Ölkə futbolu
Ponomaryovun “Sabah”ı – 6 qol, 6 xal
“Sabah” bəlkə də yeni baş məşqçini təyin etməyə tələsdi. Nəticələr əladı, Ramin Quliyev gedəni qələbləri sıralayırlar. İdman direktoru İqor Ponomaryov əvəzedici kimi daha yaxşı işləyir, komandanın hesabına yazılan 7 xaldan 6-nın memarıdı.
Bugündən Murad Musayev fəaliyyətə başlayır. Yeni təyin olunan rusiyalı yəqin ki, oyun sisteminə əl gəzdirəcək, heyətdə müəyyən dəyişikliklər edəcək. Beləsə işlər relsə düşmüşkən yenə nələrsə başqa cür olacaq. Amma rəhbərlik qərarını verib, müvəqqəti baş məşqçiylə davam etmək də mümkün deyil, Musayevin sərgüzəştləri başlayır. Bu təyinatın nə qədər uğuru olacağını zaman göstərəcək.
9-cu turun dünən baş tutan ilk oyununda turnir vəziyyətinə görə favorit “Qəbələ” idi. Amma heyətdəki itkilər üzündən bölgə təmsilçisi çətin duruma düşmüşdü, bu da “Sabah”ı önə çıxarmışdı. Bakılılar əla fürsəti qaçırmadı.
Əslində, meydan sahibləri oyuna yaxşı başlamışdı. Heyətdəki itkilərə baxmayaraq, əla start götürən “Qəbələ” 5-ci dəqiqənin tamamına kimi Fernan Lopesin ifasında 2 yüzfaizli şansı boşa verdi. Belədə özünə gələn qonaqlar təşəbbüsü ələ aldı və tezliklə hesabı açdı. “Sabah” ilk qola görə rəqib qapıçıya da minnətdar olmalıdı. Məhz dünənki rəqibindən icarəyə götürülən Nicat Mehbalıyevin kobud səhvindən sonra hesab açıldı, hissə bitməmiş daha bir fərdi səhv növbəti qolla nəticələndi – bu dəfə heyət sıxıntısı üzündən məcburiyyətdən “11-liy”ə salınan Hüseyn Mürsəlov rəqibiylə mübarizədən məğlub ayrıldı.
“Sabah” ruhdan düşən “qırmızı-qaralar”ın dönüş yaratmasına imkan vermədi. Üstəlik, 63-cü dəqiqədə Aleksey İsayev baxımlı zərbəylə seçildi, ötən tur olduğu kimi, yenə məhsuldarlıqlarını 3 qolla ifadə etdilər. “Qəbələ”nin penaltidən vurduğu təsəlli qolu isə heç nəyi dəyişmədi. Komandaların turnir cədvəlindəki mövqeyi də olduğu kimi qaldı – meydan sahibləri 3-cü, “Sabah” sonuncu pillədədi.
Əvəzində “Sumqayıt”la “Səbail” yerini dəyişdi. “Kimyaçılar” 6 oyunluq fasilədən sonra qələbə qazandı və maraqlıdı ki, bunu yenə 2:0-la reallaşdırdı. Qol vurmaqla bağlı problem yaşayan meydan sahibləri cərimə zərbəsi ilə tilsimi qırdı, fasilədən sonra Səid Rza yeni klubunda qol hesabını açdı.
“Kimyaçılar”ın daha istəkli olması, daha əzmkar oynaması öz yerində, lakin hakim qərarlarına da diqqət yetirmək lazımdı. Ötən tur haqqı yeyilən sumqayıtlıların kəskin etirazları deyəsən, hakimlərin gözünü qorxutmuşdu. Hesab 0:0 olarkən Nikolas Rayselə qarşı kobudluqdan əvvəl ofsayd bayrağının qalxması, bu oyunçunun ikinci hissədə meydandan qovulması diqqətçəkən oldu. Həmin epizodların videotəkrarına baxmaqda fayda var.
Tur yekunlaşdı, daha bir heç-heçəsiz həftəni başa vurduq. “Neftçi”nin məğlubiyyətsiz, “Sumqayıt”ın qələbəsiz oyunları bitdi, turnir cədvəlində liderlər qrupuyla ikinci “dördlük” arasında xal fərqi 4-ə çatdı.
FƏRİD