“Qarabağ” “Bayer”ə də asan təslim olmayacaq”

“Qarabağ”ın sabiq qapıçısı Fərhad Vəliyevin futbolinfo.az saytına müsahibəsi

– “Qarabağ”ın Avropa Liqasının pley-off mərhələsində “Braqa” ilə cavab oyunu olduqca dramatik alındı. Komandamız çətin olsa da, Azərbaycan futbolunda növbəti tarixi uğura imza atmağı bacardı…

– “Braqa” ilə Bakıdakı görüşün çətin olacağını bilirdim, amma bu qədər də həyəcanlı, dramatik keçəcəyini təxmin etmirdim. Düşünürəm ki, oyunun belə həyəcanlı alınması daha da yaxşı, sevindirici oldu.

– Matçın hakimi Georgi Kabakovun idarəçiliyi haqda fikirlər birmənalı deyil. Siz bolqarıstanlı referinin qərarları haqda nə deyə bilərsiniz?

– Hakim ümumi götürəndə pis təsir bağışlamadı. O və köməkçiləri bir ciddi səhvə yol verdilər. “Qarabağ” ikinci topu vurandan sonra əks-hücumda “Braqa”nı yaxaladı, 3-cü qolu vura bilərdi. Yan xətt hakimi həmin epizodda bayrağı qaldırdı. Halbuki o epizodda baş hakim oyunu davam etdirməli idi.

– “Qarabağ” 10 nəfərlə qaldıqdan sonra 2 qol buraxdı. Həmin anda mərhələni keçəcəyimizə inamınız itmişdi?

– İkinci hissənin əvvəlindəcə “Qarabağ” 10 nəfərlə qaldı. Vaxt keçdikcə adam düşünürdü ki, “Braqa” təmsilçimizi sıxacaq. Elə də oldu, 2 qol vurdular. Amma “Qarabağ” öz oyunundan dönmürdü. İmkan olanda hücuma da çıxır, qol epizodları yaradırdı. Oyunun əvvəlindən sonunadək ümidlərimiz böyük idi. Allaha şükürlər olsun, uğurlu nəticə gəldi, komandamız mərhələni adladı.

– Qurban Qurbanovun sonradan meydana buraxdığı futbolçular – Mateus Silva və Nəriman Axundzadə qol vurdular…

– Qurban müəllim bu işi ən yaxşı bilənlərdəndir. “Braqa” ilə birinci oyunu yada salaq, orada ehtiyatdan meydana daxil olan Nəriman təmsilçimizin 5-ci qolunu vura bilərdi. Qismət bu oyuna imiş. Qurban müəllimin əvəzetmələri özünü doğrultdu və meydana çıxan hər iki oyunçu qol vurdu. Nərimanın bizi növbəti mərhələyə daşıyan qolu vurması, doğrudan da, sevindirici haldır.

– “Qarabağ”ın heyətində bu görüşdə ən çox kimi bəyəndiniz?

– “Qarabağ” komanda şəklində yaxşı çıxış etdi. Adam bir oyunçunu seçə bilmir. Çünki hər kəs çalışırdı ki, tərinin son damlasına kimi meydanda canını qoysun. Onu da etdilər. Hamısı bir yerdə mübarizə apardılar. Məşqçilər korpusu da oyunun içində idi. Bunun nəticəsi idi ki, Qurban müəllimə sarı, köməkçisi Elçin Rəhmanova qırmızı vərəqə verildi. Texniki heyət, oyunçular, ehtiyatda oturan futbolçular, bir sözlə, hər kəs matçın içində idi, onun həyəcanını yaşayırdı. Növbəti mərhələyə qazanılan vəsiqədə bütün komandanın zəhməti var.

– Püşk “Qarabağ”a Avroliqanın qrupunda yaxşı tanıdığımız “Bayer”i rəqib etdi. Leverkuzen klubu ilə budəfəki görüşlərdən hansı nəticəni gözləyirsiniz?

– “Qarabağ”ın yaxından tanıdığı rəqibdir. “Bayer” güclü komandadır, həm yaxşı oyun göstərir, həm də çoxlu qol vurur. Almaniya Bundesliqasında liderdir. “Qarabağ”ın bəxtinə çox güclü rəqib düşdü. “Qarabağ”ın qrupdakı oyunları yenidən gözdən keçirərək “Bayer”ə qarşı layiqli mübarizə aparacağına inanıram. İndiki halda şansları “Bayer”in lehinə 60/40 olaraq dəyərləndirirəm. “Bayer” bu cütün favoritidir. Amma “Qarabağ” asan təslim olmayacaq. Qısası, yenə ümidlərimiz var.

CAVAD