Ölkə futbolu
“Qarabağ” üçün rahat qələbə
Qurban Qurbanov dünən mətbuat konfransında dediyi bir cümlə ilə bütöv matçın qiymətini verdi: “Keşlə”nin çox yaxşı hücum potensialı olduğunu bilirdik”. Qonaqların matç ərzində qapıya doğru bircə zərbə belə vurmadığını nəzərə alsaq, “Qarabağ”ın baş məqşçisi 90 dəqiqə ərzində nəyi bacardıqlarını açıqladı. Həmin “yaxşı potensiallı hücum xətti” ağdamlılara heç bir təhlükə yarada bilmədi.
Meydana ideala yaxın heyət çıxaran “Qarabağ” həm “Keşlə”yə oynamaq imkanı vermədi, həm də özü istədiyini etdi. Nəticənin minimal hesablı olması kimsəni aldatmasın, “Qarabağ” 2 dəfə dirəyi, 1 dəfə tiri nişan aldı, Ramil Şeydayev bir neçə əlverişli şansı boşa verdi. Qələbə qolunu vurduqdan sonra meydan sahibləri zədədən qorunmağa, gücünü gələn həftə oynayacağı “Omoniya” ilə matça saxlamağa çalışdı. Futbolçuların beyninin kiprlilərlə qarşılaşmada olduğu hər hərəkətindən bəlli olurdu.
“Qarabağ”ın millinin düşərgəsindən gələn yerli və legioner futbolçularının çoxluğu, onların əksəriyyətinin yaxşı istirahət etməyə vaxtının olmaması hiss edilmədi. İrəlidə pressinq etməklə və top saxlamaqla rəqibin fəallaşmasına imkan verməyən ağdamlılar zirvədə qalmaq üçün vacib hesabı təmin etdi, bu rəqibdən ilk dövrədəki bərabərliyin əvəzini çıxdı.
Bir neçə uğurlu oyundan sonra yenidən autsayderlər qrupunda möhkəmlənən “Keşlə”nin qışa kimi özünə gəlməsi çətin görünür. “Qarabağ”a məğlubiyyətə görə Sənan Qurbanovu qınamaq bəlkə də yersizdi, amma ümumi götürdükdə paytaxt təmsilçisinin oyununda problemlər bitmir. Heyət bir o qədər zəif deyil, komanda daha yüksək yerlərə layiqdi, lakin onları döyüşkən kollektivə çevirmək mümkün olmayıb. Çempionat yarılanandan sonra “Şamaxı”ya çevriləcək klubda çox şey dəyişə bilər.
AĞA