Ölkə futbolu
Musayevin gizlətdiyi məbləğ – mayın 30-da açıqlanacaq
Ramin Musayevin açıqlaması təsadüfi deyil. Peşəkar Futbol Liqasının prezidenti heç nə demək istəmədən, əslində, hər şeyi deyib. Sadəcə, ad və rəqəmləri dilinə gətirməyib ki, onu da biz yazacağıq.
Sitat: “Məndə olan məlumata görə, dövlət Premyer Liqada çıxış edən 10 klubun hər birinə eyni məbləğdə vəsait ayıracaq. Bacarığı olan komanda sponsorlar cəlb edib, əlavə gəlir əldə edəcək. Bu, onların öz işləridir. Məbləği bilirəm. Amma açıqlaya bilmərəm”.
Ramin bəy dövlətin bütün klublara müəyyən məbləğ ayıracağını deyib. Bizdə olan, bilgiyə görə, bu, “Misli” şirkəti vasitəsi ilə reallaşacaq. Uzun müddətdir bu barədə söhbətlər gəzir, nəhayət, indi reallaşmaq üzrədi. “Misli”nin hər kluba müəyyən məbləğ ayıracağı, SOCAR-ın klubları maliyyələşdirməni dayandıracağı ehtimal edilir.
Plan reallaşsa, hamıya eyni şərait yaradılacaq, klublar daha güclü olmaq üçün öz sponsorlarından kömək gözləyəcək. “Şamaxı”, “Sumqayıt”, “Turan-Tovuz”, “Kəpəz” kimi birbaşa SOCAR-ın və ya onun törəmə şirkətlərinin əlinə baxan klublar “Qarabağ”, “Sabah”, “Zirə” kimi öz sponsorları olan klublardan bir addım geri düşəcək.
Lakin burada da fərqli durumlar var. Məsələn, “Azərkimya” “Sumqayıt”a maliyyə ayırmağı dayandıracaqsa, ASCO “Səbail”ə fərqli büdcə ayırmaq niyyətindədi. “Neftçi” isə bütün tarixi boyunca olduğu kimi, yenə neft pulları ilə maliyyələşəcək.
Musayevin gizli saxladığı məbləğ də bəllidi. “Misli” hər kluba 2 milyon manat ayırmağı planlaşdırır. Futbol İnkişaf Fondunun reklam-anonslarında klubların fəaliyyət göstərməsi üçün “minimum 2 milyon manata” ehtiyac olması barədə deyilənlər təsadüfi deyil. Klublar üçün baza məbləği məhz bu qədər olacaq, imkan tapanlar əlavə sponsorlar cəlb etməklə imkanlarını yaxşılaşdıracaq.
Bütün bu məsələlərin AFFA İcraiyyə Komitəsinin mayın 30-dakı iclasında açıqlanacağı gözlənilir. Ödənişlər isə yığmanın Millətlər Liqasındakı matçlarından sonra verilməyə başlanacaq.
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib