Nəsirovun Obradoviç oyunu

Elşad Nəsirov artıq özü oyuna qoşulub. Azarkeşlərin, əsl futbol təəssübkeşlərinin Elxan Məmmədova nifrətinin ən yüksək həddə olması boz kardinalın özünün meydana atılması ilə nəticələnib. AFFA-nın vitse-prezidenti Parisə sürgün olunan sabiq baş katibin yoxluğunda prosesləri birbaşa özü idarə etmək istəyir.

Milli komanda illərdir Azərbaycan futboluna zərbə vurmaqdan yorulmayan dəstənin son qalasıdır. Ora təyinatı özləri edə bilməsələr, ciddi zərbə alacaqlarının, hakimiyyətlərinin sona yetəcəyinin fərqindədirlər. Ona görə də hər zaman əlaltılarına iş gördürən, özü kabinetlərdə dəstək verən, ən yüksək dairələri yalançı raportlarla, dosyelərlə inandıran Nəsirov açıq döyüşə başlayıb.

Milli komandaya yeni məşqçini seçəcək İşçi Qrupa məhz Elşad bəyin rəhbər seçilməsi təsadüf deyil. İşi şansa buraxmaq istəmirlər. Əsas niyyət isə təyinatı tezliklə yekunlaşdırmaqdır. Baş məşqçi məsələsini istədikləri kimi həll etsələr, o zaman AFFA prezidenti seçkilərində hakimiyyətdə qalmaq üçün psixoloji üstünlük qazanacaqlar. Lakin seçim edənlər, təyinata “OK” deyənlər aldanmamalıdır, öncə AFFA-da hakimiyyətin taleyi həll olunmalı, yeni strateji xətt müəyyənləşməli, daha sonra islahatlara uyğun məşqçi seçimi olmalıdır.

Nəsirovun dəstəsi isə dayanmaq bilmir, təbliğat kampaniyası aparırlar. Əlləri dövlət başçısının görüşünə adam çıxardacaq, sonra isə onun sayəsində manipuliysiya edəcək qədər uzundur.

Milan Obradoviçin milli komandamızın baş məşqçi postuna namizəd olması ilə bağlı xəbərlərin çoxalması təsadüfi deyil. Bu şəxsin nəinki baş məşqçi, hətta namizəd olması utancvericidir. Amma vaxtilə Nikola Yurçeviçi baş məşqçi təyin edənlər üçün belə hallar sıradan olaydır. Öz məqsədləri naminə hər şeyə razıdırlar – təki hakimiyyətə qalsınlar, ölkə futbolunun idarəçiliyi əllərindən çıxmasın.

Obradoviçin milli komandaya namizəd kimi hazırlandığını hələ bir ay öncə yazmışdıq. Serbiyada prezidentlərin görüşündə peyda olan Milanın paylaşdığı foto bugünə ismarıc idi. Milli komandaya əcnəbi məşqçi təyin etmək üçün limitin bitdiyini anlayan dəstə, yerli kadrlardan imtina üçün bu kimi oyunlara baş qoşub.

Əslində, Obradoviçin bir görüşlə, xahişlə yığmamıza baş məşqçi təyin ediləcəyi inandırıcı deyil. Sadəcə, Nəsirov və dəstəsi bununla hədə-qorxu gəlir, ictimaiyyəti guya təyinatın yuxarı dairələrdə həll olunduğuna inandırmağa çalışır. Halbuki belə olsaydı, xəbər mətbuata sızmazdı, bağlı qapılar arxasında həll olunar, təyinat elan edilərdi. Məlum dəstə bu oyunla həm yalançı raport verdikləri insaları aldatmağa çalışır, həm də onları azarkeşlərin qəzəb hədəfinə gətirir. Sonra da məsələnin yüksək səviyyədə həll olunduğunu deyərək yaxalarını kənara çəkməyə çalışacaqlar.

Bir daha vurğulayırıq ki, məşqçi kimi heç bir uğuru, ciddi fəaliyyəti olmayan Obradoviçin hətta millimiz çalışdırmağa namizəd olması ayıbdır.

Serb mütəxəssis U-21 millimizdə işlədiyi zaman komandamıza rəhbərlik etdiyi 24 oyunun 17-də məğlubiyyət acısı dadmışıq. Hətta onun debut matçı Lixtenşteynin tarixi qələbəsi ilə əlamətdar olub. Belə ki, 2019-cu ildə komandamızı 1:0 hesabı ilə məğlub edən lixtenşteynlilər tarixlərində ilk rəsmi qalibiyyət sevinci yaşayıblar. Obradoviç cəmi 5 qələbə ilə öyünə bilib ki, bu da 3 il burada qalması üçün kifayət edib.

Serb çalışdırıcı Azərbaycana gələnə qədər ölkəsində orta səviyyəli mütəxəssis idi. Hər halda “Napredak”, “Koper” kimi klublarda köməkçi işləmək böyük istedad tələb etmir. Baş məşqçi kimi isə “Koper”də 15, Serbiyanın U-19 yığmasında da cəmi 4 görüşdə “sükan arxasında” qala bilib. Ən böyük uğuru 2018-ci ildə Serbiyanın əsas millisində köməkçi məşqçi işləmək olub. Milan Azərbaycanı tərk etdiyi 2022-ci ilin yayından bəri işsizdir. Yəqin ki, yüksək səviyyəli mütəxəssis olsaydı, ona hər hansı təklif gələrdi.

FƏRİD