Qəza şəraiti – Samir Abasov yeganə günahkardımı?

Samir Abasovun “Neftçi”də uğur qazanması mümkünsüzdü. Komandanın ən azı 2-ci yerə qalxmaq potensialı var, heyət zəngindi, maliyyə problemi yoxdu. Lakin daxili problemlər üzündən çempionluğun əsas favoriti olmaq üçün bakılıların şansı qalmayıb. Mövsüm hətta yarılanmadan bunu iddia etmək olar.

Abasovun günahları üzündən “Neftçi”də yaranan, qalaqlanan problemlərin fəsadları üzə çıxmaqdadı. İdman direktoru postunu ləğv etdirən baş məşqçinin birbaşa özünün nəzarət etdiyi transfer siyasəti yanlış olub, heyət düzgün komplektləşdirilməyib, yerli oyunçu potensialı gücləndirilməyib. Və bütün bunlar – aylardı yazdıqlarımız, dediklərimiz – çatışmazlıqların üzə çıxmasına səbəb olub. Mübarizə gərginləşdikcə, digər komandalar formaya düşdükcə “çempion bazası”nın üstündə xallar qazanan “Neftçi”nin boşluqları üzə çıxır.

Çoxlu legioner həm də çoxlu problem deməkdi. Hər tur azı 6 əcnəbinin ehtiyatda qaldığını və bunun hər həftə təkrarlandığını nəzərə alsaq, mənzərə aydınlaşar. Ehtiyatda qalanların narazılığını azaltmaq, səsini kəsmək üçün rotasiyalara əl atmaq, heyətlə “oynamaq” yeni problemlər ortaya çıxarır. Belədə sabit heyət anlayışı itir, oyun dəst-xətti pozulur, xal itkiləri sıralanır.

Abasovun səhvi yalnız heyətin komplektləşməsi ilə bağlı deyil. Samir bəyin hər açıqlaması “Neftçi”nin düşərgəsi daxilində qumbara partlatmaq kimi bir şeydi. Fitili çəkib, qulağını, gözünü yumur, bəzən adrenilini yüksək olduğundan özünə dəyən qəlpələri də hiss etmir, yalnız məğlubiyyətlər sıralananda özünü də qan apardığının fərqinə varır. Dedikləri həqiqət olsaydı, haqq qazandırmaq olardı, iş ondadı ki, hər dəfə bəhanələrlə öz səhvlərini gizlətməyə çalışır, yalan danışır, fikir yayındırır, özünə sərf edəni deyir. Belədə real mənzərəni bilənlər qarşısında imicinə mənfi xallar gətirir və əsl həqiqəti bilənlər gündən-günə daha da çoxalır.

Məhz belə açıqlamalar üzündən rəhbərliklə münasibətləri soyudub, indi arxasında duran yoxdu. Həm də yalnız özünü düşünən, bütün çətin məqamlarda özündən başqa hamını günahkar çıxaran birinə kim arxa durar ki? Necə ki, eyni şeyi oyunçular edir. Bütün yerli oyunçuları “aşağı səviyyəli” adlandırıb təhqir edən, onların çempionluqdakı payını mənimsəyən məşqçiyə adekvat cavab son 3 matçdakı nəticələrdi. “Qarabağ”a darmadağın, “Keşlə” və “Sabah”la görüşlərdə bəd geridönüşlərdə məşqçidən incikliyin əlamətləri aşkar görünür.

Səviyyəsinə şübhə edilən, alçaldılan futbolçuların ruh halını təsəvvür edə bilirsizmi? Ehtiyatda qalmasından narazı legionerlər, üstəgəl səviyyəsinə şübhə edilən yerlilər – o komanda uğur üçün birləşə bilərmi?

Azarkeşlər də hər şeyin fərqindədi. Uzun müddətdi tribunadan “qovulmuş” narazılıqlar, etirazlar dünən geri qayıtdı. Oyunların bilərəkdən “verilməsi” ilə bağlı eyhamlar, “haram çörək” barədə məşhur şüar axırıncı dəfə pandemiyadan əvvəl səslənmişdi. Və “İstefa” şüarları. Azarkeşlər hələ tərəddüddədi – hədəfi konkret göstərmirlər, məşqçi və ya rəhbərliyin ünvanını nişan vermirlər, sadəcə, istefaya səsləyirlər. Zamanla onu da dəqiqləşdirəcəklər.

