“Qəbələ”nin Qəbələdə kötəklənməsi

“Qəbələ”nin qurtuluşu çətin görünür. Klubun sabiq baş meneceri Nail Kərimovu bərbad idarəçiliyi üzündən  mövsümə düzgün hazırlaşmayan, yanlış transferlərlə doldurulan heyət bu yükü çəkəcək gücdə deyil. Qeyri-adi bir şey baş verməsə, növbəti mövsüm “qırmızı-qaralar”ı I Liqada görəcəyik.

Misli Premyer Liqasının açılış matçında qeydə alınan nəticə autsayderlər qrupunda vəziyyəti dəyişdi. “Kəpəz” artıq “Qəbələ”ni 8 xal qabaqlayır. Düzdür, Elmar Baxşıyevin yetirmələrinin ehtiyatda bir oyunu var. Lakin həmin matçda rəqib “Qarabağ”dır və xal qazanmaq ehtimalı çox azdır. “Qəbələ”nin özünə gəlib ümidlənməsi üçün birbaşa rəqibi ilə əyani dueldə qalib gəlməsi lazım idi.

“Kəpəz” rəqibindən aşkar üstün oynayıb layiq olduğu qələbəni qazandı. Adil Şükürovun gəlişindən sonra xeyli inkişaf edən gəncəlilər məzmunlu oyunu ilə 3 xal əldə etdi. Baş məşqçi, komandası ən az büdcəli olmasına baxmayaraq, heç vaxt şikayətlənmədi, sadəcə, işinə baxdı və mükafatını almaqdadır. Qərblilər dünənki qələbə sayəsində əsas rəqibindən xeyli aralanıb.

Maraqlıdır ki, “Kəpəz” bunu məhz əsas rəqibi olan “Qəbələ”nin stadionundan istifadə etməklə bacarır. Doğma şəhərdən uzaq düşməsinə rəğmən, komanda birləşməyi bacarıb. Halbuki elitanı tərk etsə, qərblilərin bəhanəsi olacaqdı, amma klub rəhbərliyi vaxtında düzgün məşqçi seçimi edib ziyanın yarısından qayıtmağı bacardı.

“Kəpəz” hələ arxayınlaşmayacaq. Qarşıda çətin oyunlar, üstəlik, məhz “Qəbələ” ilə daha bir duel var. Ona görə də 8 xallıq fərqin əriməsi mümkündür. Amma problem “Qəbələ”nin özündədir. Baxşıyev komandanı idarə edə bilmir, uğursuzluq sıralanır. Toparlanmaq mümkündür, amma indiki əhval-ruhiyyə ilə çox çətin görünür.

8 xallıq fərq – ötən mövsümün kubok sahibi ən yaxın qonşusundan məhz bu qədər geridədir. Heyət yetərsiz deyil, ən azı “Kəpəz”lə müqayisədə daha sanballı görünür. Problemin nədə olduğunu klub rəhbərliyi tapmalıdır.

Baxşıyev yenə hakim səhvlərindən gileylənib. Bəlkə də haqlıdır, amma bu, kimsənin vecinə deyil. Çünki hakimlər komandanın xallarını əlindən alanda mətbuat “Qəbələ”nin müdafiəsinə qalxmışdı. Həmin vaxt Elmar bəy mətbuatı yalançı çıxarıb günahın özlərində olduğunu bildirmişdi. İndi onun dediyi yalnız bəhanədir, günahı özlərində axtarsın.

FƏRİD