Polşadakı “trio”muzun üzvü – Mahirlə Antona kömək etməyə hazırdı

Polşanın “Ostroveç-Sventokşiski” klubun azərbaycanlı futbolçusu Fuad Bayramovun futbolinfo.az saytına müsahibəsi

• Fuad, klubunla kubok qazanmısan…
• Final oyunumuz çox ağır keçdi. Şükürlər olsun ki, qalib gəldik və kuboka yiyələndik. Çempionat isə sabah başa çatacaq. Finalda qol vurduğum üçün də çox sevinirəm. Ən azından komandaya köməyim dəyib. Öz bayrağımızla başqa ölkədə kubok qazanaraq kürsüyə çıxmaq mənim üçün qürurverici idi. Belə nəticə gözləyirdim ki, Azərbaycan bayrağını dalğalandırım.
• Sənin oynadığın çempionatı Azərbaycan Premyer Liqası ilə necə müqayisə etmək olar?
• Əsas liqa olmadığı üçün səviyyə aşağıdır. Amma həqiqətən bura futbol oynamaq üçün əla yerdir. Stadionların ot örtüyü təbii və çox gözəldir. Təsəvvür edin ki, buradan Robert Levandovski kimi ulduz çıxıb. Onun komanda yoldaşı olmuş futbolçu hazırda mənimlə birlikdə çıxış edir. Təşkilatçılıq üst səviyyədədir. İstər kubok, istər çempionat matçlarında hər şey əla təşkil edilir. Sadəcə 3-cü liqa deyiləndə hamı fikirləşir ki, çox zəifdir. Amma həqiqətən elə deyil. Burada fiziki cəhətdən daha üstün və aqressiv futbola üstünlük verilir.
• Tribunalarda azarkeşlər var?
• Oyuna çox sayda insan gəlir. Əvvəl kroonavirusa görə icazə yox idi, amma indi var. Gəlirlər tərəfdarlar, skautlar və s. oyunları izləyirlər.
• Milli komandamızın üzvü Mahir Emreli “Legiya”, Anton Krivotsyuk isə “Visla Plok” klubuna keçib. Səncə, onlar uğur qazana biləcəklər?
• Fikrimcə, hər ikisi burada uğurlu olacaq. Niyə də olmasınlar?
• Polşaya gələndə onlarla danışdın və ya qarşıladınmı?
• Yox, mən şəhərdən 200 km uzaqdayam. Bir də çox sıx qrafikimiz var. Oyunlarımızın sayı çoxdur. Antonla heç bir tanışlığım yoxdur. Heç münasibətimiz olmayıb. Amma Mahirlə U-21-də oynamışıq, çempionatda üz-üzə gəlmişik. Salam-sağolumuz var.
• Heç bir danışığınız da olmayıb?
• Yox, amma yəni hansısa köməyə ehtiyacları olsa, daim kömək etməyə hazıram. Yəqin ki, burada görüşəcəyik.
• Oynadığın klubda əsas heyət oyunçularındansan. Yuxarı liqalardan təklif gözləyirsən?
• Yaxın günlərdə olacaq. 1-ci və 2-ci liqalardan təkliflər olsa da, hələ heç nə dəqiqləşməyib. Ümid edirəm ki, ən yaxşısı olacaq.

CAVAD