Ölkə futbolu
“Qəbələ” Gürcüstan millisinin sabiq baş məşqçisinə tapşırılır
“Qəbələ”nin yeni baş məşqçisi tezliklə müəyyənləşəcək. Premyer Liqanın son turunda “Kəpəz”ə məğlubiyyətdən sonra istefa verən Elmar Baxşıyevin xələfi böyük ehtimalla əcnəbi mütəxəssis olacaq.
Futbolinfo.az xəbər verir ki, 15 xalla turnir cədvəlinin son pilləsində qərarlaşan və ən yaxın rəqibindən 8 xal geridə olan bölgə təmsilçisi Kaxaber Sxadadze ilə danışıqlar aparır. Gürcü mütəxəssis çətin vəzifənin öhdəsindən gəlmək üçün risk etməyə razıdır. Amma yekun qərar qarşıdakı həftə ərzində veriləcək.
Ötən mövsüm “Şamaxı”ya rəhbərlik edən Cavid Hüseynovun təyinatı da müzakirə edilir. Futbolçu kimi karyerasının ən parlaq dönəmlərini “Qəbələ”də keçirmiş gənc mütəxəssis, hazırda II Liqada çıxış edən “Cəbrayıl”a rəhbərlik edir. Amma klub rəhbərliyi hazırkı durumda təcrübəli birinə güvənmək istədiyindən, seçim çox güman, Sadadzenin lehinə ediləcək.
Kaxaber ötən ilin aprelindən bəri işsizdir. Qazaxıstan “Kaspi”sindən ayrılan məşqçi, yaxınlarda Mahaçqala “Dinamo”sunu tərk edən Kurban verdıyevin xələfi olmaqdan imtina edib. Tsxadadze Azərbaycanda 1 il “Standard”a, 6 il “İnter”ə (indiki “Şamaxı”) rəhbərlik edib, ölkə çempionluğunu (2009/10)qazanıb. O, vətənində və Qazaxıstanda bir sıra klublarda çalışıb, 2015-16-cı illərdə Gürcüstan millisinin baş məşqçisi olub.