Ölkə futbolu
“Qəbələ” liderlər, “Keşlə” autsayderlər qrupunda möhkəmlənir
“Qəbələ” uğurlu çıxışını davam etdirməklə liderlər qrupuna təsadüfən düşmədiyini isbatlayır. Heyətdə ciddi itkilərə rəğmən, bölgə təmsilçisi nəticələrini sabitləşdirir.
Son turlar özünə gələn “Keşlə” ikinci dövrənin startındaca uduzdu. Sadio Tounkaranın heyətə qaytarılmasıyla oyunu nuzama düşən paytaxt təmsilçisinə dünən bu legionerin əzmkarlığı da kömək olmadı. İlk dəqiqələrdən üstünlüyü ələ keçirən qonaqlar vacib anlarda qollar vurmaqla qələbəni təmin etdi. Yarım saatın tamamında Ruan Renato künc zərbəsindən sonra fərqləndisə, Asif Məmmədovun ağıl dolu vuruşla hesabı dəyişməsini görməyə dəyərdi.
Fasilə ərəfəsində Məqsəd İsayevin səhvi “Keşlə”nin ümidlənməsinə səbəb oldu. Amma İsnik Alimi 59-cu dəqiqədə qarşılaşmanın taleyini böyük ölçüdə həll etdi. Hətta “Qəbələ”nin azlıqda qalması da meydandakı qüvvələr nisbətinə ciddi təsir etmədi. Baş məşqçi Elmar Baxşıyev vacib əvəzetmələrlə əks-hücum taktikası seçib “Keşlə”nin rahatlaşmasına imkan vermədi. Sənan Qurbanovun hücumu gücləndirməsi yalnız son saniyədə hesab arasındakı fərqin minimuma enməsinə yaradı.
Oyunda daha bir maraqlı epizod da elə son saniyədə yaşandı. Matçın hakimi Vüqar Həsənli Amil Yunanovun qolunu qeydə almadan qarşılaşmanı bitirdi. Epizod zamanı “Qəbələ”nin müdafiəçisi yerdə qaldı və qolun sayılmaması ehtimalı da var idi – referi isə nə qol, nə də qayda pozuntusunu işarə etmədi, top tora daxil olan kimi matçı bitirdi. Yalnız PFL-in saytına baxaraq hesabı aydınlaşdırdıq.
Həmin anda hesab 1:3 olduğundan qalibin kimliyi dəyişmədi. Amma bu zaman minimal fərq və ya heç-heçə də ola bilərdi. O zaman qol haqda qərarın verilməməsi qalmaqala səbəb olardı. AFFA Hakimlər Komitəsinin Həsənliyə qulaqburma verəcəyinə ümid edirik.
Ötən mövsümlərdə də idarəçiliyi söz-söhbətə səbəb olan Vüqar heç vaxt böyük hakim ola bilməyəcək. Sanki bu adamın beyninə oksigen getmir, bəzən elə qəribə qərarlar verir ki, məəttəl qalırsan. Hətta divizion səviyyəsinə uyğun gəlməyən bu referi dünənki matçda əksər qərarlarını göstərişlə verirdi, hansı komanda daha çox narazılıq etsə, ona uyğun davranırdı. Matçdakı bütün vərəqələr rəqibin ciddi narazılığından, vərəqə tələb etməsindən sonra göstərildi. İstənilən halda, hakim nəticəyə təsir edən səhvə yol vermədi, sadəcə, hərəkətləri, reaksiyaları, davranışı qıcıq doğurdu, əsəb yaratdı.
“Keşlə”nin uğurlu oyunlar seriyası bitdi, Sənan Qurbanovun kreslosu yenidən laxlamağa başladı. İlk turlara baxanda vəziyyət faciəvi deyil, lakin elə növbəti turda son pilləyə enmək qorxusu realdı. Komanda sabitliyə nail olmasa, liderlərlə xal fərqi artmağa davam edəcək. “Qəbələ” isə əksinə, ilk “üçlük”də möhkəmlənir. Qışda heyəti daha da gücləndirmək mümkün olsa, bölgə təmsilçisini yayda avrokubokda görəcəyik.
CAVAD