Ölkə futbolu
“Qəbələ” nəyə nail olmaq istəyir?
“Qəbələ” rəhbərliyi ofisində oturub və başqalarının onlar üçün döyüşməsini, haqqlarını müdafiə etməsini gözləyir. Matçlardan videoçıxarışlar edib yayır və ictimailəşməsini seyr edirlər.
Son turun “Qəbələ” – “Sabah” matçının ilk dəqiqələrində qonaqların qapısına penalti təyin edilməməsindən narazılıq var. Matçın 34-cü dəqiqəsindəki epizodda top qonaqların müdafiəçisinin əlinə dəysə də, hakimlər cərimə zərbəsi təyin etməyib. VAR-ın olmasına rəğmən, epizoda reaksiya verilməməsi müzakirə mövzusudu.
Epizod aydın görünmədiyindən qərar vermək çətindi. Bununla belə, VAR otağında əyləşənlərə inanmaq lazım gəlir. Bizim qənaətimizə görə, topa son anda “Qəbələ” futbolçusu başı ilə təmas etdiyindən, məsafənin yaxınlığı nəzərə alınaraq, belə qərar verilib. Amma ümumiyyətlə, bu məsələnin müzakirəsini mənasız sayırıq. Çünki…
Ötən tur bütün matçlardakı epizodları efirdə bir-bir incələyən AFFA Hakimlər Komitəsinin sədri Barış Şimşək bu dəfə susubsa, səbəb var. Onu danışdıran “Zirə”nin baş məşqçisi Rəşad Sadıqovun haqlı iradları idi. Hər nə qədər malalasalar da, səhvlər göz önündə idi. VAR protokoluna daxil olan məsələlər bir yana, hakimlərin oyunun gedişində, kiçik follarda, sarı vərəqə epizodlarında, lazımsız fitlərlə oyunun tempinun öldürülməsində hansı hoqqalardan çıxdığının fərqindəyik. VAR hakimlərin nəticəyə təsir etmək imkanlarını azaltsa da, tamamilə aradan qaldırmayıb.
Şimşəkin bu dəfə “çaxmamasının” səbəbi “Qəbələ” rəhbərliyinin susqunluğudu. Onların haqqını tələb etməyə cəsarətləri yoxdu, başqa üsullardan yararlanırlar. FARİZ Nəcəfov BARİZ epizodlardan özü danışmır, NAİL Kərimov istəyinə başqaları vasitəsilə NAİL olmaq istəyir. Ümid edirlər ki, ictimaiyyət, mətbuat onların əvəzinə məsələ qaldıracaq.
Halbuki belə olmur. Klub həqiqətən nədənsə narahatdısa, bu barədə özü məsələ qaldırmalı, klub saytında bəyanat verməli və ya rəsmilər mətbuat önünə çıxıb danışmalıdı. Ondan sonra jurnalistlər problemi araşdırmalı, haqlını müdafiə etməli, məsələni ictimailəşdirməlidi. “Qəbələ” rəsmiləri isə özlərini heç kimlə pis etmək istəmir, mətbuatdan dəstək gözləyir, bununla AFFA-ya təzyiq etmək məqsədi güdürlər.
Prosesin “Qəbələ”nin baş ofisindən idarə edildiyi gün kimi aydındı. Eyni vaxtda klubun 4-5 məşqçi və futbolçusu video paylaşır, sosial şəbəkədə müzakirəyə çıxarırsa, bu, təsadüf ola bilməz. NAİL olmaq istədikləriniz özünüzdə qalsın, həqiqətən xarakteriniz, peşəkar mövqeyiniz varsa, rəsmən açıqlayın, mətbuat araşdırsın, davamını gətirsin.
Kəmaləddin Heydərovun sahibi olduğu klubda bəlkə də video olayları dəbdədi. Amma ən doğrusu narazılıqları açıq ifadə etmək, ümumi futbolun inkişafı naminə problemləri qabartmaqdır. Yox, hər hansı narazılıq yoxdursa, futbolçular klubdaxili kodeksə uyğun cəzalandırılmalıdı. Çünki onların eyni vaxtda oxşar addımı atması “xüsusi kampaniya”ya bənzədi.
CAVAD
P.S.: Yoxsa bu, “Zirə”ylə vacib matçöncəsi AFFA-ya təzyiq metodudur?
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Ölkə futbolu2024-04-19 08:52
Yüksək əmsal “Qarabağ”a əlavə üstünlük verir
- Digər idman növləri2024-04-18 17:00
Şahmat Federasiyası yeni loqonun hazırlanması ilə bağlı müsabiqə elan etdi