“Neftçi”dən yenə gedən olacaq

Sezar Meza Kolli, Vato Arveladze və Mert Çeliklə yollarını ayıran “Neftçi” daha iki futbolçunu yola salmağa hazırlaşır. Tezliklə Aqil Məmmədov və Voislav Stankoviçlə bitən müqavilələrin müddətinin uzadılmadığı elan olunmalıdır.

Futolinfo.az xəbər verir ki, serb müdafiəçi haqda qəti qərar verilməməsi yeni mərkəz müdafiəçisinin alınmaması ilə bağlıdır. Vida edilən futbolçular əsas heyət üzvü deyildi və bu üzdən getmələrində problem yoxdur, Stankoviç isə start “11-liy”inin üzvüdür. Bu üzdən onun yerinə transfer edilməyincə getməsi risklidir. “Neftçi” rəhbərliyi Voislavı ən azı ehtiyat qüvvə kimi saxlaya bilər. Komanda hazırlığa başlayıb, heyətə yeni futbolçu cəlb edilməyib, bir həftədən sonra isə Rusiyada turnir başlayacaq.

Aqil Məmmədovla vida daha realdır. “Araz-Naxçıvan”a gedəcək təcrübəli qapıçı onsuz da yeni müqavilə bağlanan İvan Brkiçin kölgəsində qalır. Üstəlik, Emil Balayev “Səbail”dən məhz bakılılara qoşulmaq üçün ayrılıb. Yəqin ki, klubda baş məşqçi ilə bağlı müəmmalı durum bitən kimi həm onun, həm də “Qarabağ”dan ayrılan Filip Ozobiçin transferi elan olunacaq.

Ən maraqlı vəziyyət Emin Mahmudovla bağlıdır. Yeni müqavilə imzalamayan kapitan “Neftçi”dən yüksək maaş istəmişdi. Son təklifini futbolçunun diqqətinə çatdıran bakılılar həmin vaxtdan onunla maraqlanmır. Artıq yarımmüdafiəçi də bundan narahat olub. Qarşıdakı iki gündə o da qərarını verməlidir.

Ümumiyyətlə, həm məşqçi təyinatı, həm də transferlər çox yubanır. Növbəti 2-3 günün çox hərəkətli keçəcəyi gözlənilir. Bakılılar bir neçə legioneri və yerli futbolçunu gözaltı edib. Baş məşqçi ilə bağlı qərar verilən kimi heyətin komplektləşdirilməsi prosesi başlamalıdır.