Ölkə futbolu
“Qarabağ”la “Ferentsvaroş” hücumçularını dəyişə bilər
“Qarabağ” hücum xəttini gücləndirmək üçün daha bir variant üzərində çalışır. Əldə etdiyimiz bilgiyə görə, ağdamlılar “Ferentsvaroş”la hücumçularını dəyişə bilər.
Futbolinfo.az xəbər verir ki, Kvabena Ovusunun Macarıstan klubuna keçidi demək olar, dəqiqləşib. Qanalı futbolçu ağdamlılarla 6 aylıq müqaviləsi qalmasının verdiyi üstünlükdən yararlanaraq başqa klubla danışıq aparmaq hüququndan faydalanıb. O, “Ferentsvaroş”la ikiillik müqaviləni razılaşdırıb. Hücumçu yayda azad agent kimi Macarıstana yollanacaq.
Amma onun “Qarabağ”dan indi ayrılmaq variantı da var. Futbolçu iki klubun razılaşmasını, “Ferentsvaroş”un müəyyən məbləğ ödəyərək onu indi transfer etməsini istəyir. Ağdam klubu da bunun tərəfdarıdır, amma öncə Kvabenanı əvəz edəcək hücumçu alınmalıdır. Yalnız layiqli əvəzedici transfer edildikdən sonra “Ferentsvaroş”un təklifi müzakirə edilə bilər.
İş ondadır ki, “Qarabağ”ın heyətinə qatmaq istədiyi futbolçulardan biri məhz “Ferentsvaroş”un düşərgəsindədir. “Atlılar” çoxdan izlədiyi Frank Bolini almağa cəhd göstərir. Danışıqlar uğurlu alınsa, hücumçular yerlərini dəyişəcək və “Qarabağ” daha perspektivli olan hücumçu üçün müəyyən məbləğ ödəyəcək.
Ovusu kimi Bolinin də müqaviləsi yayda bitəcək. Yəni, durum eynidir, “Ferentsvaroş” da futbolçusunu azad agent kimi itirməmək üçün qışda Frankla vidalaşa bilər. Yeganə problem Fil Dişi Sahilindən olan futbolçunu Azərbaycana gəlməyə razı salmaqla və daha çox ödəniş etməklə bağlıdır.
“Ferentsvaroş”a 2019-cu ilin yayında Norveç “Stabek”indən keçən futbolçu “Qarabağ”a qol vurmağı bacarıb. Çempionlar Liqasının 3-cü təsnifat mərhələsi çərçivəsində avqustun 3-də Bakıda keçirilən oyunda hesabı Boli açmış (17-ci dəqiqə), Ovusu bərabərləşdirmişdi (34). 1:1 bitən matçın Budabeştdəki revanşında “Qarabağ” üstün olmuşdu – 3:1.
Boli “Qarabağ”ın maraqlandığı hücumçulardan yalnız biridir. Ağdamlılar digər variantlar üzərində də çalışmalarını davam etdirir. Dəyiş-düyüş reallaşmasa belə, daha yaxşı forvardın transferi qarşılığında Ovusunun qışda Macarıstan klubuna satılması mümkündür.
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-23 08:00
“Səbail” “Sabah”a uduzsa…
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”