“Qarabağ”a rəqibi Orxan Məmmədov seçdi

Ölkə kubokunda yarımfinal cütlərindən biri bəllidi. Dünən keçirilən hər iki oyunda qələbəni qonaqlar bayram etdi və bu, onların bir-birinə rəqib olmasına imkan yaratdı.

“Qarabağ”ın mərhələni adlayacağı ilk oyundan sonra bəlli idi. Bakıda “Qəbələ”ni 3:1 hesabıyla yenən çempion cütün taleyinə böyük ölçüdə aydınlıq gətirmişdi. Sadəcə, əyalət təmsilçisinin son dəqiqələrdə vurduğu təsəlli qolu intriqanı tam ölməyə qoymamışdı. Amma evdə 2:0-a ümid edən Elmar Baxşıyevin yetirmələrinin planları cavab matçının 6-cı dəqiqəsində alt-üst oldu. Maksim Medvedevin qolu ağdamlıların qələbəsinə şübhə yeri qoymadı.

“Qarabağ” matça əsas heyətlə çıxmaqla həm arxayınlaşmadığını göstərdi, həm də növbəti turda “Neftçi”yə qarşı oyunun məşqini etdi. Qurban Qurbanovun çempionat oyununda bu heyətə güvənəcəyini təxmin etmək olar. O, növbəti qollardan sonra etdiyi əvəzləmələri, rotasiyaları da bakılılarla duelə hesablamışdı.

Ağdamlıların rəqibinin müəyyənləşdiyi görüş daha maraqla gözlənilirdi. Səfərdə tək qolla qalib gələn “Səbail” daha şanslı görünsə də, son illər kubok oyunlarında lazımi nəticəni qazanmaq baxıından daha uğurlu təcrübəsi olan “Sumqayıt”dan sensasiya gözlənilirdi. İlk görüşlərdən sonrakı yazımızda “kimyaçılar”ın səfər qolu sayəsində uğur qazanacağını proqnozlaşdırmışdıq və yanılmadıq.

İnsaf naminə, “Sumqayıt” qələbəyə layiq idi. Qonaqlar rəqibiylə müqayisədə daha istəkli təsir bağışlayırdı və ilk dəqiqələrdən hücumu düşünəcəklərini göstərdilər. Rəngarəng hücumlardan sonra qolun vurulması an məsələsi idi, vuruldu da, lakin…

Baş hakim Orxan Məmmədov 13 dəqiqə ərzində “Səbail”in qatilinə çevrildi. O, yersiz qərarları ilə “kimyaçılar”ın bəlkə də oyunla əldə edəcəyi uğura kölgə saldı. İlk 10 dəqiqədə hər iki tərəfin əleyhinə qəribə qərarlar verən referi zaman keçdikcə nəticəyə təsir edən səhvləri sıraladı. Məmmədov öncə heç nədən meydan sahiblərinin qapısına penalti təyin etdi. Halbuki həmin epizodda Rahid Əmirquliyev Murad Xaçayevə toxunmamış, qonaq yarımmüdafiəçi özünü yerə atmışdı. Ardınca isə Əli Qurbani ofsaydda ola-ola topa toxunuşu qol kimi qeydə alındı. 2:0 – oyunun əlavə vaxta getməyəcəyi dəqiqləşdi.

Matçın qalan bölümündə də “Sumqayıt” daha üstün idi. Yalnız son yarım saatda “Səbail” komanda şəklində hücuma keçib, möcüzə üçün cəhd etdi. Buna qonaqların arxayınçılığı və Aftandil Hacıyevin səhvlərini anlayıb fərqli taktikanı tətbiq etməsi səbəb oldu. Amma “dənizçilər”in gücü yalnız təsəlli qoluna çatdı, hesabı bərabərləşdrməyə zaman yetmədi. Halbuki Əfran İsmayılovun ofsayd səbəbi ilə qeydə alınmayan qolu haqda fərqli qərar verilsəydi, bəlkə bərabərlik təmin olunacaqdı. Passiv vəziyyətdə olan Rauf Əlyevin arxasından keçən topu tora qovuşduran yarımmüdafiəçinin haqqı yeyildi.

Ola bilsin, yarımfinala bu vəsiqəyə layiq olan yüksəldi, lakin hakim səhvləri qələbəyə kölgə saldı. Qərəzli olub-olmadığını AFFA-dakılar araşdırsın – məqsədli səhvlər idisə, cəzası verilsin, müvafiq tədbir görülsün; hakimin səviyyəsi budursa, o zaman günahı həm də özlərində axtarsınlar.

Hakimlər Komitəsinin sədri Frits Stuxlik tənqidlərə layiq biridi. O, Xaqani Məmmədovu əvəz edəndə problemlərin həllinə ümid etmişdik, avstriyalı isə bu sahəni tamam bərbad hala salıb. Hər tur, az qala hər oyun hakimlərin biabırçı səhvlərinə şahid oluruq. Kubokun ilk oyununda “Keşlə”yə şübhəli penalti ilə təslim edilən “Kəpəz”in aibətini dünən “Səbail yaşadı. İşə bu cür münasibətlə, belə yanaşma ilə haqqı tapdanan hələ çox olacaq.

FƏRİD