Naqifə bir işarə: Təzyiq göstərmək yox, məsələ qaldırmaq lazım idi

“Kəpəz”in ev oyunlarını Bakıda keçirməsi ciddi müzakirələrə səbəb olub. Gəncə stadionunun qəzalı vəziyyətdə olması üzündən verilən qərarda qərəz axtaranlar da var.

Əslində, Fövqəladə Hallar Nazirliyinin Premyer Liqa matçlarının burada keçirilməsinə qadağa qoyması tam anlaşılandı. Yarım əsrdən çoxdu təmir üzü görməyən arenanın tribunaları mümkün faciələr üçün açıq meydandı. Bu üzdən nazirliyi müsbət rəy vermədiyi üçün tənqid etmək yox, alqışlamaq lazımdı. Tənqid isə bugünədək hazırkı duruma göz yumanlara düşür. Mətbuat, gəncəli azarkeşlər illərdi haray çəkir, amma kimsənin tükü tərpənmir. İş reallığa gələndən sonra narahatlıq, malalama cəhdləri başlayıb.

Hazırkı durumda açıqlama verməsi lazım gələn Gənclər və İdman Nazirliyidi. Çünki stadion bu qurumun balansındadı, illərdi təmir işləri aparılmayıbsa, təmir üçün dövlət rəhbərliyi qarşısında məsələ qaldırılmayıbsa, nazirlik günahkardı. Bəlkə də məsələ qaldırılıb, başqa hansısa əngəllər ortaya çıxıb – bunu bilmirik, öyrənmək üçün müraciət etdiyimiz nazirliyin mətbuat xidməti isə zənglərimizə cavab vermir.

İndiki halda, AGİN-in də bəhanəsi var, nazirliyin yeni rəhbərliyi yəqin ki, günahı sələflərinin boynuna atacaq. Amma ən azı bundan sonrakı planlar barədə deməyə sözləri olmalıdı. “Kəpəz” in qaçqın həyatının nəvaxtadək davam edəcəyinə aydınlıq gətirə bilərlər.

Bu məsələdə AFFA-nı qınamağın yeri yoxdu. Qurum başqasının balansında olan stadionda ondan xəbərsiz təmir işi apara bilməzdi. Heç Gəncə stadionunun qazonunun dəyişdirilməsi də assosiasiyanın borcu deyildi, lakin illər öncə bunu ediblər. İndi isə küçələrdə qalan “Kəpəz”ə öz balanslarında olan “Dalğa Arena”da isti ocaq veriblər. AFFA-nın yeganə günahı illər boyunca nazirliklə işbirliyində olmamasıdı. Bəlkə də olmaq istəyiblər, qarşı tərəf müsbət yanaşmayıb?

Hadisəyə ən maraqlı reaksiyanı Gəncənin Milli Məclisdəki təmsilçisi Naqif Həmzəyev verib. Deputat qol.az-a açıqlamasında günahkarları göstərmədən, öz təşəbbüslərindən söz açmadan, çıxış yolları tövsiyə etmədən ümumi sözlərlə özünü canıyanan kimi qələmə verib: “Kəpəz”in Premyer Liqaya çıxması bizi çox sevindirdi. Ancaq təəssüflər olsun ki, aldığımız bu xəbər bütün “Kəpəz” azarkeşlərini, o cümlədən də bizi məyus etdi. Səbəbi tam olaraq bilinməsə də, ehtimal olunur ki, Fövqəladə Hallar Nazirliyinin Gəncə şəhər stadionunda müəyyən qüsurların olması haqda verdiyi rəyə əsasən komandanın ev oyunlarının Bakıda keçirilməsi qərara alınıb. Bu da “Kəpəz” və onun azarkeşləri üçün çox utancverici bir xəbərdir. “Kəpəz” Gəncənin komandasıdır və öz tarixi var. Buna görə də “Kəpəz”in ev oyunlarının kiçik sayda – 1000-1500 azarkeşin iştirakı ilə Gəncədə keçirilməsi yaxşı olardı. Çünki “Kəpəz” həmişə öz gücünü azarkeşlərdən alıb. Bu baxımdan da mən AFFA rəsmilərindən və aidiyyatı qurumlardan xahiş edirəm ki, “Kəpəz” azarkeşlərinin istəyini nəzərə alaraq az bir sayda tamaşaçı iştirakı ilə komandanın ev oyunlarının məhz Gəncədə keçirilməsinə icazə verilsin. Belə olacağı təqdirdə bu, digər klublar üçün də maraqlı olacaq və Azərbaycan Premyer Liqası təkcə Bakıda yox, bölgədə də keçiriləcək. Klublar avtobus və ya təyyarə ilə Gəncəyə səfər edər. Bu, çox maraqlı olar və ümumilikdə Azərbaycan futboluna töhfə verər. Son illər “Kəpəz”in ev oyunları həmişə Gəncədə keçirilib. Yalnız iki sektor qəzalı olduğu üçün ora tamaşaçılar buraxılmırdı. Ancaq indiyədək heç bir ciddi problemlə qarşılaşmamışıq. Düşünürəm ki, ilk oyuna çatmasa da, növbəti ev matçları mütləq Gəncədə keçirilməlidir. Belə olmasa, “Kəpəz”dən istədiyimiz nəticəni ala bilməyəcəyik və növbəti uğursuzluqla qarşılaşacağıq”.

Həmzəyev sanki statusundan yararlanaraq təzyiq etməyə, qərarın dəyişilməsinə nail olmağa cəhd edir. Problemin səbəbini araşdırmır, günahkarları göstərmir, sadəcə, “belə olmalıdı” deyə ağıl verir. Görəsən, sabah stadionda hansısa faciə baş versə, kimsə dünyasını dəyişsə, hörmətli deputat nə deyəcək, məsuliyyətin altına girəcəkmi?

Belə populist, tələbedici formada danışmaqdansa, Naqif bəy öz fəaliyyətinin hesabatını versin. O, 3 il Gəncədə İcra Hakimiyyəti Başçısının müavini vəzifəsində çalışıb, 7 ildi millət vəkilidi. Bu müddətdə Həmzəyevin Gəncə stadionu ilə bağlı məsələ qaldırdığını, Milli Məclisdə təklif irəli sürdüyünü görməmişik. Yanğın başlayandan sonra kənarda durub ağıl verməklə deyil, yanğın başlamamış onun olmaması üçün çalışmaq lazım idi.

AFFA-ya təzyiq etmək, FHN-in rəyini dəyişdirməyə çalışmaq lazım deyil. 1000-1500 azarkeşin otura biləcəyi müvəqqəti yer düzəltməklə də olmur, Gəncə stadionu ilə bağlı ciddi tədbirlər görmək lazımdı. Bölgə klubları Premyer Liqaya Bakıda oynamaq üçün buraxılmayıb.