Digər idman növləri
Qərb konfransında şərikli liderlik
MBA-da bu gecə 10 oyun baş tutub. Son çempion “Denver Naggets” səfərdə “Portlend Treyl Bleyzers”i məğlubiyyətə uğradıb. Qonaq komandanın lideri tripl-dabl edib. Nikola Yokiçin aktivində 29 xal, 15 ribaund və 14 asist var.
Türkiyəli basketbolçu Alperen Şengünün komandası da qalib gəlib. Hyuston təmsilçisi evdə “Finiks Sans”dan üstün olub. Alperen 17 xal və 12 ribaundla dabl-dabla imza atıb. Komandanın ən məhsuldar basketbolçusu isə 23 xal toplayan Vanvlit olub.
“Miluoki Baks” Qərb konfransının lideri “Minnesota Timbervulvs”u rəqib meydançada məğlubiyyətə uğradıb. Yannis Antetokumbo görüşü 33 xal və 13 ribaundla tamamlayıb. Minnesota komandasının məğlubiyyətindən “Oklahoma Siti Tanders” istifadə edib. “Vaşinqton Vizards” üzərində 147:106 hesablı qələbə qazanmaqla onlar konfransda liderliyə şərik olublar.
Şərq konfransında “Klivlend Kavalers”in uğursuz seriyası davam edir. Bu dəfə onlar “Filadelfiya Siksers”ə məğlub olmaqla (104:97 ) “Miluoki Baks”ın yaxınlaşmasına şərait yaradıblar.
Los-Ancelesdə “Leykers” autsayder “San Antonio Spörs”ü qəbul edib. Gözlənildiyi kimi, kaliforniyalılar qalib gəliblər. Lebron Ceyms oyunu 30 xal, 7 ribaund və 9 asistlə tamamlayıb. Qonaq komandanın gənc fransız basketbolçusu Viktor Vembanyamanın aktivində 27 xal, 12 ribaund, 8 asist və 6 blok-şot var.