“Neftçi” ilə “Qarabağ”ı müqayisə edə bilmərəm” – “Aris”in futbolçusu

Avropa Konfrans Liqasında “Neftçi”nin rəqibi olan Kiprin “Aris” klubunun futbolçusu Yevgeni Yablonskinin futbolinfo.az saytına müsahibəsi

• Konfrans Liqasında “Neftçi” ilə üz-üzə gələcəksiz. Azərbaycan təmsilçisi haqqında məlumatınız var?
• Bütün diqqətimizi özümüzə yönəltmişik və ciddi şəkildə hazırlaşırıq. Əminəm ki, məşqçilərin rəqibi haqqında bütün lazımi məlumatları var, sadəcə onu bir az sonra bizə deyəcəklər. Ancaq bilirik ki, avrokuboklarda adi rəqiblər yoxdur. Bunlar həmişə çempionatlarında xeyli uğur qazanmış komandalar olur. Buna görə “Neftçi” ilə oyun üçün çox ciddi hazırlaşırıq.
• Kipr mətbuatında məlumat var idi ki, “Aris”in hədəfi böyükdür və xüsusi diqqət ayrılıb. “Neftçi” bu yolda sizin üçün necə rəqibdir?
• Başa düşürük ki, Konfrans Liqasında bütün rəqiblər çətindir. Əlbəttə ki, “Aris” olaraq hədəfimiz böyükdür. Çox məqsədyönlü və iddialı bir komandamız var, biz həmişə qazanmaq və bunun üçün səy göstərmək istəyirik. “Neftçi” avrokuboklar təcrübəsi zəngin olan klubdur.
• Azərbaycan futbolu haqqında məlumatınız varmı?
• Bu yaxınlarda, Belarus millisinin heyətində Azərbaycan millinin milli komandasına qarşı Millətlər Liqası matçlarında oynadım. Yaxşı hücum edə bilən komanda ilə üzləşdik. Bilirəm ki, həmin görüşlərdə “Neftçi”nin oyunçuları da iştirak edirdilər. Bir oyunda heç-heçə etdik, birində uduzduq. Nəticələr qismən Azərbaycan futbolu haqqında danışır.
• BATE-nin heyətində “Qarabağ”a qarşı da çıxış etmisiz. Həmin oyunları necə xatırlayırsız?
• Bəli, oynadım, amma düşünmürəm ki, “Qarabağ” və “Neftçi” eyni paraleldə olan klubdur. Ümumiyyətlə, “Qarabağ”la “Neftçi”ni müqayisə etmək fikrində deyiləm. Biz “Qarabağ”la Çempionlar Liqasının 3-cü təsnifat mərhələsində oynamışdıq və çox çətin olmuşdu.
• Azərbaycanda həmyerlin Aleksey Baqa işləyir. O, “Sumqayıt” klubunda baş məşqçidir. Baqa ilə hansısa danışığınız olmayıb?
• Yox, onunla danışmamışam. Məşqçilər heyəti bütün lazımi məlumatları bizə çatdıracaq. Oyunçuların digər vəzifələri var.
• Şansları necə qiymətləndirirsiniz?
• Proqnoz verməyin mənası yoxdur. İşləmək və hədəflərinizə getmək lazımdır.

FƏRİD