Oyuncaq klubun oyuncaq məşqçiləri

Əslində, hər şey göz önündədi. Rəsmiyyət naminə təyinatlar edildi, çoxdan bildiklərimiz rəsmiləşdi. Amma nə olsun? Guya məşqçilər heyəti müəyyənləşməklə “Şamaxı” klubmu oldu?

“Şamaxı” bu gün açıqlama yayaraq komandaya rəhbərlik edəcək məşqçilər heyətini elan edib. Guya ki, Vüqar Əsgərli baş məşqçi, Cavid Hüseynov, Rüstəm Əliyev və Elhad Nəziri isə köməkçilər olacaq. Alqışlayırıq, “xeyirli olsun” deyirik. Eyni zamanda “yalanınız özünüzə qalsın, bizi aldada bilməzsiz” söyləyirik.

Cavid Hüseynovun “Şamaxı”nın baş məşqçi postuna təyinatı mümkünsüzdü, B kateqoriyasına malik biri Premyer Liqa klubunda o posta əyləşə bilməz. Əsasnamə bunu qadağan etdiyindən, şamaxılılar PRO kateqoryalı Vüqar Əsgərlini baş məşqçi kimi göstərməyə məcburdu.

Deməli, klubda söz sahibi Hüseynov olacaq, Əsgərli isə sənədindən istifadə edilməsi üçün lazım bilinən biridi. Bu plan ifşa olunduğu üçün “Şamaxı” rəhbərliyi ictimaiyyəti yox, özünü aldatdığının, ələ saldığının fərqində olsun. Əks halda, böyük futbolda heç bir uğuru olmayan, daim qadın futbolçularla işləmiş Vüqar birdən-birə “Şamaxı”ya niyə baş məşqçi təyin edilsin ki?

Deyəsən, bu durumdan məşqçilər özü də narahat deyil. Əsgərli yalançı rəhbər statusu ilə barışıb köməkçisi Cavid Hüseynovun əmrlərini yerinə yetirəcəksə, elə daim kölgədə yatacaq, böyüməyəcək. Ən gülməlisi mövsümün gedişində olacaq, komanda uğursuzluqları sıralayandan sonra günah keçisi axtarılacaq və baş məşqçi yox, hər şeyə cavabdeh olan köməkçi istefaya göndəriləcək.

Oyuncaq klub təsiri bağışlayan “Şamaxı”nın məşqçilər korpusunda, deyəsən, heç kim özünə hörmət etmir. Elə olmasaydı, dünənədək rəsmi baş məşqçi olan Rüstəm Əliyev maaş xatirinə indiki roluna razılaşmazdı. Təsəvvür edin, ötən mövsümün sonunu əvəzləyici kimi keçirən, iyunda bu posta təyinat alan Rüstəm bəy indi qarşılıqlı razılıqla vəzifədən gedir və köməkçi olmağa razılaşır. Rütbə endirilməsini necə bir utanc olduğunu hamı bilir. Amma Əliyev maaş xatirinə bununla razılaşır, qadın futbolçularla işləmiş birinin köməkçisi, məşqçi təcrübəsi olmayan digərinin əmr qulu olmağa razılaşır.

İndi belə bir məşqçilər korpusunun bir amal uğrunda səmimi qəlbdən birləşdiyini düşünün. Sizcə, mümkündümü? “Şamaxı” klubunun gözəgörünməz rəhbərliyi işə bu qədər “peşəkarlıqla” başlayıbsa, sabahı özünüz təsəvvür edin.

“Şamaxı” “Futbolinfo”nun bir ay öncə yaydığı xəbəri də rəsmən təsdiqləyib. Bəli, Kamran İsmayılov klubun baş meneceri olacaq. Həmin Kamran ki…

…Unikal aktyorlar seçilib, maraqlı tamaşalar olacaq.

FƏRİD