Nihad ümidini itirmir: “Bu müddətdə çox işlər görmüşük”

“Sumqayıt” klubunun gənc futbolçusu Nihad Əhmədzadənin futbolinfo.az saytına müsahibəsi

– Misli Premyer Liqasının XXVII turunda “Sabah”la vacib görüşdə uduzaraq (1:2), ikinci yeri tərk etmək məcburiyyətində qaldınız. Doğma meydanda keçirdiyiniz oyundan xal və ya xallarla ayrılmağınıza nə mane oldu?

– Oyun baxımından üstünlük, məncə, bizim tərəfdə idi. Sadəcə, öz səhvlərimizdən qollar buraxdıq. Bunun nəticəsində də meydanı xalsız tərk etmək məcburiyyətində qaldıq.

– Adətən məşqçilər bu cür vacib matçlarda gənc oyunçulara şans vermirlər. Amma Samir Abasov sizə güvəndi və start heyətdə meydana buraxdı. Bu barədə nə deyə bilərsiniz?

– Baş məşqçimiz Samir müəllimə öz təşəkkürümü bildirirəm. Bu cür önəmli, 6 xallıq oyunda mənə şans verdiyi üçün ona minnətdaram. Əlimdən gələnin ən yaxşısını etməyə çalışdım.

– Fasilədə əvəzlənməyiniz baş məşqçinin oyununuzdan narazı qalması ilə bağlı oldu, yoxsa hesabda geri düşməyinizlə? İlk yarıdakı çıxışınızdan özünüz razı qaldınız?

– İlk yarıda hesabda geriyə düşməyimiz bizə çətinlik yaratdı. Buna görə də oyunu dəyişmək üçün məndən daha təcrübəli komanda yoldaşlarım meydana daxil oldu. Belə matçlarda iştirak etməklə təcrübəmi artırıram. Təcrübə toplamaq mənim üçün çox vacibdir.

– Çempionatda 3 dövrə artıq geridə qaldı. 27 tura ümumi nəzər salsaq, komandanızın çıxışı haqda hansı fikirdəsiniz?

– Bu müddətdə çox işlər görmüşük, qələbələr qazanmışıq, yaxşı oyun nümayiş etdirmişik. Düzdür, uduzduğumuz oyunlar da olub. Amma heç vaxt ümidsizliyə qapılmamışıq.

– Növbəti turda “Araz-Naxçıvan”ı qəbul edəcəksiniz. Rəqibi Sumqayıtdan xalsız yola sala biləcəksiniz?

– Artıq 4-cü dövrə start götürəcək. Digər görüşlər kimi, “Araz-Naxçıvan”la oyun da bizim üçün böyük önəm kəsb edir. Əlimizdən gələni edib doğma azarkeşlərimizin önündə 3 xal qazanacağımıza, meydanı qələbə ilə tərk edəcəyimizə inanıram.

– Mövsümü ikinci pillədə bitirmək şansınız var. Sizcə, bu imkandan faydalanmaq mümkün olacaq?

– Qarşıda 9 oyun var və “Qarabağ”ı çıxmaq şərti ilə liqadakı əsas rəqiblərimizlə aramızda 1-2 xallıq fərq var. İkinci pilləni tutacağımıza inamımız böyükdür. Bunu bacarmaq üçün sonadək mübarizə aparacağıq.

– Tədricən “Sumqayıt”ın aparıcı oyunçusuna çevriləcəyinizə, növbəti mövsümdə daha çox oyun praktikası əldə edəcəyinizə inamınız varmı?

– Bəli, bunu bacaracağıma və liqada bu cür oyunlara çıxmaqla daha çox təcrübə əldə edəcəyimə çox inanıram.

FƏRİD