Abasov açıqlamaları ilə azarkeşləri də yönəldir. Yerli oyunçuları hədəf göstərdi və indi də narazı olduğu Mirabdulla Abbasovu həlledici anda meydana buraxır. Azarkeşlər də məşqçini örnək alıb bu hücumçunu təhqir edir, qarşılıq alınca hətta meydana enərək əlbəyaxa davaya cəhd edir. Fitili baş məşqçi çəkib, rəhbərlik, futbolçular, indi də azarkeşlər fəsadını yaşayır.

Dünənki olaya görə cavab qaytarmamalı olan Mirabdullanı, meydançaya girməməli olan azarkeşi – kimi istəsən, qınamaq olar, əsas günahkar bu ab-havanı davranışlarıyla, açıqlamalarıyla yaradan Samir bəydi. Etdiyi səhvlər, bu səhvləri gizlətmək üçün etdiyi növbəti səhvlər… və o səhvi indi futbolçular, azarkeşlər edir.

Təbii ki, iş cığırından çıxıbsa, klub rəhbərliyini də unutmaq olmaz. Əvvəla, idman direktoru postunda Ceyhun Sultanovun yerinə bacarıqlı biri təyin olunmalıydı, heyət komplektləşəndə, transferlər ediləndə məşqçiyə bu qədər sərbəstlik verilməməliydi. Həsrəti bitirmiş “çempion məşqçi” adından çəkinilibsə, ona hər cür azadlıq yaradılıbsa, ilk səhv elə həmin gün edilib. “Neftçi” bir aktyorun teatrı ola bilməz, sistemli iş, subardinasiya prinsipləri, məsləhətli planlama yoxdursa, yerində xaos, bugünkü böhran qaçılmazdı.

Abasov “Neftçi”ni elə dalana salıb ki, qışda bu yükdən qurtulmaq da olmayacaq. Heyət lazımsız oyunçularla yüklənib, yeni transferlər üçün maliyyə, ən əsası yer qalmayıb. Heyətdə dəyişiklik olmayacağı, problemli mövqelərə nöqtə transferlər edilməyəcəyi təqdirdə isə hətta mükafatçılar sırasına düşmək belə çətin tapşırıqdı. Radikal qərarlar vermək, nələrisə dəyişmək zamanıdı, rəhbərlik bundan qorxmamalıdı, qorxunun əcələ faydası yoxdu, onsuz da bu gedişlə “əcəl” qapıdadı… Əcəl “at”ın belində, “qartal”ın dimdiyindədi…

Avrokuboklardakı uğursuzluq da bu cür davranışların nəticəsiydi. Rəhbərlik Abasovun “çempion məşqçi” adından qorxdu, onu buxovlamadı, komanda planlamasına qarışmadı, hamının gördüyü, mətbuatın yazdığı problemləri gözardı etdi. Uğursuzluqlar sıralandı, Samir bəy bəhanələr gətirdi, yerli-yersiz bütün istəkləri yerinə yetirildi. Sezar Meza Kolli israrı, Xəyal Nəcəfov transferi, Mamadu Mbodj sevgisi, məqsədli menecerlərin pula atdığı tor, düşünülmədən imkan yaradılan legioner axını, Namik Ələskərov xətası – bütün bunlara görə rəhbərlik də günahkardı. Ən azı “legioner limiti var, yerli oyunçu kimi oynamağa qüvvəmiz varmı”, “Krivotsyiku, Ələskərovu kimlə əvəz edirik”, “eynitipli bu qədər əcnəbini neyləyirik” sualları verilməliydi.

Və indi “baza tikirik” bəhanəsi də alqışlanmayacaq, büdcə artırılıb, çempion komandanın böyüməsi üçün şərait yaradılıb. Məşqçiyə sosial şəbəkədə şərh yazmaqla klub idarə etmirlər, “Neftçi” relsə düşmüşkən əyləcə basmaq qəza şəraiti yaradır. Relslə problemsiz hərəkət üçün sürücünün qərarları həlledici olmamalıdı, qarşıdan gələn qatarları da nəzərə alan, hərəkət cədvəlini müəyyən edən dispetçerlər məsuliyyət daşıyır. Klubun dispetçerləri, qəza vəziyyətinə görə öz məsuliyyətinizin fərqindəsizmi?

VÜSAL MAHMUDOV