Ölkə futbolu
Premyer Liqanın debütantları
Misli Premyer Liqasının cari mövsümündə indiyədək 8 futbolçu debüt edib. 6 komanda öz yetirmələri üçün debüt imkanı yaratdığı halda, digər klublarda bu hal müşahidə olunmayıb. “Qarabağ”, “Neftçi”, “Zirə” və “Qəbələ”də ölkə çempionatının 2023/2024 sezonunda hələ ki, heç bir oyunçu debütant adına yiyələnməyib.
“Qarabağ”a ağır məğlubiyyətdə üzə çıxan debütant
“Sumqayıt”ın baş məşqçisi Samir Abbasov bu mövsüm 1 futbolçuya Premyer Liqada ilk oyununa çıxmaq üçün şərait yaradıb. Söhbət Sənan Muradlıdan gedir. 2006-cı il yanvarın 4-də dünyaya göz açan Muradlı yarımmüdafiəçi mövqeyində çıxış edir.
2-ci turda ehtiyat oyunçular skamyasında əyləşən Sənan bir də bu şansı 10-cu turda əldə edib. Çempionatda debütü isə 16-cı tura təsadüf edib. “Sumqayıt”ın “Kapital Bank Arena”da “Qarabağ”a 1:6 hesabı ilə uduzduğu oyunda baş məşqçi Samir Abasov yetirməsinə debüt imkanı verib. Dekabrın 8-də baş tutan həmin görüşə çıxarkən Sənanın 18 yaşı hələ tamam olmamışdı. 86-cı dəqiqədə Roi Kehatı əvəzləyən Muradlı matça əlavə olunan 2 dəqiqəni də nəzərə alsaq, ümumilikdə 6 dəqiqə meydanda olub. Növbəti oyunlarda ehtiyatda qalan Sənana hələ ki ikinci dəfə ehtiyac duyulmayıb.
“Səbail”də yeni simalar
“Səbail”in çalışdırıcısı Şahin Diniyev cari mövsümdə 2 gənc futbolçuya ilk dəfə Premyer Liqada meydana ayaq basmaq imkanı yaradıb. Bunlar Taleh Qarayev və Ayaz Mikayılovdur.
2003-cü il oktyabrın 27-də anadan olan Taleh Qarayev XVI turda “Sabah”la görüşdə debüt edib. O, “dənizçilər”in 0:4 hesablı məğlubiyyəti ilə nəticələnən qarşılaşmanın 78-ci dəqiqəsində oyuna qoşulub və matça əlavə olunan vaxtları da nəzərə alsaq, ümumilikdə 15 dəqiqə meydanda olub.
23.03.2004 təvəllüdlü Ayaz Mikayılov isə 1 tur sonra, yəni XVII turda “Qəbələ” ilə qarşılaşmada debüt edib. O, “Səbail”in 3:0 hesablı qələbəsi ilə nəticələnən matçın 73-cü dəqiqəsində oyuna daxil olub və əlavə vaxtlarla birlikdə ümumilikdə 19 dəqiqə meydanda qalıb.
Sonrakı matçlarda bu futbolçular meydan üzü görməyiblər.
“Turan Tovuz”un da debütantı var
Premyer Liqanın cari mövsümündə gənc futbolçuya debüt imkanı yaradan məşqçilərin sırasında Ayxan Abbasov da var. Təcrübəli çalışdırıcı XI turda “Kəpəz”ə 4:0 hesabı ilə qalib gəldikləri oyunda bu addımı atıb. Həmin görüşdə tovuzluların oyunçusu Cavid Qasımov ilk dəfə yüksək dəstədə meydana çıxıb.
2005-ci il avqustun 30-da dünyaya göz açan Cavidin debütü 2023-cü il 28 oktyabr tarixinə təsadüf edib. 83-cü dəqiqədə Xəyal Nəcəfovu əvəzləyən Qasımov əlavə vaxtla birlikdə 10 dəqiqə meydanda olub. Hələlik Premyer Liqada ikinci oyununu keçirmək ona qismət olmayıb.
“Sabah”ın gerçəkləşən Xəyalı
“Sabah” da bu sezon Azərbaycan Premyer Liqasına yeni ad bəxş edib. Söhbət 18.02.2004 təvəllüdlü yarımmüdafiəçi Xəyal Əliyevdən gedir. Aleksey İsayevin “Qarabağ”a gedişi və idman direktoru İqor Ponomaryovun müvəqqəti olaraq baş məşqçi postuna keçidindən sonra Xəyal elitada debüt etmək şansı qazanıb. Onun üçün Misli Premyer Liqasının 21-ci turunda “Turan Tovuz”a qarşı matç (1:1) əlamətdar olub. 1:1 hesabı ilə nəticələnən qarşılaşmanın 64-cü dəqiqəsində Kahim Parrisi əvəzləyən Xəyal matça əlavə olunmuş dəqiqələri də əlavə etsək, ümumilikdə 30 dəqiqə meydanda olub.
Əliyev debüt etməklə yanaşı, növbəti görüşü keçirmək, üstəlik start heyətində yer almaq şansını da artıq əldə edib. Belə ki, XXIII turda “Sabah”ın “Kəpəz”ə 3:2 hesabı ilə qalib gəldiyi oyuna Xəyal ilk “11-lik”də çıxıb və 90+2-ci dəqiqədə yerini Tellur Mütəllimova verib. “Səbail”ə 0:2 hesabı ilə uduzduqları matça da Xəyal Əliyev start heyətdə başlayıb və 67 dəqiqə meydanda olub. Son turda daha 15 dəqiqə oynayan Xəyalın Premyer Liqada oyun praktikası 200 dəqiqəni keçib.
İlk turda debüt edən Bayraməli
Cari mövsümdə Premyer Liqada ən erkən debüt isə “Araz-Naxçıvan”da baş verib. İlk turda “Turan Tovuz”a 0:3 hesablı məğlubiyyətdə Naxçıvan klubunun futbolçusu Bayraməli Qurbanov yüksək dəstədə debüt etmək imkanı qazanıb. O, 85-ci dəqiqədə Nuno Rodriqesi əvəzləyib və görüşün əlavə vaxtı da daxil olmaqla, 10 dəqiqə meydanda olub. Sonrakı oyunlarda da meydanda görünən Bayraməli Premyer Liqada ümumilikdə 143 dəqiqə oynayıb.
Debütlə kifayətlənən və kifayətlənməyən “Kəpəz”lilər
“Kəpəz”in heyətində isə 2023/24 sezonunda 2 futbolçu Misli Premyer Liqasında debüt edib. Bunlar Cavad Kərimov və Nicat Verdiyevdir.
Cavadın debütü ilk turdaca baş verib. “Neftçi” ilə Gəncə şəhər stadionunda keçirilən qarşılaşmanın (1:0) 90+3-cü dəqiqəsində meydana ayaq basan Kərimov 4 dəqiqə oyunda olub. Sonrakı turlarda da meydan üzü görən Cavad Premyer Liqanın cari sezonunda ümumilikdə 15 matçda iştirak edib. Onun meydanda olduğu ümumi müddət 293 dəqiqədir.
Nicat Verdiyevin debütü isə 4-cü turda “Qarabağ”la səfər matçına (1:1) təsadüf edib. 90-cı dəqiqədə meydana buraxılan Verdiyev 4 dəqiqə oyunda olub. Həmin görüşdən sonra Nicata hələ ikinci şans verilməyib.
ABBAS
- Premyer-liqa2024-04-14 20:55
“Qarabağ” “Sabah”a uduzdu
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı