Muarem Muarem: “Rakuv”a yuxarıdan aşağı baxmaq olmaz”

2012-2015-ci və 2016-2017-ci illərdə “Qarabağ”ın formasını geyinmiş şimali makedoniyalı Muarem Muaremin futbolinfo.az saytına müsahibəsi

– Bu yay karyeranızı başa vurdunuz. Belə qərar qəbul etməyiniz yaşla əlaqədardır, yoxsa səbəb başqa idi?

– Başqa bir səbəbi yoxdur. “Qostivar”la ikinci liqada çıxış edirdim. Komanda bu mövsüm yüksək liqaya çıxdı. Ancaq rəhbərlik karyeramı başa vuraraq, köməkçi-məşqçi kimi çalışmağımı təklif etdi. Düşündüm ki, onsuz da karyeramın sonlarıdır, bundan sonra ən çox 1-2 il oynaya bilərəm. Amma sonra haradasa məşqçi kimi çalışmaq imkanım olmaya bilər. Buna görə də təklifi qəbul etdim.

– “Qarabağ”ın sabiq futbolçusu Muarem nəvaxtsa bu klubun məşqçisinə çevrilə bilər?

– Məşqçi kimi ən böyük arzularımdan biri gerçəkləşmiş olar. Albaniya millisində və “Qarabağ”da çalışmaq mənim üçün fəxr olar. İnanıram ki, gələcəkdə məşqçi qismində Azərbaycana qayıdaram. Çünki ölkənizi çox sevirəm, orada özümü yad hiss etmirəm. Azərbaycan mənim ikinci vətənimdir. Üstəlik, əminəm ki, “Qarabağ”ın qapıları hər zaman üzümə açıqdır. Klub rəhbərliyi və məşqçiləri ilə münasibətim çox gözəldir. Amma əvvəlcə məşqçi kimi püxtələşməliyəm.

– Sabiq komandanız “Qarabağ” Çempionlar Liqasının I təsnifat mərhələsində Cəbəllütariq çempionu “Linkoln”u mübarizədən kənarlaşdırdı. Nəticələrdən xəbərdarsınız?

– Əlbəttə ki, xəbərdaram. Oyunların videoyazısına da baxmışam. “Linkoln”la görüş də gözlənilən kimi oldu. Cəbəllütariqdəki matçın çətin alınması normal idi. Çünki mövsümün ilk rəsmi matçı idi. Amma cavab qarşılaşmasında hər şey gün üzünə çıxdı.

– “Qarabağ” II raundda Polşa çempionu “Rakuv”la qarşılaşacaq. Bu komanda önündə şansları necə görürsünüz?

– Əminəm ki, “Linkoln”la oyun “Qarabağ”ın tam gücü deyildi. Komanda mövsümün əvvəlində həmişə oyundan-oyuna formaya düşür. “Rakuv” da Polşa çempionudur, yuxarıdan aşağı baxmaq olmaz. Yenə də “Qarabağ”ı cütün favoriti hesab edirəm. Ümumiyyətlə, bu mövsüm “Qarabağ”ın Çempionlar Liqasının qrupuna düşmək şansını heç də az saymıram. Onların uğurlarını gördükcə bu komandanın formasını geyindiyim üçün qürur duyuram.

– Hazırkı “Qarabağ”la öz dövrünüzdəki komandanı müqayisə edə bilərsiniz?

– Məncə, indi daha güclüdürlər. Oyunlarına baxıram, ildən-ilə daha güclü və təcrübəli olduqlarını müşahidə edirəm. Adlar dəyişsə də, sistem və məşqçilər eynidir. Buna görə də “avtomobil” get-gedə sürətini artırır.

– Dediniz ki, “Qarabağ”ın matçlarını izləyirsiniz. Deməli, Azərbaycan Premyer Liqasından məlumatlısınız?

– Düzü, Azərbaycan çempionatında təkcə “Qarabağ”ın oyunlarına baxıram. Onlar həm daxili birincilikdə, həm də avrokuboklarda parlaq nəticələr göstərirlər. Nələrə qadir olduqlarını yaxşı bilirəm. Bu uğurların memarı Qurban Qurbanovdur. O, heç vaxt təslim olmur və komandanı yüksək nizam-intizamla idarə edir. Birgə çalışdığım məşqçilər arasında Qurbanov rəqibi ən yaxş təhlil edən mütəxəssisdir.

ABBAS