“Qarabağ”, “Sabah” və başqaları

Misli Premyer Liqasında rəqabət bitməyib. Sadəcə, komandalar qütblərə bölünüb və hərənin öz hədəfi var. Çempionluq üçün yarışan iki komanda var, orta sıralarda gün keçirənlərin və autsayderlər qrupunda olanların öz mübarizəsi gedir.

“Qarabağ” 12 oyuna 12 qələbə qazanmaqla unikal nəticə göstərir. Normalda belə göstəriciyə imza atan komandanı növbəti çempionluq münasibəti ilə erkən təbrik etmək olardı. Lakin “Sabah” buna imkan vermir, qələbələri sıralamaqla çempionatdakı intriqanı saxlayır. Bəlkə də bu gedişatda ən şanssız komanda elə “Sabah”dır. 13 turda 34 xal toplamaq əla nəticədi, amma yarışda “Qarabağ” kimi rəqib varsa, sevinə bilmirsən. Bəlkə də növbəti turda bu komandaların şəxsi dueli çox şeyə aydınlıq gətirdi.

Dünən liderlər növbəti rahat qələbəsini qazandı. “Sabah” “Səbail”lə səfər oyununda hissələrin kəsişməsinə təsadüf edən qısa zamanda ardıcıl qollar vurub 3 xalı hesabına yazdırdı. Murad Musayevin yetirmələri bu mövsüm yalnız “dənizçilər”ə qol vura bilməmişdi və xal itirdiyi iki görüşdən birində məhz Bayıl təmsilçisindən badalaq almışdı. O səbəbdən matça ciddi yanaşan qonaqlar ilk dəqiqələrdən təşəbbüsü ələ aldı, oyuna diqtə etdi, yekunda istəyinə nail oldu.

Yeni lider zirvədə heç 3 saat da qalmadı. “Qarabağ” favoriti olduğu “Kəpəz”lə matçın əvvəlindəcə hesabı açdı, daha sonra davamını gətirib qələbə qazandı. Düzdü, gəncəlilər 76-cı dəqiqədə hesabı bərabərləşdirdi, lakin sevincləri qısa çəkdi, ağdamlılar növbəti dəfə istədiyi vaxt istədiyi qədər qol vura biləcəklərini göstərdi. Çempion yenə daxili birincilikdə əsas oyunçularına istirahət verib ikinci heyətlə də uğur qazana bildiyini nümayiş etdirdi.

“Neftçi” bir oyun az keçirən liderdən 10 xal geri düşüb. Bu, çox ciddi fərqdi və bakılıların qızıl medallar uğrunda mübarizədən qopduğunu deməyə əsas verir. Bakılılar Sumqayıtda növbəti dəfə büdrəməklə “Zirə” üzərində qələbənin təsadüfi, daha çox “rəqibin hədiyyəsi” olduğunu isbatladılar. Həmin matçda fərdi səhvlərə görə böyükhesablı qələbə qazanan Laurentsiu Regekampfın komandası, “kimyaçılar”la qarşılaşmada iki dəfə hesabda geri düşdü. “Sumqayıt”ın bu matçadək cəmi iki qol vurduğunu nəzərə alsaq, “Neftçi” daha çox məyus olmalıdı. Düzdü, paytaxt təmsilçisi rəqibdən xal qopara bildi, amma qələbəsi olmayan komandanı yenə bilməmək özü də uğursuzluqdu.

Növbəylə 4-cü pillədə bir-birini əvəzləyən “Qəbələ”ylə “Zirə” artıq iddialılar siyahısından çıxıb. Bölgə təmsilçisi uğursuzluq seriyasına son qoysa da, bu qələbə aldadıcı ola bilər. Çünki meydandakı mübarizənin nəticəsi xal bölgüsü olmalıydı, bitimə saniyələr qalarkən mərkəzdən vurulan qol qələbə gətirdisə, bu, daha çox təsadüf və rəqibin qapıçısının məsuliyyətsizliyi idi.

İddialıları yenməkdə çətinlik çəkən “Zirə”yə gəlincə, Mehdi Cənnətov da səhv edən futbolçuların sırasına qoşuldu. Və hər matçda fərqli oyunçlar fərdi səhv edirsə, belə qüsurların sayı çoxalırsa, deməli, komandanın özündə problem var.

“Turan Tovuz” hələ 6-cı pillədədisə, səbəb özündən aşağıdakı komandaların uğursuz çıxışıdı. Qərb təmsilçisi son həftələr yaxşı oynamır, mövsümün startındakı istəkli komanda sanki təbdən düşüb. Xüsusilə “Şamaxı” ilə matçda Ayxan Abbasovun yetirmələri ən bərbad oyununu keçirdi. Qonaqlar daha əzmkar oynayıb layiq olduğu qələbəni qazandı. “Turan Tovuz”un bir neçə oyunçudan asılı olduğu, onların yoxluğunda əziyyət çəkdiyi dərhal göründü. Məhdud heyətin fəsadı məhz sabit ola bilməməkdədi.

Düzdü, mövsümdəki ilk qələbə “Şamaxı”nı son pillədən uzaqlaşdırdı. Lakin hələ komandada işlərin qaydasında getdiyini deyə bilmərik. Komanda elə növbəti turda “Sumqayıt”a uduzmaqla yenidən zizəmiyə düşə bilər. Qələbə isə ən azı qışa kimi rahat nəfəs almağa imkan verəcək. İstənilən halda, bu komandaların bir-birini ötməkdən başqa imkanı yoxdu. Premyer Liqada qütblər müəyyənləşib, yuxarılara əlcək atan görünmür, hamı bir-birini üstələyib canını qurtarmağın dərdindədi.

CAVAD