması sevindirdi, onların növbəti oyunlarda milliyə daha faydalı olacağına inanıram. Amma bugünkü nəticələr yaxşı deyil. Hansısa detallar barədə danışmaq istəmirəm. Yalnız onu deyə bilərəm ki, millinin heyəti gəncdi, hardasa ardıcıl 10 il bir yerdə çıxış edə biləcək futbolçular toplaşıb”.

Rəşad Sadıqov, “Zirə”: “Aşağı yaş qruplarından ibarət milli komandalarla bağlı yaxın keçmişdə fikirlərimi bölüşmüşəm. Bu, bir qədər geniş mövzudu və daha əhatəli müzakirəyə ehtiyac var. Əsas milli komandamızın seçmə mərhələdəki çıxışı ilə bağlı fikir bildirmək mənə çox çətindir. 17 il millidə çıxış etmişəm, uzun müddət komandanın kapitanı olmuşam. Milli son oyunlarından sonra çox tənqid olunur. Amma komandamızın yaxşı potensialı var. Ümid edirəm ki, yaxın gələcəkdə yaxşı oynayıb müsbət nəticələr əldə edəcəyik”.

Ramin Quliyev, “Sabah”: “İlk növbədə onu deyim ki, hər birimiz millimizin baxımlı oyun sərgiləmisini və qalib gəlməsini istəyirik. Təəssüf ki, son oyunlarda istədiyimiz nəticəni əldə edə bilmirik. İstər Lüksemburq, istərsə də İrlandiya ilə görüşlərdə fərqli hissələr izlədik. Lüksemburqla görüşdə millimiz ikinci hissədə daha baxımlı, hücumameyilli oyun sərgilədi, qol imkanları yaratdı. İrlandlarla oyunda isə ilk hissəni uğurla çıxış edib, ikinci hissədə daha çox hesabı qorumağa çalışdıq. Sonuncu oyunda isə qrupun favoriti olan Portuqaliyaya qarşı oynadıq. Təbii ki, əvvəlki iki oyunun yorğunluğu Portuqaliya ilə matça təsirsiz ötüşmədi. Sadaladığım amilləri nəzərə alsaq, bu nəticəni gözləmək olardı. Bu gün yəqin ki, heç kim millimizin Portuqaliyaya qalib gəlməli olduğunu demir. Amma hamı yığmamızdan layiqli mübarizə və əzmkar oyun görmək istəyirdi. Bu, futboldu, istənilən nəticə ola bilər. Daha yaxşı da ola bilərdi, daha pis də. Burda fikrimcə, oyunçuların hansı vəziyyətdə olması və nə dərəcədə əzmkar, istəkli mübarizə aparmasından çox şey asılıdır. Milli komanda hamımızındır. Hamımız onun uğurlarına sevinib, məğlubiyyətinə üzülürük. Çıxış yolu nədədir? Bu, bir-iki cümlə ilə izah olunası məsələ deyil. Geniş müzakirə mövzusudur. Bu gün Premyer Liqada 8 komanda mübarizə aparır və çempionatda 21 yaş limiti ilə gənc oyunçular qazanmağa çalışırıq. Bunun özü də ürəkaçan durum deyil. Ölkədə futbolun inkişafı strategiyası, milli komandaların inkişafı və s. mövzular var ki, bu məsələlər barədə saatlarla danışmaq olar”.

Sənan Qurbanov, “Keşlə”: “Lüksemburqla oyunda futbolçularımız əlindən gələni etdi. Nəzərə alaq ki, futbol daim inkişafdadı, bu ölkənin millisində istedadlı futbolçular çoxalır. Lüksemburq yığması kimi klubları da artıq daha yaxşı çıxış edir. Səfərdə oynadığımızdan işimiz çətin idi. Məşqçilər, futbolçular yaxşı nəticə üçün əlindən gələni etdi. İrlandiyada komanda daha yaxşı təsir bağışladı – qol vurduq, əlavə imkanlarımız oldu. Meydan sahibləri ikinci hissədə tempi artırdı, ev komandası olmağın üstünlüyündən yararlandı və məğlubiyyətdən qaçdı. Heç-heçə səfər oyunu üçün pis nəticə deyil, hətta uğur saymaq olar. Portuqaliyaya gəlincə, rəqib çox güclü idi, oyunçularının harada oynadığını xatırlamaq kifayətdi. Usta futbolçular meydanda idi və səviyyə fərqi sözünü dedi”.

Elmar Baxşiyev, “Qəbələ”: “Yıgmamızdan daha yaxşı nəticələr gözləyirdik. Oyunları məşqçi kimi dəyərləndirmək istəməzdim, hamımız milli komandamızın azarkeşiyik. Portuqaliyanın nə qədər güclü olduğunu bilsək də, içimizdə uğurlu nəticəyə bir inam var idi. Və bu da azarkeşlik hisslərindən qaynaqlanır. Amma stadionda gördüklərimiz məyus etdi. Nəticəni günümüzün reallığı hesab etmək olar. İrlandiya ilə oyunun nəticəsini qənaətbəxş hesab etmək olar. Lüksemburqla qarşılaşma isə bu üç oyun içərisində ən uğursuzu oldu”.

Aftandil Hacıyev, “Səbail”: “Heyət baxımından millidə seçim etmək imkanı kifayət qədər genişlənib. Xaricdəki legionerlərimizin sayının artması yaxşıdı. Nəticələr bəlkə də daha yaxşı ola bilərdi. Rəqiblərdən yalnız Lüksemburq bizə yaxındı, digərləri reytinqdə daha üst pillələrdədi. Vəziyyəti yaxşılaşdırmaq üçün həmişəki kimi yenə zamana ehtiyac var. Şablon səslənsə də, deməliyəm – aşağı yaş qruplarına diqqət artırılmalıdı. 21 yaşlıların oyunu bizə gələcək üçün ümid verməsə belə, orada da kifayət qədər perspektivli uşaqlar var, heyət Premyer Liqada oynayanlardan formalaşıb. Millilərimizin bu nəticələri hamı kimi mənə də təsir edir, yaxşı olması üçün hamımız birləşib futbolumuzu daha da inkişaf etdirməliyik”.

“Qarabağ”ın baş məşqçisi Qurban Qurbanov sorğudan kənar qaldı. O, vaxtilə milli komandanın baş məşqçisi olduğunu, bu səbəbdən yığma barədə fikir bildirməyi etik cəhətdən doğru saymadığını söylədi.

CAVAD