Müsahibə
Qəbələ səfərindən çəkinən Rövlan: “Builki çempionat çox fərqlidir”
“Sumqayıt” klubunun yarımmüdafiəçisi Rövlan Muradovun futbolinfo.az saytına müsahibəsi
– Misli Premyer Liqasında qış fasiləsinə 4-cü pillədə yollandınız. Bu nəticə sizin üçün qənaətbəxşdirmi?
– Düşünürəm ki, bir çox oyunda bəxtsizlik yaşadıq, xal və ya xallar itirdik. Amma şükürlər olsun, bu gün də avrokuboklar uğrunda mübarizə aparırıq. Bu mənada çıxışımızı qənaətbəxş hesab edirəm.
– Çempionatın ilk yarısında müsbət və mənfi mənada unuda bilmədiyiniz oyunlar hansılardır?
– “Zirə”, “Neftçi” və “Sabah”la ilk oyunlar gözümün qarşısındadır. Bu matçlarda çox yaxşı mübarizə apardığımız halda, əfsuslar olsun ki, uduzmuşduq. Bu nəticələrə görə çox məyus olmuşam. Müsbət cəhətdən isə “Sabah” və “Neftçi” üzərindəki qələbələrimizi qeyd edərdim. Hər iki görüşdə çox yaxşı oyun göstərib layiqli qalibiyyət əldə etmişdik. “Araz-Naxçıvan”la qarşılaşmanı da müsbət oyunlar sırasına aid edərdim. Ümumiyyətlə, qələbə qazandığımız bütün matçlar yaxşı mənada yadımda qalıb.
– “Qəbələ”də olduğu kimi, “Sumqayıt”da da aparıcı futbolçulardan birisiniz və müxtəlif mövqelərdə oynamağı bacarırsınız. Hansı mövqedə çıxış edəndə özünüzü daha rahat hiss edirsiniz?
– Mən daha çox sərbəst mövqedə oynamağı, universal çıxış etməyi xoşlayıram. Bu, vingerdir, müdafiədir və ya orta xətdir – fərq etməz. Baş məşqçimiz, məşqçilər korpusu mənə hansı mövqedə güvənirsə, o mövqedə də əlimdən gələnin maksimumunu etməyə çalışıram. Bilirsiniz ki, neçə müddətdir sağ cinah müdafiəçisi kimi oynayıram. Bu, məşqçimizin qərarıdır və mən də əlimdən gələnin ən yaxşısını etməyə çalışıram ki, komandama xeyir verim. Məşqçilərimiz mənə harada nəyi necə etməli olduğumu hər zaman başa salırlar. Gündən-günə özümdə inkişaf hiss edirəm.
– Necə düşünürsünüz, çempionatdakı fasilə “Sumqayıt”ın xeyrinə olacaq, yoxsa ziyanına?
– Allahin izni ilə xeyrimizə olar. Mən buna ümid edirəm. Çempionatın ikinci yarısına da çox ciddi hazırlaşırıq. Antalyada intensiv məşqlərimiz davam edir. Fasilənin bizə müsbət təsir edəcəyinə, xeyrimizə olacağına inanıram.
– Qış fasiləsindən sonra çempionatda keçirəcəyiniz ilk oyunda “Qəbələ” ilə üz-üzə gələcəksiniz. Sabiq komandanızla görüşdən qələbə ilə ayrıla biləcəksiniz?
– Ümid edirəm ki, layiqli mübarizə apararaq qələbə qazana biləcəyik. Bilirik ki, Qəbələ səfəri çempionatda ən ağır səfərlərdəndir. “Qəbələ”yə bu mövsüm nə qədər yeni futbolçu gəlsə belə, rəqib çox təhlükəli komandadır, həm də oradakı hava şəraiti bu səfəri daha da çətinləşdirir.
– Çempionatın ikinci yarısında hədəfiniz nə olacaq: turnir cədvəlindəki hazırkı mövqeyinizi qorumaq, yoxsa daha yuxarı pillələrdə yer almaq?
– Hər bir futbolçu və komanda istəyər ki, maksimum nəticəyə imza atsın, daha yuxarı pillələrdə olmaq üçün mübarizə aparsın. Biz də əlimizdən gələni edəcəyik ki, yüksək yerlər uğrunda mübarizədən qopmayaq.
– Uzun müddətdir ki, Azərbaycan çempionatında çıxış edirsiniz. Bu mövsüm əvvəlkilərdən nə ilə fərqlənir?
– Builki çempionat çox fərqlidir. Çünki kimin favorit olduğu oyundan öncə 100 faiz bilinmir. Bunu ayırd etmək olduqca çətindir. Hər bir komanda bir-birinə qalib gəlmək gücündədir.
FƏRİD