Müsahibə
Nuriyev məşqçiləri müqayisə etmir: “Renduliçlə hədəflərimizə çatacağıq”
“Sabah” klubunun yarımmüdafiəçisi Anatoli Nuriyevin futbolinfo.az saytına müsahibəsi
– Ölkə çempionatının 27-ci turunda səfərdə “Sumqayıt” üzərində vacib qələbə qazandınız və turnir cədvəlində 2-ci pilləyə yüksəldiniz. Oyunla bağlı nə deyə bilərsiniz?
– İlk hissədə yaxşı oynadıq. Komanda kompakt mübarizə apardı. Bunun da nəticəsində fasiləyədək hesabda önə keçdik. Fasilədən sonra o qədər də yaxşı oynamadığımızı deməliyəm. Qol fürsətlərimiz daha az oldu. Amma yaxşı ki, ikinci qolu vura bildik. Bunun da nəticəsində oyundan 3 xalla ayrılmağı bacardıq.
– “Sabah”ın ilk qolunun müəllifi siz oldunuz. Meydanda olduğunuz 75 dəqiqə ərzində sərgilədiyiniz oyunu necə qiymətləndirirsiniz?
– Öz oyunumu dəyərləndirməyim düzgün olmazdı. Meydana çıxanda komandama maksimum faydalı olmağı düşünürəm. Bunun üçün əlimdən gələni edirəm. Əsas komandanın qələbəsidir, qolu kimin vurmasının əhəmiyyəti yoxdur.
– Yeni baş məşqçiniz Krunoslav Renduliçin rəhbərliyi altında keçirdiyiniz hər iki oyunda qələbə qazanmısınız. Onunla bağlı fikirləriniz necədir? Renduliç İqor Ponomaryov və Murad Musayevdən hansı xüsusiyyətinə görə fərqlənir?
– Əlbəttə ki, bu seriya xoşdur və hər birimizi sevindirir. İnanıram ki, Renduliçlə hədəflərimizə çatacağıq. Məşqçiləri müqayisə etmək istəməzdim. Hər birinin üstün cəhətləri var.
– Misli Premyer Liqasının 28-ci turunda “Zirə”ni qəbul edəcəksiniz. Bu görüşdə şansları necə dəyərləndirirsiniz?
– “Zirə” ilə oyunlarımız həmişə çətin keçir. Bu mövsüm baş tutan hər 3 oyun 1:0 hesabı ilə başa çatıb ki, bu da dediklərimə sübutdur. Çətin oyun olacaq. Amma qalib gəlmək üçün əlimizdən gələni edəcəyik.
– Mövsümün sonuncu dövrəsinə 2-ci pillədə daxil olursunuz. Çempionatda qalan 9 oyunda hazırkı mövqeyinizi qoruya biləcəksiniz?
– Bəli, qarşıda 9 oyun var. Bu oyunlardan maksimum nəticə ilə ayrılmaq lazımdır. Məqsədimiz hazırkı mövqeyimizi qorumaqdır. Bunun üçün çalışacağıq.
– Millinin təlim-məşq toplanışına çağırılan futbolçular sırasında yer almadınız. Bunun səbəbini nədə görürsünüz və yığmadan dəvət gözləyirdinizmi?
– Çempionatda bir neçə oyunu buraxmalı oldum. Buna görə də dəvət almamağım məni təəccübləndirmədi. Yığmamıza qarşıdakı oyunlarda uğurlar arzulayıram.
FƏRİD
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Digər idman növləri2024-04-12 00:29
“Anadolu Efes” növbəti mərhələdə
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”